Europäesche Rechnungshaff
Den Europäesche Rechnungshaff, d'Cour des comptes européenne, kontrolléiert, datt all d'Recetten, déi d'Europäesch Unioun anhëllt, an all d'Dépensen, déi se mécht, op eng legal a korrekt Manéier gemaach gi sinn, an datt de Budget vun der EU gutt géréiert gëtt. E gouf 1977 gegrënnt huet säi Sëtz zu Lëtzebuerg. Ronn 850 Leit schaffen do.
Den Europäesche Rechnungshaff huet 27 Memberen, 1 pro EU-Membersland, déi op 6 Joer, déi verlängert kënne ginn, vum Conseil vun der Europäescher Unioun ernannt ginn. Intern kënnen des sech a 'Chamberen' organiséieren, déi verschidden Zorten Rapporten oder Avisë kënne maachen. D'Membere wielen aus hirer Mëtt e President op 3 Joer. Zënter dem 16. Januar 2008 ass dat de Vítor Manuel da Silva Caldeira.
Lëtzebuergesche Member ass zënter dem Januar 2008 den Henri Grethen.
[änneren] Seng Aufgaben
D'Haaptfonctioun vum Europäeschen Rechnungshaff ass wéi gesot ze kontrolléierern, datt beim EU-Budget alles an der Rei ass.
Dofir kontrolléiert en d'Dokumenter vun allen Organisatiounen, déi Recetten oder Dépensë vun EU-Suë géréieren. Wann néideg, mécht e Kontrollen um Terrain. Seng Conclusiounen ginn a Rapportë publizéiert, déi d'Europäesch Kommissioun an d'Memberstaaten iwwer eventuell Mëssstänn informéieren.
Dee wichtegste Rapport ass dobäi de Joeresrapport iwwert dat ofgelafent Budgets-Joer, deen e fir d'Europäescht Parlament an de Conseil (déi 2 sinn d'Budgets-Autoritéit) ausschafft. D'Commentairen, déi an dësem Rapport stinn, spillen eng wichteg Roll fir d'Parlament fir ze decidéieren, ob et d'Gestioun vum Budget duerch d'Commissioun soll approuvéieren oder net.
Den Europäesche Rechnungshaff gëtt och nach Avisën of, iert d'EU nei Finanzregelen aféiert. E kann och soss zu bestëmmte Punkten an zu jiddwer Moment Commentairën ofginn oder, op Demande vun enger vun den Institutioune vun der Europäescher Unioun hin, säin Avis ginn.
[änneren] Seng Aarbechtsweis
De Rechnungshaff schafft an totaler Onofhängegkeet a ka fräi entscheeden, wéi a wat e kontrolléiert, a wéini an a wat fir enger Form e publik mécht, wat en erausfonnt huet.
En huet eng 550 Mataarbechter, wouvunner der eng 250 Kontrollere sinn, déi sech an "Audit-Gruppen" organiséieren. Dës Kontrollere maachen dacks Inspectiouns-Visitë bei deenen aneren Institutiounen, de Memberslänner an an deene Länner, déi eng finanziell Hëllef vun der EU kréien. D'Commissioun ass zwar responsabel iwwer déi Fongen, mee d'Gestioun dovunner gëtt zu 90 % an deene betraffene Länner gemaach.
De Rechnungshaff ka selwer keng legal Schrëtt aleeden. Wann d'Kontrolleuren eng Fraude oder eng Illegalitéit entdecken, gi se dat sou séier wéi méigleg un déi kompetent europäesch Instanze virun, sou datt déi kënnen déi néideg Mesuren huelen.
[änneren] Gebailechkeeten
2009 gouf decidéiert, d'Mataarbechter aus 5 Gebaier an engem eenzege Gebai ze regruppéieren. Dofir soll d'Haaptgebai mat 21.000 Quadratmeter fir knapps 500 Mataarbechter a fir 79 Milliounen Euro ausgebaut ginn. Am Ganze sinn 3 Joer geplangt, éier d'Personal an déi nei Büroe ka plënneren.[1]
[änneren] Linken
[änneren] Kuckt och
[änneren] Um Spaweck
[änneren] Referenzen
- ↑ "Europäesch Cour des Comptes: Weideren Ausbau néideg." rtl.lu, 07.05.2009, 12:49 - Fir d'lescht aktualiséiert: 07.05.2009, 12:58.
 |
Portal EU – All d'Artikelen op der Wikipedia zu der Europäescher Unioun. |
