Eess

Vu Wikipedia
Wiesselen op: Navigatioun, sichen
"Zeideg" wäiss Eess um Bak, nieft villen Hautréidungen
Schwaarz Eessen op der Nues

Eng Eess, och nach Mateesser genannt, ass eng krankhaft primär Hautverännerung am Kader vun enger Akne. Duerch eng iwwerméisseg Verhornung vun der Haut oder duerch eng iwwerméisseg Tallek-Produktioun kann de Kanal vun engem Tallekdrüsefollikel verstoppen, wouduerch den Tallek ufänkt sech ze stauen an an den Tissu ronderëm platze kann.

Da kënnt et an der Haut zu enger rouder Plaz oder, wa Bakterien déi op der Haut liewen oder duerch Schmierinfektioun dohikoumen an déi Hautbucht erakommen, enger Entzündung mat Eeter.

Absënns bei "wäissen zouenen Eessen", déi e wäisselzegen Tallek-Horn-Propp hunn deen de Follikelausgank komplett verschléisst, ass sou eng Entzündungsbereetschaft héich. Et gëtt donieft awer och manner empfindlech "schwaarz oppen Eessen", deenen hiren Horn-Lipid-Propp duerch den an den Hornlamellen agelagerten oxidéierte Faarfstoff Melanin donkel gefierft ass, awer de Follikelausgank net komplett verschléisst.

Uersaachen[änneren | Quelltext änneren]

Déi beschriwwene Erhéijung vun der Tallekproduktioun kann op hormonell oder psychesch Faktoren zréckgoen. E fettegen oder ze staark verhornten Hauttyp begënschtegt ebenfalls d'Entstoe vun Eessen.

Eng gutt Prophylax sinn dowéinst eng konsequent Hautrengegung a Peeling.

Behandlung[änneren | Quelltext änneren]

Vill Hautdoktere warnen, et sollt een Eessen net einfach ausdrécken, well doduerch déi ugaangs net onbedingt entzünt Hautréidunge mat Bakterien infizéiert kënne ginn, respektiv Bakterien déi schonn an Propp dra si méi déif an d'Haut eragedréckt ginn, wat en Abszess als Konsequenz kann hunn, dee wann en am Beräich vun der Nues oder den Aen optrëtt souguer zu enger Bluttvergëftung féiere kann.

Déi am Handel ugebuede "Clear-Up-Strips", déi wéi eng Plooschter op d'Haut gepecht ginn a beim Erofzéien d'Proppe léise sollen, sinn ebenfalls net ze recommandéieren. En Test vun der Zäitschrëft Öko-Test aus dem Joer 1999 huet erginn, datt déi meescht net emol sou efficace si wéi en einfache Peeling, an déi deelweis dran enthale Wierkstoffer och net onbedéngt onbedenklech sinn.

Besser dogéint si Preparater mat Adapalen (wat Tretinoin ofléisst) oder Benzoylperoxid, déi fir besonnesch entzündlech Forme souguer mat baussenzegen Antibiotika wéi Erythromycin oder Clindamycin gemëscht sinn.

Et kann een donieft nach Salicylsaier gebrauchen, wat d'Poren opmécht, oder Preperater mat Zénkoxid, déi Ofwier- an Heelungsprozesser un den entzünten Hautstellen aktivéieren.

Am effektivste si meeschtens professionell Behandlungen duerch Dermatologen oder Kosmetiker, woubäi déi verstoppten Tallekdrüsefollikel mat enger Huelnodel opgemaach ginn, sou datt d'Eesse vu kierpereegene Friesszellen ofgebaut kënne ginn.

Etymologie[änneren | Quelltext änneren]

An der Fachsprooch gi Mateesser als Komedo bezeechent (Méizuel Komedones), vum laténgesche "comedere" - iessen, verzieren. Dëst verweist op e bis an d'19. Joerhonnert verbreeten Awerglawen, datt ë. a. dës Hautproblemer op Parasiten oder Diermueden zréckzeféiere wieren, déi sech am Kierper festsaugen a vu Kierpersekrete liewen. Dohier kënnt och d'Riedensaart "engem de Wiermchen zéien".