Kreationismus

Erschafe vum Eva. Fresco vum Michelangelo, 1509, Sixtinesch Kapell, Roum

Kreationismus ass eng Theorie, déi haaptsächlech vu fundamentalistesch protestantesche Chrëschten gedroe gëtt, an déi dorop baséiert, datt alles, wat an der Bibel steet, Wuert fir Wuert esou geschitt ass.

Entstéiung a Verbreedung

D'Theorie vum Kreationismus ass fir d'éischte Kéier um Ufank vum 20. Joerhonnert an den USA opgetaucht. E feste Grënner vum Kreationismus steet net fest.

Dës Doktrin huet sech am Laf vun engem Joerhonnert zimlech rapid ausgebreet. Enger Statistik no war 2006 bal een Drëttel vun den US-Amerikaner vun dëser Theorie iwwerzeegt.

Virstellunge vum Kreationismus

D'Kreationiste dementéieren wëssenschaftlech Entdeckunge wéi d'Evolutiounstheorië vum Charles Darwin a Jean-Baptiste de Lamarck. Se mësche sech dommadder an e wëssenschaftleche Fachberäich an, ginn awer keng Daten a Fakten un, déi hir Theorie ënnerstëtze géifen, wat awer indispensabel fir d'Wëssenschaft ass. Wéinst dem Mangel vun Informatioune gëtt de Kreationismus als eng Pseudewëssenschaft bezeechent. Donieft vertriede si d'Meenung, d'Äerd wier net méi wéi 6.000 bis 12.000 Joer al.

Zum Thema Dinosaurier soen si, si hätten d'Äerd zur gläicher Zäit wéi d'Mënsche bevölkert. D'Fossilien, déi vun den Archeologe fonnt goufen, wieren also circa 10.000 Joer al, wëssenschaftlech Methode beweisen allerdéngs, datt si eendeitig vill méi al kënne sinn.

Duerch dës Virstellungen kënnt et dacks zu Onstëmmegkeete mat renomméierte Wëssenschaftler.

Aus dem Kreationismus ass spéider am 20. Joerhonnert eng weider, ähnlech Doktrin opgetaucht, den Intelligent Design, deen sech och virun allem mat der Entsteehung vun der Äerd an der Evolutioun beschäftegt.

Kuckt och

• Evolutioun
• Intelligent Design
• Spaghettimonster, dat flitt

Um Spaweck

• En Internetsite, dee d'Behaaptunge an d'Fuerderunge vun de Kreationisten oplëscht a wëssenschaftlech widderleet (en)

Commons: Kreationismus – Biller, Videoen oder Audiodateien