Pioneer-Programm
Ënnert dem Numm Pioneer (Pionéier) sinn 19 verschidde Raumsonden vun der NASA zesummegefaasst, déi tëschent 1958 am 1978 fir d'Erfuerschung vun Äerdmound, der Sonn, de Planéite Jupiter, Saturn an der Venus gestart goufen.
Inhaltsverzeechnes |
Missioun [änneren]
D'Pionéier-Missioune stoungen all ënnert dem Motto „Grondlagefuerschung“. D'Wëssenschaft stoung am Ufank un zweeter Plaz, méi wichteg war d'Erpruewung vun der Technik, well d'Raumfaart am Joer 1958 nach an de Kannerschung stoung.
Pioneer 0 bis 4 an A bis D haten de Mound zum Zil, Pioneer 5 war en interplanetareschen Testfluch, "Pioneer" 6-9 an E hunn der Erfuerschung vun der Sonn gedéngt, Pioneer 10 an 11 ware bestëmmt fir dat baussescht Sonnesystem (zu de Riseplanéite Jupiter a Saturn), Pioneer-Venus 1 an 2 sinn zum Planéit Venus geflunn. Fir déi lescht véier Sonden vum Pioneer-Programm gëtt et eegen Artikelen:
Verlaf [änneren]
Den Ufank hat d'US-Loftwaff gemaach: Si hat dräi 38 kg schwéier Sonde konstruéiert. Zil war e Laanschtfléie beim Äerdmound. All Sonde ware schonns mat optesche Systemer ausgerüst.
- Pioneer 0 ass mat der Thor-Able-Rakéit no 77 Sekonnen de 17. August 1958 explodéiert.
- Pioneer 1 ass den 11. Oktober 1958 gestart, erreecht duerch e fréizäitegt Ofschalte vun der zweeter Stuf vun der Thor-Able nëmmen eng Héicht vun 113.854 km (ca. een Drëttel vun der Distanz Äerd-Mound) a verglitt no 43 Stonne Fluch an der Äerdatmosphär.
- Pioneer 2, hei verseet déi drëtt Stuf vun der Thor-Able-Trägerrakéit den 8. November 1958. Si erreecht eng Distanz vun 1500 km a verglitt dann an der Äerdatmosphär.
Duerno war d'US-Arméi un der Rei. Zu de bedeelegte Wëssenschaftler hat och de Wernher von Braun gezielt. Déi béid Sonden, déi ënnert senger Opsicht konstruéiert goufen, haten e Gewiicht vun nëmme sechs Kilogramm an hunn als wëssenschaftlecht Experiment e Stralendetektor gedroen.
- Pioneer 3, opgrond vun engem fréizäitegen Ofschalten erreecht déi éischt Stuf vun der Juno-II-Trägerrakéit de 6. Dezember 1958 nëmmen eng Héicht vun 102.230 km a verglitt, ähnlech wéi Pioneer 1, no 38 Stonne Fluch an der Äerdrdatmosphär.
- Mat dem Start vun der Pioneer 4 op enger Juno-II-Rakéit ass der USA de 4. Mäerz 1959 den entscheedenden Duerchbroch gelongen: De Mound gouf an 60.000 km Ofstand passéiert. D'Sond huet duerno de Wierkungsberäich vun der Äerdschwéierkraaft verlooss. Et war déi éischt US-amerikanesch Raumsond, déi an den interplanetaresche Raum gestouss ass. Trotzdeem waren d'USA ze spéit: Lunik 1 hat déi gläich Missioun schonns de 4. Januar 1959 gemaach, also zwéi Méint méi fréi duerchgefouert.
Fir mat der Sowjetunioun gläichzezéien, huet déi nei Weltraumbehörde NASA am Joer 1959 de Start vu véier Moundorbiter virbereet. Dës Grupp vu véier war en eenzege Feelschlag a gouf an der Ëffentlechkeet geheim gehalen. Dofir och déi widderspréchlech Bezeechnungen.
- Pioneer A, och Pioneer P-1, (gëtt och dacks guer net opgefouert!) ass de 24. September 1959 mat enger Atlas-Able-Rakéit bei Tester virum Start explodéiert.
- Pioneer B, och Pioneer P-3, gouf de 26. November 1959 45 Sekonnen no dem Start duerch d'Versoe vun der Notzlaschtverkleedung vun der Atlas-Able-Rakéit zerstéiert.
- Pioneer C, och Pioneer P-30, explodéiert mat der Atlas-Able-Trägerrakéit de 25. September 1960.
- Pioneer D, och Pioneer P-31, explodéiert zesumme mat der Atlas-Able-Rakéit de 15. Dezember 1960.
Am Joer 1960 test d'NASA och e Prototyp fir eng interplanetaresch Raumsond. Obschonns heifir nëmmen een eenzegt - 43 kg schwéiert - Exemplar disponibel war, hat hei alles geklappt:
- Pioneer 5 ass den 11. Mäerz 1960 mat enger Thor-Able-Rakéit gestart. De Kontakt konnt regelméisseg bis den 30. Abrëll 1960 gehale ginn, duerno goufen nëmmen nach onregelméisseg Signaler erhale bis de 24. Juni 1960.
Duerno gouf et am Kontext mat de Ranger-Moundsonden an dem Mariner-Programm (Venus a Mars) eng Paus bei de „Pioneers“. Eréischt am Joer 1965 goufen nei Sonde gebaut. Dobäi gouf den interplanetaresche Raum zum Zil, an deem e Sonden-Netzwierk fir d'Sonnefuerschung opgebaut sollt ginn.
- Pioneer 6 start de 16. Dezember 1965 mat enger Delta-Rakéit.
- Pioneer 7 start de 17. August 1966 mat enger Delta-Rakéit.
- Pioneer 8 start den 13. Dezember 1967 mat enger Delta-Rakéit.
- Pioneer 9 start den 8. Dezember 1968 mat enger Delta-Rakéit
- Pioneer E start de 27. August 1969, d´Delta-Rakéit explodéiert awer kuerz nom Start, an d'Sond gouf zerstéiert.
Déi aner Sonden hunn zefriddestellend geschafft. D'Experimenter hu Miessunge vu Stëbsdeelercher, verschidde Stralen a Magnéitfelder gemaach. D'Sond Pioneer 7 gouf 1986 och fir Observatioune vum Halleysche Koméit aus 12 Millioune Kilometer Distanz agesat.
Den 18. Mee 1983 huet d'NASA de Kontakt zu Pioneer 9 verluer. Déi aner dräi Sonde schafften nach bis Mëtt vun de 1990er Joer. De Kontakt zu Pioneer 7 ass den 31. Mäerz 1995 ofgebrach an den 22. August 1996 zu Pioneer 8. Och zu Pioneer 6 war no 1995 d'Kommunikatioun deelweis ënnerbrach. E leschte Kontakt zu Pioneer 6 gouf den 8. Dezember 2000 agefaang - 35 Joer no dem Start. Dëst stellt een absolute Rekord a puncto Liewensdauer duer.
Kuckt och [änneren]
Um Spaweck [änneren]
| Commons: Pioneer program – Biller, Videoen oder Audiodateien |
