Francis Baily
.jpg)
De Francis Baily, gebuer den 28. Abrëll 1774 zu Newbury, Berkshire a gestuerwen den 30. August 1844 zu London war en engleschen Astronom. Hien hue sech besonnesch mat Stärekataloge beschäftegt a vill Aarbechten dozou erausginn.
Hien huet och dat Phenomen vun de Baily Pärelen (engl.: Bailys Beads oder "Pärelschnouerphenomen") beschriwwen a war spéider President vun der Royal Astronomical Society.
Liewen a Wierken[änneren]
De Baily huet ufanks eng geschäftlech Lafbunn ageschloen. No senger Ausbildung huet hien 1796/97 déi nach onbesidelt Gebidder vun Nordamerika besicht. No senger Heemrees huet hie sech ab 1799 un der Londoner Bourse (London Stock Exchange) betätegt. An de Joren 1802 bis 1810 huet hien etlech Publikatiounen zu Pachtverträg, Renten a Versécherungen verfaasst, déi him e grousst Prestige an e geséchert Akommen verschaaft hunn. 1825 huet hie sech aus dem Finanzwiesen zréck gezu fir sech ganz der Astronomie hinzeginn.
De Baily hat schonns 1820 bei der Grënnung vun der Royal Astronomical Society entscheedend matgewierkt. 1827 krut hien d'Goldmedail vun der Royal Astronomical Society fir seng Matwierkung bei der Editioun vun engem Katalog mat 2881 Stäre (Catalogue of 2881 Stars).
Op seng Initiativ geet d'Iwweraarbechtung vum Nautical Almanac am Joer 1829 zréck. 1837 huet hien d'Iwweraarbechtung an d'Zesummefaassung vun de Stärekataloge vum Jérôme Lalande an dem Nicolas Louis de Lacaille ugereegt, déi zesumme 57.000 Stäre agedroen haten.
Et entstoung den British Association's Catalogue of 8377 Stars, deen 1845 publizéiert gouf. Doriwwer eraus huet hien déi eelste Kataloge an Opzeechnungen vum Ptolemäus, Ulugh Beg, Tobias Mayer, Tycho Brahe, Edmond Halley an dem Hevelius iwwerschafft.
Während der Sonnendäischtert vum 15. Mee 1836 huet hie vun Roxburghshire aus e Phenomen observéiert, dat haut als "Baily Pärelen" oder Pärelschnouerphenomen bezeechent gëtt. Bewierkt gëtt et duerch d'Bierger vum Äerdmoundrand, wouduerch kuerz vir a no der totaler Phas "Liichtpärelen" gesi ginn. Seng liefhaft Beschreiwung doriwwer war den Ausléiser vun der Ausbreedung vun „Sonnendäischtertexpeditiounen“ duerch d'ganz Welt. De Baily selwer huet nach déi total Sonnendäischtert vum 8. Juli 1842 vu Pavia aus observéiert.
Hie huet dem Henry Foster säi Pendel-Experiment fir d'Bestëmmung vun der Äerdofplattung fäerdeg gestallt, déi hien zu 1/289,48 bestëmmt hat. Seng Aarbechten zu der Bestëmmung vun der mëttlerer Dicht vun der Äerd no der Method vum Henry Cavendish haten e Wäert vun 5,66 g/cm³ erginn.
Fir seng Aarbechten krut de Baily 1827 an 1843 he eng Goldmedail vun der Royal Astronomical Society.
Wierker[änneren]
- The Catalogues of Ptolemy, Ulug Begh, Tycho Brahe, Halley, Hevelius, deduced from the best Authorities. London (1843)
- Catalogue of stars of the British Association for the advancement of science. London (1846)
