Henri Dunant

Vu Wikipedia
Wiesselen op: Navigatioun, sichen
Den Henri Dunant

Den Henri Dunant, gebuer den 8. Mee 1828 zu Genf a gestuerwen den 30. Oktober 1910 zu Heiden (Kanton Apenzell) war e Schwäizer Philantrop a Grënner vum Roude Kräiz.

Op enger Geschäftsrees an der Provënz Mantua gouf den Dunant 1859 bei der Klengstad Solferino Zeie vun der Schluecht tëscht den Truppe vu Piemont-Sardinien a Frankräich op där enger Säit, an op där anerer der éisträichescher Arméi. Ausser de 6.000 Doudeger waren nach eng 40.000 Leit blesséiert ginn, déi ouni iergend eng Hëllef um Schluechtfeld leiebliwwe sinn.

Zudéifst beréiert vun dem Erlieften huet den Henri Dunant Un Souvenir de Solférino (1862) verfaasst an d'Grënnung vum Roude Kräiz ugereegt (1863).

Op Grond vu senge Beméiungen ass eng international Konferenz organiséiert ginn, déi 1864 d'Genfer Konventioun ugeholl huet, an där sech déi bedeelegt Staate verflicht hunn, bei Kricher bestëmmt Grondregele vun der Mënschlechkeet ze respektéieren.

Schonn an deenen éischt Kricher duerno an Europa an a Nordamerika hu sech déi fräiwëlleg Leit vum Roude Kräiz bei der neutraler Betréiung vun de Verwondten an de Krichsgefaangenen bewährt. Den Dunant huet jorelaang op ville Reese fir d'Ënnerstetzung vun der Iddi vum Roude Kräiz Reklamm ge maach.

1901 huet den Henri Dunant de Friddensnobelpräis kritt.

Fir un den Henri Dunant z'erënneren sinn zu Lëtzebuerg eng Rei Stroossen no him benannt: zu Bartreng, Déifferdeng, Diddeleng, Esch-Uelzecht, an der Stad an zu Stroossen.

Commons: Henri Dunant – Biller, Videoen oder Audiodateien