Albert Hames
|
Dëse Konschtartikel ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran. |
| Albert Hames | |
|---|---|
| Gebuer | 13. Januar 1910 |
| Gestuerwen | 26. Dezember 1989 |
| Nationalitéit | Lëtzebuerg |
| Aktivitéit | Sculpteur |
 | |
De Albert Hames, gebuer den 13. Januar 1910 zu Rëmeleng, a gestuerwen de 26. Dezember 1989, war e lëtzebuergesche Sculpteur, Restaurateur a Konschtenseignant.
Liewen[änneren | Quelltext änneren]
Den Albert Hames ass dat eenzegt Kand vum Eisebunner Alphonse Hames an der Suzanne Webert, déi aus enger loutrengescher Famill staamt.
1924 kënnt hien als Schüler an d'École professionelle zu Esch-Uelzecht a geet do a verschidde Konschtcoursen.
1929 mécht hien e Stage an der Konschtschräinerei Hammerel zu Esch-Uelzecht a geet niewebäi a Course fir Modelage an Zeechnen.
1930 schafft hien am Atelier vum lëtzebuergesche Sculpteur Albert Kratzenberg (1890-1966).
1933 gëtt den Albert Hames Member am Cercle artistique de Luxembourg.
1934 ass hie Stagiaire op der Staatliche Berufsfachschule für Holzbildhauer und Schnitzer zu Oberammergau a Bayern fir sech an der Holzschnëtzlerei ze perfektionéieren.
1938 studéiert hien op der École nationale supérieure des beaux-arts zu Paräis
1946 fänkt hien als Chargé de cours an der École professionelle zu Esch-Uelzecht un.
Hie gëtt 1953 mat der Néiesch Léonie Colas vu Rëmeleng bestuet.
1975 gëtt hie pensionéiert.
De 26. Dezember 1989 stierft hien am Alter vun 79 Joer no engem Häerzinfarkt um Wee fir an d'Klinik. Hie gëtt an d'Familljegraf zu Rëmeleng um Kierfecht bäigesat.
Zanter 2011 stinn dem Albert Hames seng Haiser a säin Atelier vu Rëmeleng op der Lëscht vun de klasséierte Monumenter.[1]
Wierk[änneren | Quelltext änneren]
- Kräizwee an der Kierch zu Bungeref
- Portal, Tabernakel, Kräizwee a Kräizegungsgrupp an der Kierch zu Dippech
- Kräizwee an der Basilika zu Iechternach
- Monument aux morts um Giewel vun der Baltesschéier op der Place des Enrôlés de Force – Victimes du Nazisme zu Jonglënster
- Erënnerungsplack un d'Krichsaffer op der Fassad vun der Kierch zu Käerch
- Statu vun der Tréischterin, Jousefsaltor, zwee Ambone mat engem Relief drop, Kräizwee, Pietà, Dafsteen, Volleksaltor mat der leschter Owesmoolzecht an Herz-Jesu Statu an der Kierch zu Lëtzebuerg-Bouneweg
- Jousef-Statu an der Jousefskierch um Lampertsbierg
- Maquette fir d'Monument vun den Affer vum Zweete Weltkrich zu Mamer
- Kräizwee an der Kierch zu Osper
- Kräizegungsgrupp an der Kierch zu Rolleng bei Péiteng
- Kräizegungsgrupp an der Kierch zu Rëmeleng (d'Christusfigur gouf 1980 duerch en neit Wierk ersat)
- Kräizwee an der Kierch zu Wäicherdang
- Monument mat Statu vum Jean-Pierre Bausch am Park zu Rëmeleng
- Aacht Relieffer op der Fassad vum Gemenge-Gebai zu Rëmeleng
- Véier Relieffer op der Fassad vum Policebüro, dem fréiere Gendarmeriesgebai, zu Rëmeleng
- Zeechnung fir d'Eisegitter viru senger Hausdier am Hädterwee zu Rëmeleng
- Monument fir d'Affer vum Zweete Weltkrich zu Colmer-Bierg
- Skulpturaarbechte vum Monument aux morts am Gebai vun der Gare zu Lëtzebuerg-Gare
- Monument fir d'Krichsaffer zu Sandweiler
- Monument fir d'Krichsaffer a Form vun engem Relief un der Fassad vun der Primärschoul zu Téiteng
- Mariestatue an der Kierch zu Jonglënster
- Skulptur 'Famill', um "Widdem", bei der Märei zu Keel
Ausstellungen[änneren | Quelltext änneren]
- 1996: Rétrospective iwwer d'Wierker vum Albert Hames
- 2007: Kollektivausstellung mat Wierker vun de rëmelenger Konschtschafeneden Félix Corrent (1895-1968), Albert Hames, Émile Kirscht (1913-1994) a Foni Tissen (1909-1975) am Kader vum Centenaire vun der Gemeng Rëmeleng.
Gielchen[änneren | Quelltext änneren]
- Chevalier vum Ordre de Mérite du Grand-Duché de Luxembourg (Promotioun 1974)[2]
Literatur[änneren | Quelltext änneren]
- Blasen, Léon, 1985. Das Monument für die im Zweiten Weltkrieg gefallenen oder ums Leben gekommenen Luxemburger Eisenbahner. Die Denkmäler der Stadt Luxemburg, Folge 29. Télécran Jg. 7, Nr. 32: 24-25. Luxembourg.
- Langini, Alex, 1995. Albert Hames - "Restaurateur du Musée". Nos cahiers: Lëtzebuerger Zäitschrëft fir Kultur Joer 16, Nr. 2: 35-41. Luxembourg.
- Ludmann, René, 1995. Albert Hames (1910-1989). nos cahiers Lëtzebuerger Zäitschrëft fir Kultur Joer 16, Nr. 2: 21-34. Luxembourg.
- Persin, Patrick-Gilles & Andrée Fonck, 2008. Albert Hames, sculpteur. Luxembourg: Patrick-Gilles Persin, 2008. 139 p.. [Mat Fotoe vum Guy Wolff]
Kuckt och[änneren | Quelltext änneren]
Um Spaweck[änneren | Quelltext änneren]
Referenzen[Quelltext änneren]
- ↑ cf. Arrêté du Conseil de Gouvernement du 27 mai 2011
- ↑ Pour leurs mérites dans le domaine culturel op der Säit 3 vum Luxemburger Wort vum 26. Juni 1974 op eluxemburgensia.lu gekuckt de 24. Dezember 2022