Staatlech Pressehëllef

Staatlech Pressehëllef ass eng finanziell Subventioun, déi de Lëtzebuerger Staat den Editeure vu bestëmmten Presse-Produkter (Zeitungen an Zäitschrëften), entspriechend Critèren, déi duerch e Gesetz definéiert sinn, gëtt. 2009 war de Gesamtbetrag fir d'Pressehëllef 7 754 499 Euro.

D'Zil vun der staatlecher Pressehëllef ass et, de Meenungspluralismus an der Press esouwäit wéi méiglech oprecht ze erhalen. Hannergrond ass, datt vill Presseorganer zu Lëtzebuerg enger politescher Stréimung oder Partei nostinn. Well de Maart fir lëtzebuergesch Zeitunge limitéiert ass, hätte besonnesch Zeitunge mat méi niddregen Oploen, déi méi "klenge" Parteien nostinn, et schwéier, z'iwwerliewen.

Dofir gouf 1976 e Gesetz gestëmmt, dat 1998 duerch en neit ersat gouf. Deemno setzt sech d'Pressehëllef aus zwee Deeler zesummen: Aus engem Grondbetrag, dee fir all Zeitungen an Zäitschrëften, déi Pressehëllef kréien, d'selwecht ass, an e proportionnellen Deel, dee fir d'Säiten mat redaktionnellem Inhalt vergi gëtt.

Konditiounen fir der ze kréien

Fir kënne Pressehëllef ze kréien, muss e Periodique zu Lëtzebuerg an op d'mannst eemol d'Woch erauskommen, allgemeng Informatioune verbreeden an haaptsächlech an enger vun den 3 Haaptsprooche vum Land geschriwwe sinn. Weider muss e vun enger Redaktioun vun op d'mannst 5 fest ugestallten Journalisten geschriwwe ginn. Gratis verdeelten Drécksaache falen net drënner.

De Schlëssel fir d'Berechnung vum Betrag

D'Berechnung fir d'Montanten, déi als Pressehëllef un déi eenzel Presseorganer bezuelt ginn, baséiert nieft der Oplo vum respektive Presseorgan, op engem Referenzbetrag, dee fir all Joer duerch e Règlement Grand-Ducal fixéiert gëtt. Fir dëse Referenzbetrag pro Joer ze berechne gëtt zënter 1999 d'Zomm vun de Käschte fir fënnef haaptberufflech Journalisten an de Präis fir 120 Tonne Pabeier geholl. De Grondbetrag, deen all Presseorgan kritt, ass een Drëttel vum Referenzbetrag. De propotionnelle Betrag gëtt gerechent, andeems zwee Drëttel vum Referenzbetrag geholl ginn, dëse Montant mat der Zuel vun de standardiséierte redaktionnelle Saïten (187 680 Quadratmillimeter pro Säit) vum Presseorgan multiplizéiert gëtt, an dann duerch 2325 dividéiert gëtt.

Entwécklung vum Referenzbetrag:

• 1999: 315 568,46 EUR (12 730 000 LUF)
• 2000: 328 087,08 EUR (13 235 000 LUF)
• 2001: 349 281,98 EUR (14 090 000 LUF)
• 2002: 353 550,00 EUR
• 2003: 355 525,00 EUR
• 2004: 361 500,00 EUR
• 2005: 376 500,00 EUR
• 2006: 390 950,00 EUR
• 2007: 404 000,00 EUR
• 2008: 408 000,00 EUR
• 2009: 418 550,00 EUR
• 2010: 426 775,00 EUR

Wien der kritt a wéivill

Organ	Editeur	2007 (EUR)	2008 (EUR)	2009 (EUR)	2010 (EUR)
Luxemburger Wort	Groupe Saint-Paul	1 494 357	1 489 778	1 524 658	1 500 650
La Voix du Luxembourg	Groupe Saint-Paul	907 575	942 846	933 221	898 843
Tageblatt	Editpress	1 634 714	1 702 054	1 659 554	1 642 507
Le Quotidien	Lumedia (50% Editpress)	1 091 203	1 182 487	1 197 239	1 204 855
Lëtzebuerger Journal	Editions Lëtzebuerger Journal s.a.	526 010	523 533	540 421	529 621
Zeitung vum Lëtzebuerger Vollek	Zeitung SA	334 826	346 545	353 281	355 937
Télécran	Editions Saint-Paul	334 328	335 243	375 763	376 472
Revue	Editpress	322 751	318 239	321 984	332 813
d'Lëtzebuerger Land	éditions d'Lëtzebuerger Land	236 361	254 462	259 954	268 405
Woxx	Grengespoun SC	203 221	226 156	230 417	233 348
Le Jeudi	Editpress	336 204	368 587	358 005	349 532
Total		7 421 549	7 689 930	7 754 499	7 692 983

D'Press zu Lëtzebuerg profitéiert weiderhi vu méi niddregen TVAs-Tauxen a Posttariffer, souwéi dovunner, datt de Revenu duerch Reklamm op RTL Tele Lëtzebuerg gedeckelt ass.

Um Spaweck

• Gesetz vum 11. Mäerz 1976 (Loi du 11 mars 1976 d'aide directe de l'Etat à la presse écrite)
• Gesetz vum 3. August 1998 (Loi du 3 août 1998 sur la promotion de la presse écrite)
• SIP: Portail Médias et communication - Promotion de la presse (Versioun vum 18-02-2009, gekuckt den 19.03.2009)