Ënnerzwerg

Vu Wikipedia
Wiesselen op: Navigatioun, sichen
Hertzsprung-Russel-Diagramm

Ënnerzwerge si Stären, déi am Vergläich zu „normale“ Stäre bei gläicher Temperatur (eigentlech Effektivtemperatur) däitlech méi liichtschwaach sinn.

Astronomesch korrekt ausgedréckt leien Ënnerzwerge am Hertzsprung-Russell-Diagramm ongeféier 1-2 Magnituden ënner der Haaptrei. Et ënnerscheet een dobäi kill a waarm Ënnerzwergen, déi zwou komplett verschidde Klasse formen an deenen hir Memberen a ganz verschidden Entwécklungsstadie sinn. Bei béide Klassen däerf aus der Positioun am Hertzsprung-Russell-Diagramm net op eng intrinsesch Liichtschwächt geduecht ginn; si besiedelen nëmmen e Beräich nieft der Haaptrei.

Kill Ënnerzwerge[änneren | Quelltext änneren]

Dës Stäre si vum Spektraltyp G bis M respektiv sdG bis sdM. Si si metallaarm, awer och Haaptreiestären. Duerch déi niddreg Metallheefegkeet ännert sech d'Absorptiounsverhale vum Stärkär an domat den Energietransport am Stär. Dat huet zum Schluss Auswierkungen op d'Struktur a soumat wat fir e Radius, wat fir eng Liichtkraaft a wat fir eng Effektivtemperatur e Stär mat enger gewëssener Mass huet. Vergläicht een elo mat enger bestëmmtener Mass „normal“ Zwergstäre mat Ënnerzwerge, sou ginn Ënerzwerge méi waarm (dat heescht si wanderen no lénks am Hertzsprung-Russell-Diagramm) a gläichzäiteg méi hell (dat heescht si wanderen nees no uewen zu der Haaptrei hin), nëmmen gi si net hell genuch, fir nees op déi normal Haaptrei ze kommen. Sou formen Ënnerzwerge eng eegen Haaptrei ënner der gewinntener a gi fälschlecherweis als liichtschwaach bezeechent.

Kill Ënnerzwerge sinn am Allgemenge ganz al sougenannte Populatioun II Stären. E Beispill fir dësen Typ ass de Kapteyns Stär.

Waarm oder blo Ënnerzwerge[änneren | Quelltext änneren]

Dës Stäre si vum Spektraltyp O oder B, dann och sdO, sdOB oder sdB genannt, an entspriechend méi waarm wéi 10000 K. D'Natur vun dëse Stären ass nach ëmmer net ganz kloer, awer d'Wësseschaft geet am Moment dovun aus, datt et sech ëm heliumbrennend Stären handelt, déi nëmmen eng ganz dënn Waasserstoffhüll hunn. Normalerweis brennt e Stär nom Roude Ris-Stadium Helium ënner enger masseräicher Waasserstoffschuel. Waarm Ënnerzwerge sinn, (nom leschte Stand an der Fuerschung), d'Käre vu sou Stären, déi awer hir Hüll verluer hunn.

Am Verglach zu Stäre vun der Haaptrei sinn dës Stäre ganz anescht opgebaut a stinn dofir op enger anerer Plaz am Hertzsprung-Russell-Diagramm; an dësem Fall ass hir Positioun lénks ënne vun der Haaptrei.

Kuckt och[änneren | Quelltext änneren]

Saturn 01.svg Portal Astronomie