Alexander Mullenbach

Vu Wikipedia
Wiesselen op: Navigatioun, sichen

Den Alexander Mullenbach, gebuer den 23. Januar 1949 als Alex Mullenbach, ass e lëtzebuergesche Pianist, Komponist an Dirigent. Säi Papp war de Metzler Jean Mullenbach am Kräizgrënnchen.

Scho mat 8 Joer huet den Alexander Mullenbach éischt Kompositiounsversich gemaach. Musekstudien huet hien um Conservatoire vun der Stad Lëtzebuerg, dem Conservatoire vu Metz, um Conservatoire national supérieur de musique et de danse de Paris (5 éischt Praisser) an um Mozarteum zu Salzburg (Kompositiounsdiplom mat grousser Auszeechnung) absolvéiert.

Zanter 1978 huet hien iwwer 100 Wierker fir déi verschiddenst komponéiert, dorënner 1 Oper (Die Todesbrücke, déi um Ruhrfestival 2002 fir d'éischt opgefouert gouf, an duerno am Theater Gelsenkirchen 13 Opféierungen hat); 12 Orchesterstécker, vill Kammermusek, Solostécker, Vokalmusek an Elektronik.

Den Alew Mullenbach ass bei enger ganzer Rëtsch vu grousse Festivallen opgetrueden (Salzburger Festspiller, Mozartwoch Salzburg, Festival International d'Echternach, Festival du MIDEM Classique Cannes, Wanterfestival Moskau, Warschauer Hierscht, Musica Stroossbuerg, Barbican Center Series London asw.).

Seng Musek gouf vun Interpreten wéi Boris Pergamentschikow, Marjana Lipovsek, Kurt Widmer, Heinrich Schiff, Irena Grafenauer, Christina Ortiz, Eliott Fisk opgefouert, a vun Ensembele wéi dem Hagen Quartett, dem Wiener Streichsextett, der Camerata Salzburg, Musica Viva Dresden, dem Wiener Kammerorchester, de Philharmonesche Virtuose Berlin, dem Parnassus Ensemble London asw. Dirigente vu senge Wierker sinn Ernest Bour, Stanislav Scrowaczewski, Leopold Hager, David Shallon, Hubert Soudant, Marc Soustrot, Hans Graf, Jaap Schroeder, Antoni Wit an anerer.

Den Alexander Mullenbach enseignéiert och Musek, ë. a. um Mozarteum Salzburg, an dem Conservatoire vun der Stad Lëtzebuerg, wou a senger Klass bal all déi jonk lëtzebuergesch Komponisten an och vill auslännescher studéiert hunn). Hie gëtt och Meeschtercoursen a mécht Gaaschtvirträg, Radio- a Fernsehsendungen. Hien ass Jurymember vun etleche Internationale Concoursen (Reine Elisabeth Bréissel, Tschaikowski Moskau).

Als Solopianist, Kammermuseker, Liedbegleeder a geleegentlech och als Dirigent gëtt hien onzielech Concerten a ganz Europa an och a Canada.

Hien ass Grënner an éischte President vun der Lëtzebuerger Gesellschaft fir Nei Musek (LGNM) (1983-1994).

Vun 2000 bis 2007 war hie President vum Conseil Supérieur de la Musique vum Lëtzebuerger Land.

Zanter 2002 ass hien Direkter vun der Internationaler Summerakademie vum Mozarteum zu Salzburg.

Den Alex Mullenbach lieft zu Salzburg, zu Lëtzebuerg, an am Süde vu Frankräich, wuer hie sech fir ze komponéieren zréckzitt.

Hie krut d'Bernhard Paumgartner-Medail vun der Internationaler Stëftung Mozarteum (1980) an de Kompositiounspräis vum Éistreichesche Radio ORF Salzburg (1980).

Weider Funktioune sinn:

  • President vum Europäesche Musekinstitut IME zu Besançon (1990 – 1996)
  • Zanter 1997 Member vun der Academia Scientiarum et Artium Europaea zu Salzburg
  • Zanter 1997 Member vum Institut Grand Ducal zu Luxemburg
  • Zanter 1999 Officier de l'Ordre du Mérite vum Grand-Duché vu Letzebuerg
  • 2000 - 2007 President vum Conseil Supérieur de la Musique vum Grand-Duché vu Letzebuerg
  • Zanter 2002 Direktor vun der Internationaler Summerakademie vum Mozarteum Salzburg.
  • Zanter 2007 och Directeur Artistique vum Festival International vun Iechternach-Lëtzebuerg.