Defibrillator
 |
Dësen Artikel gehéiert zur Serie vun de Medezin-Artikelen. Dës Informatioune sinn zur allgemenger Weiderbildung geduecht, mä ersetzen op kee Fall en Dokter oder Apdikter! Och d'Éischt Hëllef-Rotschléi kënnen op kee Fall mat engem richtegen Éischt-Hëllef-Cours gläichgesat ginn! |
En Defibrillator ass en Apparat, deen hëlleft, dat déidlecht Häerzkummerflimmeren ze stoppen.
Beim Häerzkummerflimmeren erkennt een um EKG eng méi oder manner gläichméisseg, mä kleng Häerzaktivitéit. Graff gesinn entsteet et doduerch, datt den Tissus, deen d'Zesummenzéie vun den Häerzkummere koordinéiert, dëst net méi richteg mécht. Doduerch gëtt net méi richteg Blutt gepompelt, de Kierper leit u Sauerstoffmangel. Eng éischt Moossnam wier, e prekordiale Fauschtschlag, dono eng Reanimatioun.
En Defibrillator geet d'Saach anescht un. E versetzt dem Häerz e Stroumschlag, dat onregelméissegt Zucken, déi sougenannte Fibrillatioun stoppt, an d'Häerz ka probéieren nees an en normale Rhythmus ze kommen, wat awer net ëmmer klappt. Zur Zäit fanne sech am Rettungswiesen international zwou Zorte vun Defibrillatoren.
Inhaltsverzeechnes |
[änneren] Klasseschen Defibrillator
De Klasseschen Defibrillator verfügt am Normalfall iwwert zwou sougenannte Paddles (Elektroden), Kabele fir den EKG an enger Rei Knäpp.
Dësen Defi muss an dierf nëmmen vun erfuerenem Personal agesat ginn, zu Lëtzebuerg just vun Dokteren. Iwwer den EKG gëtt ofgelies ob et sech ëm en Häerzkummerflatteren oder -flimmeren handelt. Wa jo, stellt den Opérateur d'Stäerkt vum Stroumschock an, setzt d'Paddles op a schockt de Patient. Dës Defibrillatore fanne sech normalerweis just a Spideeler, bei Dokteren an an de SAMU Autoen.
Zu Lëtzebuerg haten d'Ambulanzen normalerweis keen Defibrillator bei sech. Zënter de Gebrauch vun engem Defibrillator vun der Kategorie 1 (AED) awer geregelt ass, sinn ëmmer méi Ambulanzen domat ausgerüst.
[änneren] Automateschen Externen Defibrillator (AED)
Anescht ass den AED. Hei handelt et sech ëm en Apparat, deen deelweis d'Gréisst vun nëmmen 20 op 20 cm huet an an enger Këscht verpaakt ass. Beim Auspake fënnt een den Apparat an zwou sougenannten Elektroden, Pads déi ee ka pechen. Dësen Defi kann theoretesch vu jidderengem benotzt ginn. Nieft dem Asaz vum Defi ass awer eng Häerz-Longen-Reanimatioun duerch den Éischthëllefer wichteg. Den AED ass duerfir eng Ergänzung, awer ni en Ersatz vun der Cardiopulmonaler Reanimatioun.
Am Idealfall gesäit d'Benotzung esou aus: Ob enger Gare fält e Mann schwaach, Passante kréien dat mat. De Mann huet kee Bols, d'Ambulanz gëtt direkt geruff. Bis zum Ukomme verginn 10 Minutten , eng Häerz-Longen-Reanimatioun weist keng Wierkung. Ee Passant ass an der Tëschenzäit an d'Hal vun der Gare gelaf, well hie weess, datt do en ëffentlechen Defi hänkt. Hien hëlt dee vun der Mauer a rennt zum Patient deen do läit. Duerch einfach Piktogrammer erkennt hien, datt hien déi zwou Elektroden ob d'Broscht muss oppechen. Dat mécht hien. Den Defi hëlt en Elektrocardiogramm (EKG], wäert dat eegestänneg aus an decidéiert ob e Schock ka Liewe retten oder net. An dësem Fall seet en: Schock empfohlen a fuerdert eise Passant op, w.e.g Ofstand halen, den Patienten nicht berühren. Dann dréckt de Passant ob dee grousse grénge Knapp, wann den Apparat him dat seet, an den Apparat defibrilléiert eegestänneg. Bei Erfolleg oder Net-Erfolleg gëtt e weider Uweisungen.
Am Idealfall also kann en AED vun all Mënsch benotzt ginn, doduerch datt e just een oder zwee Knäppercher huet an iwwer Sproochuweisung a Piktogrammer den Oflaf erkläert an dem Mënsch d'Decisiounen ofhëlt.
Allerdéngs ass dës Method keen Allheelmëttel. Sou kann eng Defibrillatioun och e fatale Feeler sinn. Wat fir d'Maschinn heiansdo onméiglech ass erauszefannen ob dat de Fall ass oder net. Wat souguer fir en Dokter schwéier ass. Ausserdeem kascht en Apparat hautdesdaags tëscht 1000€ an 3000€.
A Stied wéi München hänken ob 24 vun 90 U-Bunn Statiounen Defibrillatoren. Géigner behaapten datt d'Chance jeemols e Fall ze hu wou e gebraucht géif, ze kleng ass fir souwuel Geld auszeginn.
Zënter 2009 gesäit een och zu Lëtzebuerg ëmmer méi Defibrillatoren an ëffentleche Gebaier.
[änneren] Rechtlech Situatioun
De Règlement grand-ducal vum 19. November 2008[1] regelt de Gebrauch vun automateschen externen Defibrillatoren. Deemno däerf zu Lëtzebuerg jiddereen en Defibrillator vun der Kategorie 1 benotzen.
[änneren] Um Spaweck
| Commons: Defibrillatoren – Biller, Videoen oder Audiodateien |
- European Resuscitation Council
- Portable Defibrillator
- Björn Steiger Stiftung déi mat der Aktioun Kampf dem Herztod sech extrem fir AEDen asetzt.
- MVG - Liewe rette mam Defibrillator
- AED maintenance
