Franséisch Kantonen

Vu Wikipedia
Wiesselen op: Navigatioun, sichen

A Frankräich ass e Kanton (franséisch: canton) eng Ënnerglidderung vun engem Departement ënner dem Arrondissement.

A ländleche Gebidder besteet e Kanton aus ville Gemengen (franséisch: communes), während déi grouss Stied selwer an Kantonen agedeelt sinn. Am Total gëtt et a Frankräich 4039 Kantonen (Stand: 2004).

Walgebitt[änneren | Quelltext änneren]

Déi wichtegst Funktioun vun de Kantonen ass haut déijéineg als Walgebitt oder Bezierk fir d'Wal vu Generolréit vun den Departementer. Am Kader vun de Kantonalwalen gëtt an all Kanton e Generolrot (franséisch: conseiller général) gewielt. D'Generolréit vun alle Kantone vun engem Département maachen zesummen de Generolrot (franséisch: conseil général) – d'„Parlament“ – vum Departement. Opgrond vun hirer Funktioun als Walgebitt ginn d'Kantonen dacks nei zougeschnidden, fir se un eng verännert Awunnerverdeelung unzepassen.

Verwaltungseenheet[änneren | Quelltext änneren]

Administrativt System vu Frankräich

Donieft ass de Kanton eng territorial Ënnerdeelung vun der Staatsverwaltung am Kader vun der Dekonzentratioun vu Zentralverwaltungen, souwéi dacks och eng territorial Ënnerdeelung vun der dezentraliséierter Verwaltung vu Gebittskierperschaften am Departement. Eegeverwaltungseenheete wéi d'franséisch Regiounen, d'Departementer an d'Gemengen, sinn d'Kantonen awer net.

D'Haaptuertschaft vun engem Kanton ass meeschtens och Sëtz vun ënneschte Staats- oder Departementsplazen. An all ländlechem Kanton ass op d'mannst eng Gendarmeriesbrigad stationéiert.