Eurovision Song Contest 2005

Vu Wikipedia
Wiesselen op: Navigatioun, sichen
Eurovision Song Contest 2005 Logo.png
50. Eurovision Song Contest
Motto Awakening
Datum 19. Mee an 21. Mee 2005
Stad Kiew (Ukrain)
Gebai Palats Sportu
Gewënner Elena Paparizou (Griicheland)
Zuel vu Länner 39, dovu 24 an der Finall
Nei Participatiounen Bulgarien, Moldawien
Moderatioun Maria Jefrosinina a Pawlo Schilko
Interval Act Ruslana mat "The Same Star"; De Kiew Perkussion Ensemble ARS NOVA; Anatoli Salewski
Ofstëmmungsregelung All Land huet 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn.

De 50. Eurovision Song Contest war den 19. an 21. Mee 2005 an der Ukrain. Organiséiert gouf d'Eurovisioun dat Joer am Sportpalast (Palats Sportu) zu Kiew. Presentateure waren d'Maria Jefrosinina an de Pawlo Schilko. Den ukrainesche President Wiktor Juschtschenko an déi ukrainesch Premierministerin Julija Tymoschenko si bei der Finall perséinlich dobäi gewiescht.

Bulgarien a Moldawien si nei dobäi komm. Lëtzebuerg huet scho wéi déi 11 Joer virdru fräiwëlleg drop verzicht fir matzemaachen. Och Italien an d'Slowakei hu fräiwëlleg net matgemaach. Am Ganzen hunn 39 Länner matgemaach. Dat war déi bis dohi gréissten Zuel u Länner déi matgemaach hunn.

Wéinst der grousser Zuel u Länner déi wollte matmaachen ass och dëst Joer eng Qualifikatiounsronn (Halleffinall) ofgehale ginn. 25 Länner sinn den 19. Mee géinteneen ugetratt. Déi zéng bescht hu sech fir d'Finall den 21. Mee qualifizéiert. Do si se dann op déi 14 Länner getraff déi sech am Joer virdru scho fir d'Finall qualifizéiert haten (dat waren déi Big-4: Frankräich, Däitschland, Groussbritannien, Spuenien an déi 10 bescht aus der Finall vun 2004).

Verschidden Interprete ware scho virdrun emol eng Kéier dobäi, de Constantinos Christoforou fir Zypern 1996 an 2002 (Deel vum Grupp One), d'Elena Paparizou fir Griicheland 2001 (Deel vum Grupp Antique), d'Selma fir Island 1999 an d'Chiara fir Malta 1998.

D'Regel fir d'Ofstëmmung ass d'selwecht bliwwe wéi déi Jore virdrun. Och dëst Joer ass den Televoting duerch d'Spectateure vun alle Länner benotzt gi fir ofzestëmmen. All Land huet duerch d'Ofstëmmung 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op Kiew matgedeelt ginn. D'Länner hunn alleguer, souwuel an der Halleffinall, wéi och an der Finall däerfen ofstëmmen.

Déi éischt Plaz krut d'Vertriederin vu Griicheland, d'Elena Paparizou mat 38 Punkte Virsprong virum Chiara (Malta). Déi drëtt Plaz krut d'Grupp Luminița Anghel & Sistem, déi fir Rumänien ugetruede waren.

Fir Griicheland war et déi éischt Kéier datt et de Grand Prix gewonnen hat.

Plazen an der Halleffinall[änneren | Quelltext änneren]

No der Qualifikatiounsronn sinn nëmmen d'Nimm vun de Länner genannt ginn, déi an d'Finall weider komm sinn. D'Punkteverdeelung ass eréischt no der Finall bekannt gemaach gi fir eng Beaflossung an der Finall ze vermeiden.

