Bosscha-Observatoire

De Bosscha-Observatoire ass den eelsten Observatoire an Indonesien. E gouf 1923 gegrënnt a gehéiert zum Institut Teknologi Bandung. E steet op enger Héicht vun 1.310 m an der Stad Lembang am Weste vun der Insel Java.

Teleskope[änneren | Quelltext änneren]

Den Observatoire huet fënnëf gréisser Teleskopen:

Zeiss-Duebelrefrakter[änneren | Quelltext änneren]

Mat deem Teleskop ginn Duebelstären, besonnesch duerch Photometrie, Moundkrater, d'Planéite Mars, Saturn a Jupiter souwéi Koméiten ënnersicht resp. observéiert. Den Teleskop huet zwou Objektivlënse mat 60 cm Duerchmiesser an enger Brennwäit vun 10,7 Meter.

Teleskop (Bild virun 1941)
Zeiss-Duebelrefrakter vun 1923 vu Jena
Zeiss-Duebelrefrakter

Schmidt-Teleskop[änneren | Quelltext änneren]

Mat dem Schmidt-Teleskop (Spëtznumm: Bima Sakti) gi Galaxien, Stärespektren, Asteroiden a Supernovaen ënnersicht. Den Haaptspigel huet en Duerchmiesser vun 71 cm, d'Schmidt-Plack 50 cm, d'Brennwäit ass 2,5 m.

Bamberg-Refrakter[änneren | Quelltext änneren]

Dëse Refrakter mat 37 cm Duerchmiesser an enger Brennwäit vu 7 m gëtt besonnesch bei Ënnersich vun der visueller Hellegkeet, der Distanzmiessung vu Stären, Photometrie vu Stären déi sech verdecken a bei der Sonnenobservatioun gebraucht. Den Teleskop ass mat engem Photometer ekipéiert.

Cassegrain GOTO[änneren | Quelltext änneren]

De Cassegrain-Spigelteleskop ass e Geschenk vun der japanescher Regierung an huet eng computergesteiert Ausriichtung (GOTO). Un den Teleskop kann e Spektrometer ugeschloss ginn.