Robert Schuman

Vu Wikipedia
Wiesselen op: Navigatioun, sichen

Dësen Artikel ass iwwer de Politiker Schuman. Fir de Komponist, kuckt Robert Schumann (mat zwéin "N")


Robert Schuman bei der Iwwerreechung vum Karlspreis 1958

De Robert Schuman, gebuer den 29. Juni 1886 am Faubourg Clausen an der Stad Lëtzebuerg, a gestuerwen de 4. September 1963 zu Scy-Chazelles bei Metz, war e franséische Politiker.

Als franséischen Ausseminister huet de Schuman d'Grënnung vun der CECA, der éischter Europäescher Communautéit, an d'Weeër geleet (kuckt: Schuman-Deklaratioun). Spéider war de Schuman President vum Europäesche Parlament. Hie gëllt, mam Jean Monnet, als ee vun de Grënnungspäpp vun der Europäescher Unioun.

Liewenslaf[änneren | Quelltext änneren]

Den 29. Juni 1886 kënnt a Clausen de Jean-Baptiste Nicolas Robert Schuman, Jong vum Jean-Pierre Schuman, engem Loutrenger vun Évrange, direkt hanner Fréiseng, a senger Fra Eugenie Duren (1864-1911), enger gebierteger Beetebuergerin, op d'Welt. Well Loutrengen déizäit däitsch war hat de Robert Schuman och bis nom Éischte Weltkrich déi däitsch Nationalitéit.

Vun 1896 - 1903 war hie Schüler am Kolléisch an der Stad Lëtzebuerg; seng Première mécht en um "Kaiserlichen Gymnasium" zu Metz, dat deemools däitsch war.

1904 fänkt en e Studium op der Uni Bonn un, an deene nächste Jore studéiert hien Droit zu München, Berlin a Stroossbuerg. 1908 mecht hien den éischte Staatsexamen an e Stage (Referendariat) zu Metz. 1910 kritt hien d'Promotioun als Dokter jur. "summa cum laude".

1911 stierft seng Mamm an de Schuman spillt mam Gedanken, Paschtouer ze ginn. Mä et kënnt ganz anescht, 1912 mécht hien den zweete Staatsexamen a gëtt Affekot zu Metz.

1913 ass de Schuman President vun der Organisatioun vum Däitsche Katholikekongress zu Metz.

1914 - 1918 schafft en zu Boulay an der Sous-préfecture a gëtt 1918 Member vum Metzer Gemengerot.

Nodeem d'Elsass a Loutrengen 1919 erëm franséisch goufen, kritt en d'franséisch Nationalitéit an ass vu 1919 bis zu senger Verhaftung 1940 Deputéierte fir d'Union Republicaine Lorraine an der Assemblée Nationale, dem franséische Parlament.

1928 - 1936 ass de Schuman President vun der parlamentarescher Kommissioun 'Alsace-Lorraine', zäitweileg och Vizepresident vun der Assemblée Nationale.

1940 - 1942 sëtzt hien zu Metz an zu Neustadt an der Weinstraße am Prisong, mä ka vun do fortlafen.

Nom Krich 1945 ass hien op e Neits Deputéierten am franséische Parlament, als President vun der Finanzcommissioun.

1946 gëtt de Schuman Finanzminister a vun 1947 - 1948 Ministerpresident vu Frankräich.

Vun 1948 - 1952 ass de Schuman Ausseminister an aacht Regierungen, déi ni laang gehalen hunn.

Den 9. Mee 1950 kënnt et zur historescher Deklaratioun fir Europa nei opzebauen, andeems mat der CECA sollt ugefaange ginn. D'Zil wier eng Federatioun vun Europa. Den 18. Abrëll gëtt de CECAs-Traité zu Paräis ënnerschriwwen.

1952 ass d'Europäesch Communautéit fir Stol a Kuel Wierklechkeet, mä seng Virstellungen iwwer eng Europäesch Communautéit gi villen a Frankräich ze wäit, hie muss säin Amt néierleeen.

1953 gëtt d'Stroossbuerger Konventioun fir Mënscherechter a biergerlech Grondfräiheeten, déi vum Schuman moossgeblech mat ausgeschafft gouf, vu 26 europäesche Staaten ënnerschriwwen.

1955 ass de Schuman Justizminister.

Vun 1953 - 1958 hält hien onzieleg Virtreeg a ganz Europa, fir Ënnerstëtzung vu senger Iddi vun engem geeenten Europa ze fannen.

D'Graf vum Robert Schuman an der Kierch zu Scy-Chazelles mat de Fändele vun de Länner aus der Europäescher Unioun

Vun 1958 - 1960 gëtt de Schuman zum President vum Europäesche Parlament gewielt; d'Unhuele vun de Traitéë vu Roum vu 1957 féieren Europa op dee Wee zréck, deen de Papp vun Europa schonn a senger Deklaratioun vum 9. Mee 1950 ageschloen hat.

1958 kritt hien de Karlspräis vun der Stad Oochen a 1959 den Erasmus-Kulturpräis zesumme mam Karl Jaspers.

De Robert Schuman ass de 4. September 1963 zu Scy-Chazelles gestuerwen. No engem feierleche Läichendéngscht an der Kathedral vu Metz gouf hien um Kierfecht vu Scy-Chazelles begruewen. 1966 goufe seng stierflech Iwwerreschter an d'Kierch Saint-Quentin transferéiert. Just nieft der Kierch, steet d'Haus an deem hie bis zur Lescht gewunnt huet. Haut ass e Musée an deem Haus.

Bibliographie[änneren | Quelltext änneren]

  • Haag, Emile: Robert Schuman *1886 1963: son empreinte luxembourgeoise In: Une réussite originale - Le Luxembourg au fil des siècles (Ss 456-465); Lëtzebuerg (Éditions Guy Binsfeld), 2011; 576 Säiten (ill.); ISBN 978-2-87954-235-5
  • Trausch, G., 1995. Robert Schuman et le Luxembourg. Quelques réflexions critiques. In: Un passé resté vivant. Mélanges d'histoire luxembourgeiose. Lions Club Luxembourg Doyen. S. 143-154. ISBN 2-87982-059-6. (Fir d'éischt publizéiert am Luxemburger Wort vum 28. Juni 1986).
  • Majerus, Jean-Marie 2003. Robert SCHUMAN 1886-1963. In: 400 Joer Kolléisch, Band II, S. 351-353. éditions saint paul, Lëtzebuerg. ISBN 2-87963-419-9.
  • Sangaletti, Cedric, 2008. Robert Schuman. In: Lieux de mémoire au Luxembourg. Erinnerungsorte in Luxemburg. 2. Editioun, S. 127-132. S. Kmec, B. Majerus, M. Margue, P. Peporte, éditeurs. éditions saint-paul, Lëtzebuerg.

Kuckt och[änneren | Quelltext änneren]

Um Spaweck[änneren | Quelltext änneren]

Commons: Robert Schuman – Biller, Videoen oder Audiodateien