Plaz Startnr. Land Interpret Titel Punkten
01. 14 Rumänien Luminița Anghel & Sistem Let Me Try 235
02. 04 Moldawien Zdob și Zdub Bunica bate doba 207
03. 24 Dänemark Jakob Sveistrup Talking to You 185
04. 20 Kroatien Boris Novković feat. Lado members Vukovi umiru sami 169
05. 15 Ungarn NOX Forogj világ 167
06. 13 Norwegen Wig Wam In My Dreams 164
07. 07 Israel Shiri Maymon Hasheket shenish’ar 158
08. 19 Schwäiz Vanilla Ninja Cool Vibes 114
09. 17 Mazedonien Martin Vučić Make My Day 097
10. 05 Lettland Valters & Kaža The War Is Not Over 085
11. 25 Polen Ivan & Delfin Czarna dziewczyna 081
12. 23 Slowenien Omar Naber Stop 069
13. 08 Wäissrussland Anschalika Ahurbasch Love Me Tonight 067
14. 09 Holland Glennis Grace My Impossible Dream 053
14. 22 Irland Donna & Joe Love? 053
16. 10 Island Selma If I Had Your Love 052
17. 03 Portugal 2B Amar 051
18. 16 Finnland Geir Rönning Why 050
19. 21 Bulgarien Kaffe Lorraine 049
20. 12 Estland Suntribe Let’s Get Loud 031
21. 01 Éisträich Global.Kryner Y así 030
22. 11 Belsch Nuno Resende Le grand soir 029
23. 18 Andorra Marian van de Wal La mirada interior 027
24. 06 Monaco Lise Darly Tout de moi 022
25. 02 Litauen Laura & the Lovers Little by Little 017

Déi Länner, déi sech net fir d'Finall qualifizéiert haten, hunn och nees 2006 misse bei der Halleffinall matmaachen.

Plazen an der Finall[änneren | Quelltext änneren]

Plaz Startnr. Land Interpret Titel Punkten
01. 19 Griicheland Elena Paparizou My Number One 230
02. 03 Malta Chiara Angel 192
03. 04 Rumänien Luminița Anghel & Sistem Let Me Try 158
04. 11 Israel Shiri Maymon Hasheket shenish’ar 154
05. 23 Lettland Valters & Kaža The War Is Not Over 153
06. 07 Moldawien Zdob și Zdub Bunica bate doba 148
07. 12 Serbien-Montenegro No Name Zauvijek moja 137
08. 22 Schwäiz Vanilla Ninja Cool Vibes 128
09. 05 Norwegen Wig Wam In My Dreams 125
09. 13 Dänemark Jakob Sveistrup Talking to You 125
11. 18 Kroatien Boris Novković feat. Lado members Vukovi umiru sami 115
12. 01 Ungarn NOX Forogj világ 097
13. 06 Tierkei Gülseren Rimi rimi ley 092
14. 21 Bosnien-Herzegowina Feminnem Call Me 079
15. 20 Russland Natalja Podolskaja Nobody Hurt No One 057
16. 08 Albanien Ledina Çelo Tomorrow I Go 053
17. 15 Mazedonien Martin Vučić Make My Day 052
18. 09 Zypern Constantinos Christoforou Ela ela 046
19. 14 Schweden Martin Stenmarck Las Vegas 030
19. 16 Ukrain Greenjolly Razom nas bahato 030
21. 10 Spuenien Son de Sol Brujería 028
22. 02 Groussbritannien Javine Touch My Fire 018
23. 24 Frankräich Ortal Chacun pense à soi 011
24. 17 Däitschland Gracia Run & Hide 04

De Gewënner an déi gréng markéiert Länner waren am Joer drop (2006) automatesch fir d'Finall qualifizéiert. Well Serbien-Montenegro sech zréckgezunn hunn ass Kroatien nogeréckelt.

Um Spaweck[änneren | Quelltext änneren]

Commons: Eurovision Song Contest 2005 – Biller, Videoen oder Audiodateien
Istanbul (Tierkei) Esc-wäiss1.png Athen (Griicheland)
ESC 2004 Eurovision Song Contest ESC 2006