Kaplan-Turbin
D' Kaplan-Turbin ass eng Turbin fir Stroum ze produzéieren. Si gouf 1913 vum éisträicheschen Ingenieur Viktor Kaplan entwéckelt.
Dës Turbin ass besonnesch efficace bei Stauwierker op Flëss déi vill Waasser féieren a wou d'Gefäll net brauch héich ze sinn, (tëscht 10 an 30 Meter, geet schonns duer fir e gudde Rendement ze hunn).
Vertikal agebaute Kaplan-Turbinne gi bei Kraaftwierker op Flëss bis Falhéichte vu 6,5 Meter agesat. D'Lafrad vun esou enger Turbin gläicht enger Schëffsschrauf. D'Schaute vun der Turbin si verstellbar a kënnen durch Servostéierung verstallt ginn, an esou der Quantitéit an dem Drock vum Waasser ugepasst ginn, fir ëmmer e maximale Rendement ze hunn.
Am Agank vun der Turbin ass e Leetwierk dat och verstellbar Lamellen huet. Dëst hëlleft datt d'Waasser ëmmer parallel zur Turbinnenachs op d'Schauten trëfft.
Kaplan-Turbinne gi mat dräi bis sechs Lafradschaute gebaut. Grouss Kaplan-Turbinne gi meeschtens vertikal agebaut, sou datt d'Waasser vun uewen no ënnen derduerch leeft.
Kaplan-Turbinnen dréine mat 50 bis 250 Tier an der Minutt an hunn e Wirkungsgrad bis zu 95%.
| Commons: Kaplan-Turbines – Biller, Videoen oder Audiodateien |
