Spitzer-Weltraumteleskop

Spitzer Space Telescope (SIRTF)

Startvirbereedunge vum Spitzer

Start vum SIRTF mat enger Delta II 7920H-9.5

D'Spitzer-Weltraumteleskop (engl. Spitzer Space Telescope, SST), fréier SIRTF (vum engl. Space Infrared Telescope Facility) genannt, ass eent no dem Astrophysiker Lyman Spitzer genanntent extraterrestrescht Infraroutteleskop. Et gouf de 25. August 2003 nach ënner dem Numm SIRTF mat enger Delta II 7920H-9.5-Rakéit vu Cape Canaveral gestart an dunn ëmgedeeft. Et ass niewent dem Hubble Space Telescope, dem Chandra X-Ray Observatory an dem Compton Gamma Ray Observatory en Deel vum Great Observatory Program vun der NASA. De Spitzer ass fir eng Liewensdauer vu 5 Joer konzipéiert. Am Joer 2008 soll säi Killmëttel fir d'Detektore verflu sinn.

Opbau a Missioun

Dee vum Spitzer-Weltraumteleskop ofgedeckten Infraroutberäich läit tëschen 3 an 180 µm. Deen Deel vun der elektromagnéitescher Stralung kënnt gréisstendeels net duerch d'Äerdatmosphär, an ass dofir mat äerdgebonnenen Teleskopen net z'observéieren. D'Teleskop besteet aus engem 0,85 m groussen Haaptspigel an engem klengen zweete Spigel aus Beryllium. Als Detektere sinn dräi Instrumenter u Bord:

• IRAC (vum engl. Infrared Array Camera), eng Infraroutkamera, déi simultan véier Kanäl mat de Wellelängten 3,6 µm, 4,5 µm, 5,8 µm an 8 µm ophuele kann. D'Gesiichtsfeld huet 5,12 × 5,12 Bouminutten, an d'Opléisung läit bei 256 x 256 Pixel.

• IRS (vum engl. Infrared Spectrograph),en Infrarout-Spektrometer mat véier Ënner-Modulen, déi d'Wellelängteberäicher 5,3 bis 14 µm (niddreg Opléisung), 10 bis 19,5 µm (héich Opléisung), 14 bis 40 µm (niddreg Opléisung) an 19 bis 37 µm (héich Opléisung) ofdecken.

• MIPS (vum engl. Multiband Imaging Photometer for Spitzer), besteet aus dräi Detekter-Reien am wäiten Infraroutberäich (128 × 128 Pixel bei 24 µm, 32 × 32 Pixel bei 70 µm, 2 × 20 Pixel bei 160 µm), déi nieft Biller och spektroskopesch Date liwwere sollen. D'Gesiichtsfeld variéiert dobäi tëschent 5 × 5 Bouminutte bei kuerze Wellelängten a 5 × 0,5 Bouminutte bei laange Wellelängten.

Fir d'Hëtzstralung déi op den Infrarout-Detektere stéiert, ze verhënneren, gëtt d'Teleskop an d'Instrumenter mat Helium-Kryostaten op eng Temperatur, déi sou no wéi méiglech beim absoluten Nullpunkt läit, gekillt. Fir d'Hëtzstralung vun der Äerd z'eliminéieren, beweegt sech d'Teleskop net op engem Äerdorbit, mä op engem heliozentreschen Orbit, deen der Äerdbunn noleeft. Et ass also keen Äerdsatellit. D'Solarzelle-Rei an d'Hëtzschëld schiermen d'Teleskop virun Hëtzstralung vun der Sonn an de waarmen Deeler vun der Raumsond of.

Erfolleg

• Am Hierscht 2005 hunn d'Wëssenschaftler aus enger Foto vum Stärebild Draco no Ausfilterung vu Stéierungssignaler vun noe Galaxien ee Bild vum fréien Universum kritt, dat – an Iwwereneestëmmung mat de gängegen Theorien – d'Clusterbildung vu fréiere Stäre weist; (kuckt dozou Urknall, Millennium-Simulatioun).
• Mee 2007: A kuerzer Zäit huet de Spitzer vill Dausend onbekannten Zwerggalaxië fonnt. Opgedriwwen huet hie s'am Coma-Galaxiekoup op enger Distanz vun 320 Millioune Liichtjoer vun eiser Äerd.
• Ufank 2008 gouf beim AA Tauri eng protoplanetaresch Scheif aus organescher Matière souwéi an der Atmosphär vum Exoplanéit beim HD 189733 Methangas fonnt. Et ass domatt fir d'Astronomie a fir d'Kosmochimie ee wäertvollen Nowäis vun organescher Matière op astronomeschen Objete gelongen, an dat mat Hëllef vun der IR-Spektroskopie, ähnlech wéi an der Analytik an an der Chimie.

Linken

Kuckt och

• Lyman Spitzer

weider Satelliten aus dem "Great Observatory Programm":

• Hubble-Weltraumteleskop
• Compton Gamma Ray Observatory
• Chandra X-Ray Observatory

weider Infrarout-Weltraumteleskopen:

• IRAS,
• ISO,
• Herschel
• James Webb Space Telescope (vun 2013 un)

Um Spaweck

Commons: Spitzer – Biller, Videoen oder Audiodateien

• (de) http://www.extrasolar-planets.com/de/spitzer.php – Spitzer
• (de) http://www.raumfahrer.net/raumfahrt/raumsonden/sirtf.shtml – SIRTF - Das letzte der Großen Teleskope
• (en) http://www.spitzer.caltech.edu/ – Spitzer-Weltraumteleskop Homepage
• (en) http://www.nasa.gov/centers/jpl/missions/spitzer.html – Missionsüberblick des SIRTF
• (en) http://planet4589.org/space/misc/sirtf/sirtf.html SIRTF's Orbit (englisch)