Arecibo Observatoire

Vu Wikipedia
Wiesselen op: Navigatioun, sichen
Geographesch Koordinaten: Gnome-globe.svg 18° 20’ 39’’ N 66° 45’ 10’’ W
Den Arecibo-Teleskop
D'Plattform im Detail
Den 305-Meter-Reflekter op enger Satellittefoto

Den Arecibo Observatoire, och d'Ouer vun Arecibo genannt, op der Insel Puerto Rico ass nom RATAN 600 dat zweetgréisst Radioteleskop vun der Welt.

Beschreiwung[änneren | Quelltext änneren]

De sphäresche Reflekter vum Radioteleskop ass net ze beweegen an huet en Duerchmiesser vun 304,8 m. Deen ass an en natierleche, schosselfërmegent Dall zirka 15 km südlech vun Arecibo am Norde vu Puerto Rico agelooss. Dräi Joer hat de Bau gedauert an den Observatoire gouf den 1. November 1963 ageweit.

Arecibo gëtt am Optrag vun der National Science Foundation (NSF) USA a vun der Cornell University bedriwwen. Well et am Ufank fir d'Ionosphärefuerschung konzipéiert war, hat den Teleskop dann och Arecibo Ionospheric Observatory (AIO) geheescht a war dem US-Verdeedegungsministère ënnerstallt. Am Oktober 1969 gouf d'Ariichtung vun der NSF iwwerholl a gouf am September 1971 an National Astronomy and Ionosphere Center (NAIC) ëmgenannt.

D'Teleskop steet jiddwer Astronom op – ronn 200 Fuerscher benotzen all Joer dës Anlag. D'Observatiounszäit gëtt vun engem onofhängege Gremium verginn.

Ronderëm de Reflekter stinn dräi grouss Dréiermasten – zwéi sinn 80,8 m héich, deen drëtten ass 30,4 m méi héich, ëm d'Terrainënnerscheeder auszegläichen. Vu jiddwer Mast gi sechs laang droote Seeler fort, un deenen iwwer der Mëtt vum Reflekter an 137,2 m Héicht eng dräeckeg Plattform ubruecht ass. Dodrun ass iwwer eng rankfërmeg Schinn ee gebéiten Azimutaarm dréibar installéiert. Den 100 m laangen Aarm ass fir d'Ausriichte vum Empfänger vum Teleskop. Dat sinn am „Gregorian Dome“: zwéi Subreflekteren déi d'Signaler bëndelen.

Trotzdeem datt de Reflekter vum Teleskop fest steet, kënnen duerch déi verschidde Verstellméiglechkeeten Himmelsobjete mat enger Deklinatioun vun tëscht ronn −1° a +38° fir eng gewëssen Zäit observéiert ginn, andeems d'Empfänger der Bewegung vum Objet um Himmel nogefouert ginn.

An den Empfänger stinn Antenne fir verschidde Frequenzberäicher vum Radioband zur Dispositioun, fir méi Observatiounsaufgaben ofzedecken. Ëmgekéiert kann d'Antenn awer och e Signal an d'Schossel stralen, déi et dann an de Raum reflektéiert. Soumat kann d'Radioteleskop vun Arecibo och als Sender gebraucht ginn, zum Beispill fir Radarobservatiounen vu Planéiten an Asteroiden. Am Observatoire, dat ronnderëm d'Auer a Betrib ass, sinn ongeféier 140 Persoune beschäftegt.

Technesch Daten[änneren | Quelltext änneren]

  • Héicht iwwer dem Mier (MSL): 497 m

Teleskopmoossen:

  • effektiven Duerchmiesser: 304,8 m
  • Fläch vum Reflekter: 73.000 m²
  • Uewerflächengenauegkeet: 2,2 mm (RMS)
  • Déift vum Kugelspigel: 50,9 m

Antenneplattform:

  • Gewiicht vun der Antenneplattform: 816 t
  • Héicht iwwer der Spigeluewerfläch: 137,2 m

Sender:

  • Sendeleeschtung: 500 kW

Empfänger:

  • Empfangsberäich: 300 MHz bis 10 GHz

Den Arecibo Message a SETI[änneren | Quelltext änneren]

D'Radioteleskop gouf fir d'Ausstralung vum Arecibo Message agesat. Dat Radiosignal hat d'Zil, Informatiounen iwwer d'Mënschheet u méiglecherweis existéierend extraterrestresch Zivilisatiounen z'iwwermëttelen. D'Haaptinitiateure vun deem Projet waren de Frank Drake an de Carl Sagan.

Zäitweis gëtt den Arecibo Observatoire fir d'Sich no ausserierdeschen Intelligenzen (SETI) agesat.

Kuckt och[änneren | Quelltext änneren]

Saturn 01.svg Portal Astronomie

Um Spaweck[änneren | Quelltext änneren]

Commons: Arecibo-Observatorium – Biller, Videoen oder Audiodateien