Instituto Nacional de Técnica Aeroespacial
D'Instituto Nacional de Técnica Aeroespacial (kuerz INTA, op lëtzebuergesch: Nationaalt Institut fir Loft- a Raumfaarttechnik) ass déi spuenesch Weltraumorganisatioun. Si ënnersteet dem spuenesche Verdeedegungsministerium, ass awer souwuel fir déi zivil wéi och militäresch Fuerschung an Entwécklung an der Loftfaart zoustänneg. INTA gouf 1942 gegrënnt an huet den Haaptsëtz zu Torrejón de Ardoz, no bei Madrid.
Niewent Fuerschung ass INTA och fir d'Zertifizéierung an Erprouwung vu Materialie, Komponente an Systeme vun der Loft- a Raumfaarttechnik zoustänneg. INTA beschäftegt 1.200 Mataarbechter, d'Budget beleeft sech op ronn 100 Milliounen Euro a staamt aus ëffentlechen Gelder wéi och aus Akommen aus der Industrie.
INTA ass zu 100% Besëtzer vum Raumfaarttechnikkonzern INSA an hält Undeeler vun Hispasat (16,4%), Hisdesat (37,6%) an XTAR (16,3%).
Inhaltsverzeechnes |
Projeten [änneren]
Den INTA hat den éischte Satellit ënnert dem Numm INTASAT entwéckelt an am Joer 1974 vun der Vandenberg Air Force Base mat enger Delta-Drorakéit gestart.
De Minisat 01 gouf den 21. Abrëll 1997 vum Loftwaffestëtzpunk Gran Canaria (Fluchhafe Gran Canaria) aus gestart an ass den éischte Satellit deen a Spuenien hiergestallt gouf. An den éischte véier Joer ass hien 21.000 mol ëm d'Äerd geflunn an hat dobäi ronn 700 Mio. Kilometer zréckgeluecht.
Den 200 Kilogramm schwéiere Minisat ass ongeféier esou grouss wéi eng Kleederkammoud a villfälteg asetzbar. Nodeems de Satellit 2001 nach voll asazfäeg war, gouf seng Missioun ëm weider zwee Joer verlängert.
D'Héichtefuerschungsrakéit INTA-255 gouf dräimol tëschent 1969 an 1970 vun der Startplaz El Arenosillo aus gestart, d'INTA-300 sechsmol tëschent 1974 an 1994.
Ënnert der Kuerzbezeechnung SIVA hat d'INTA en onbemannt Loftschëff gebaut. Véier SIVA goufen 2006 fir Testzwecker der spuenescher Arméi iwwerginn.
De 6. November 2008 hat de spuenesche Verdeedegungsministère e Vertrag fir d'Hierstellung vun zwéi mat optesche Kameraen a Radar geeegent Opkläerungssatellite ënnerschriwwen, déi den Numm Paz an Ingenio droe sollten. D'Käschte vum Projet hu sech op 160 Milliounen € belaf, d'Satellite sinn vun EADS-CASA produzéiert a vun Hisdesat an Zesummenaarbechtt mat der INTA betriwwe ginn.[1]
Standplazen [änneren]
- Centro de Experimentación de El Arenosillo Testgelänn a Fuerschungszentrum vun der Loft- a Raumfaarttechnik.
- Madrid Deep Space Communications Complex: Radioteleskop-Anlag vum Deep Space Network fir Nofolleg vun de Raumsonden.
Kuckt och [änneren]
Um Spaweck [änneren]
| Commons: Instituto Nacional de Técnica Aeroespacial – Biller, Videoen oder Audiodateien |
Referenzen [änneren]
- ↑ Spanisches Verteidigungsministerium, 6. November 2008.
