Palette vum Narmer

Vu Wikipedia
Wiesselen op: Navigatioun, sichen
D'Narmerpalette

D'Palette vum Narmer ass e wichtegen archeologesche Fong aus der Zäit vun 3100 bis 3000 v. Chr., mat e puer vun deenen alleréischten hieroglypheschen Inskriptiounen iwwerhaapt.

De briteschen Archeolog James E. Quibell huet d'Palette 1898 bäi Ausgruewungen zu Hierakonpolis, der virdynastescher Haaptstad vun Ueweregypten, nach vëlleg intakt fonnt. Haut kann een d'Palette am Egyptesche Musée vu Kairo bewonneren.

Et handelt sech ëm eng rituell Schminkpalett vum egyptesche Kinnek Narmer, mat op zwou Säite Biller, déi d'Victoire vum Süden (Ueweregypten) iwwer den Norden (Ënneregypten) duerstelle sollen.

Um Verso: E Fallek, den Horus, representéiert de Süden, deen op Papyrus, engem Symbol fir den Norden, steet, an deen eng Landmass mat Mënschekapp un engem Seel hält, wat d'Gefaangenschaft vum Norde bedeit. Ganz grouss gesäit een de Kinnek, mat der wäisser Kroun vun Ueweregypten, deen e Knëppel iwwer engem Prisonéier schwéngt an iwwer zwee aner Prisonéier steet, déi den niddergeschloene Feind symboliséiere sollen. Hanner dem Kinnek gesäit een en Dinger, deen seng Sandale dréit. Ganz uewen vun der Palette, tëscht Biller vun der Kougëttin Hathor, fënnt een den Numm vum Kinnek, zesummegesat aus den Hieroglyphen nar (e Fësch) an mr (chisel).

Um Recto si ganz uewen erëm zweemol d'Hathor mat dotëscht dem Numm vum Narmer. Drënner ass den Narmer selwer, dës Kéier mat der rouder Kroun vun Ënneregypten. Hanner him ass en Dénger mat senge Sandelen, a virun him fënnef Leit, véier dovu mat enger Standart, an nach virdrun zéng Feinden ouni Kapp. Do drënner, an der Mëtt vun der Palette, sinn zwéi Panther mat Schlaangenhäls, déi anenee verschlonge sinn: et kann een Uewer- an Ënneregypten net méi trennen. An der Mëtt ass eng ronn Ausbuchtung fir d'Schmink, déi gläichzäiteg och d'Sonnescheif symboliséiere soll. Ganz ënne gesäit een de Kinnek a Form vun engem Stéier, deen eng Stad op d'Haren hëlt an e Feind zertrëppelt.

Links[änneren | Quelltext änneren]

Eye of Ra2.svg Portal Egyptopedia – All d'Artikelen op der Wikipedia iwwer dat aalt Egypten.

Um Spaweck[änneren | Quelltext änneren]

Commons: Palette vum Narmer – Biller, Videoen oder Audiodateien