Kommunismus

Vu Wikipedia
Wiesselen op: Navigatioun, sichen

Kommunismus ass eng ökonomesch a sozial Theorie vun enger Gesellschaft ouni Klassen, an där jiddwereen d'selwecht fir seng Aarbecht entlount gëtt an an där d'Mënschen hir Talenter zum Wuel vun der Allgemengheet asetze sollen. Et soll also eng sozial Gläichstellung vun alle Mënschen erreecht ginn, andeems jiddwereen no senge Méiglechkeeten e wirtschaftleche Bäitrag leescht, deen dann ënner der Bevëlkerung no den eenzelnen Noutwennegkeete verdeelt gëtt. Dëst ass eng Utopie, déi wéinst der Schwächt vun de Mënschen net als Politik an d'Praxis ëmgesat ka ginn. An deem Kontext ass och ze bemierken, datt et an all de sougenannte kommunistesche Staaten wéi z. B. Kuba ni d'kommunistech Theorie gouf, mä just eng extrem Form vu Sozialismus, déi déi éischt Etapp a Richtung Kommunismus duerstellt.

Sozialkritik a kommunistesch Experimenter gouf et schonn an der Antikitéit an am Mëttelalter, mä eréischt d'Opklärung an de revolutionäre Geescht Enn des 18. an am 19. Joerhonnert huet eng ganz Rëtsch vu gréissere politeschen Antikapitalismusmouvementer ervirbruecht. Besonnesch ervirzehiewe sinn do dem Karl Marx a Friedrich Engels hiert Kommunistescht Manifest, dat den 21. Februar 1848 zu London verëfffentlecht gouf, an dem Marx säi Kapital vun 1867. Déi Wierker enthalen eng Etüd vun den deemolege Liewensverhältnesser a vum Kapitalismus a schléisse mat der Fuerderung, de Kapitalismus ofzeschafen, an duerch nei kommunistesch Liewensverhältnesser z'ersetzen, fir sou alle Klassekämpf en Enn ze setzen.

Op där Basis hu sech eng ganz Rei Couranten entwéckelt, dorënner de Marxismus, de Leninismus, de Luxemburgismus, de Stalinismus, de Trotzkismus, den Titoismus (deen den 3. Wee, also e Wee tëscht dem Kommunismus an dem Kapitalismus probeiert huet, auszebauen), de Maoismus etc. Mat der russescher Oktoberrevolutioun 1917 an der Schafung vun der Sowjetunioun koum et dann och zum éischte sougenannte kommunistesche Staat, deem China, Nordkorea, Vietnam, Angola a Kuba nokomme sollten.

Spéitstens mat der Opléisung vun der Sowjetunioun 1991 wéinst onauswäichleche wirtschaftleche Problemer huet sech déi praktesch Ëmsetzbarkeet vum Kommunismus awer als bis zu der Zeit onemsetzbar erwisen.

Kuckt och[änneren | Quelltext änneren]

Commons: Communism – Biller, Videoen oder Audiodateien