Russesch-orthodox Kierch zu Lëtzebuerg

Vu Wikipedia
Wiesselen op: Navigatioun, sichen
Russesch-orthodox Kierch um Lampertsbierg
D'Kierch vun der Jean-Pierre Probst-Strooss aus gesinn. Riets d'Stäreplaz.

Déi Russesch-orthodox Kierch an der Stad Lëtzebuerg steet um Lampertsbierg an der Jean-Pierre Probst-Strooss, tëscht der Stäreplaz an dem Glacis.

Déi fënnef Kuppelen hunn eng genee Bedeitung: D'gëlle Mëttelkuppel stellt Christus duer, déi aner Kuppelen a bloer Faarf déi véier Evangelisten.

D'Kierch, déi op Initiativ vum Pater Serge Poukh gebaut gouf, gouf 1982 ageweit.[1]

Pope vun der Par vun 1982 u bis haut ass de Serge Poukh, hie gëtt awer vun 2012 u vum Pater George Machtalère vertrueden.[1]

Geschicht[änneren | Quelltext änneren]

Déi russesch-orthodox Par vun der Stad Lëtzebuerg, déi 1929 gegrënnt gouf, hat bis 1982 keng eege Kierch.[1]

Nodeems de Pater Serge Poukh, de Jong vun engem russeschen Exilant vu Mertert, aus den USA op Lëtzebuerg zréckkomm war, huet hien sech fir de Bau vun enger russesch-orthodoxer Kierch an der Stad Lëtzebuerg agesat.

Am Mee 1979 huet den Anthony (Bartoschewitch), den Äerzbëschof fir Westeuropa vun der Russesch-orthodoxer Kierch de Grondstee geluecht an den 12. Juli 1982 op den Hellege Péiter a Paul konsekréiert.[1]

D'Initiativ vun enger russesch-orthodoxer Kierch zu Lëtzebuerg geet virun allem op de Sergei Poukh zréck, engem zu Lëtzebuerg gebuerene fréiere Banquier, deen no enger stënterlecher Heelung vun enger Krankheet, bei där net vill Hoffnung bestanen hat, säi Wee zu Gott fonnt huet an Diakon a spéider Pope gouf.

Iwwerdeems de Monseigneur Anthony deem Projet ugaangs keng Bedeitung bäigemooss huet an un der Finanzéierbarkeet vum Projet gezweifelt huet, huet de Sergei Poukh sech dofir ageast, all administrativ Barrièren aus dem Wee ze raumen a krut vun der Gemeng Lëtzebuerg en Terrain fir seng zukënfteg Kierch zougesot. Gläichzäiteg huet hien niewebäi aktiv Sue gesammelt fir säi Projet, andeems e weltwäit Bréiwer verschéckt huet, wou e säi Plang vun enger Kierch virgestallt an ëm finanziell Hëllef gebieden huet. D'Destinatairë ware ganz verschidden, souwuel iwwer d'ganz Welt verstreete russesch Privatleit, wéi och all méiglech Hëllefsorganisatiounen. Dës Donatiounen huet de geléierte Banquier Puch geschéckt zu engem favorable Prozentsaz placéiert, fir dat gesammelt Kapital och jéngeren ze doen. De Puch huet selwer och vill Suen a säi Projet gestach, wouriwwer en awer net gäre schwätzt.

D'Kierch ass a véier Joer gebaut ginn. Et gouf uecht gedoen, d'Kennzeechen an d'Proportioune vun orthodoxen Tempelen ze respektéieren, d'Bannenariichtung mat den Ikonen feelerfräi no de Virstellunge vun den orthodoxe Chrëschte ze gestalten.

Déi éischt Mass an der Péiter a Pol-Kierch konnt schliisslech den 12. Juli 1982 gefeiert ginn. Zanterhier ass bal all Dag ënner der Woch Mass gewiescht an obligatoresch op de Sonndeger.

An der speziell equipéierter Salle-à-manger ënner der Kierch sinn absënns an der Vakanzenzäit vill Leit. D'Dëscher si gedeckt an a beschter russescher Traditioun gi festlech Iessen, Kanneropféirungen a Chrëschtbeemercher arrangéiert. D'Diere sinn op fir all orthodox Chrëschten, sief et Russen, Ethiopier, Serben, Bulgaren asw., déi een hei treffe kann.

Literatur[änneren | Quelltext änneren]

  • Chevalier, A., 2014. Den 85. Jahrestag ihrer Gründung feierte die russisch-orthodoxe Pfarrei am vergangenen Wochenende in Luxemburg. Ein Buch ist zum Jubiläum erschienen. Ein Gespräch mit der Autorin Inna Ganschow über das Leben der Gemeinde gestern und heute. Luxemburger Wort vum 26. Juli 2014, S. 13.

Kuckt och[änneren | Quelltext änneren]

Um Spaweck[änneren | Quelltext änneren]

Commons: Russesch-orthodox Kierch zu Lëtzebuerg – Biller, Videoen oder Audiodateien

Referenzen an Notten[änneren | Quelltext änneren]

  1. 1,0 1,1 1,2 1,3 Chevalier, A., 2014. Cf. Literatur.