Regionalexpress

Vu Wikipedia
Wiesselen op: Navigatioun, sichen

Als Regionalexpress, oder kuerz RE bezeechent een zu Lëtzebuerg an am däitschsproochege Raum eng Kategorie vun Zich déi tëscht de Regioune vun engem Reseau zirkuléieren. Regionalexpressen halen net sou dacks stall wéi Regionalbunnen an hu méi eng héich Duerchschnëttsvitesse.

Baussent vu Lëtzebuerg ennerscheet sech de Regionalexpress och nach vun der Regionalbunn duerch e besseren Confort a méi deier Präisser.

Regionalexpressen zu Lëtzebuerg[änneren | Quelltext änneren]

Zu Lëtzebuerg ënnerscheede sech Regionalexpresser vun de Regionalbunnen eleng duerch d'Zuel vun Halten. Soubal en Zuch op sengem Parcours och nëmmen eng méiglech Halt net ufiert, schwätzt ee vun engem Regionalexpress. A Punkto Material gëtt et keen Ënnerscheed tëscht Regionalbunnen an Regionalexpressen, well se allebéid Deel vum selwechte Roulement bei den CFL sinn.

Präislech besteet keng Differenz bei deenen zwou Kategorien, well se allebéid an den Noverkéiersberäich falen a keen RE e Lafwee vu méi wéi 2 Stonnen huet.

Ausser op de Verbindungen iwwer d'Grenz eraus, a Richtung Arel, Nanzeg an Tréier fueren um Weekend zu Lëtzebuerg keng Regionalexpressen.

Regionalbunnen an der Belsch[änneren | Quelltext änneren]

D'SNCB kennt d'Kategorie vum Regionalexpress als solech net, mä si assuréiert där Zich ënner der Bezeechnung L Zuch. Eng kloer Ofgrennzung zur Regionalbunn besteet net, wat ënner anerem un de laange Lafweeër vun den L-Zich läit, déi ganz ënnerschiddlech Haltfrequenze kënnen hunn.

Als eenzeg Ausnam kann een do d'Regionalexpressen ernimmen déi vun der SNCB op der CFL-Linn 50 tëscht Arel a Lëtzebuerg gefuer ginn.

Regionalexpressen an Däitschland[änneren | Quelltext änneren]

Eng Maschinn vun der Serie 101 mat um Krop engem München-Nürnberg-Express

An Däitschland ass de Regionalexpress méi wäit verbreet wéi an anere Länner, well den Op- an Ausbau vun engem InterCityreseau fir Vitessen iwwer 160 km/h am Oste vun Däitschland, wéinst dem schlechten Zoustand vun de Gleisanlagen, bis haut undauert. Dowéinst komme Regionalexpresse mat Héchstvitessen ënner 160 km/h an den Asatz, déi deelweis Lafweeër vun iwwer 400 Kilometer hunn. D'Material fir d'Regionalexpressen ass an der Regel méi modern a fir méi héich Vitessen ausgeluecht wéi dat bei de Regionalbunnen de Fall ass.

D'Wuert RegionalExpress ass an der besonnescher Schreifweis eng Mark vun der DB, déi nëmme fir hir Zich benotzt gëtt. Dat ass souwäit intressant, well am Kader vun der Privatiséierung vum Schinneverkéier an den 90er Jore vill Regionalexpresser vun der fréierer Däitscher Bundesbahn u regional Betriber iwwergaange sinn an haut ënner eegenen Nimm fueren.

Beispiller:

  • Vogtland-Express
  • Harz-Berlin-Express
  • Lausitz-Express

Op der Héichvitessestreck München - Nürnberg fueren och Regionalexpresse mat enger Vitesse vu bis zu 200 km/h.

Regionalexpressen a Frankräich[änneren | Quelltext änneren]

Corail-Steierwon um Kapp vun engem TER200-Regionalexpress mat Destinatioun Basel

Regionalexpresse gi bei der SNCF an der Spart vum TER gefuer a sinn dowéinst an der Kompetenz vun de jeeweilege Regiounen.

Bei der TER Alsace gëtt et Regionalexpresse mat enger Héchstvitesse vun 200 km/h.