Talence

Talence
D'Kierch vun Talence bei Nuecht
Land	Frankräich
Regioun	Aquitaine
Departement	Gironde
Arrondissement	Bordeaux
Kanton	Talence
Code Insee	33522
Postcode	33400
Koordinaten	44° 48' 00" N 00° 35' 02" O
Fläch Uertschaft	828 ha
Bevëlkerung Uertschaft	42 293 (2009)

Talence ass eng Stad am Südweste vun Frankräich an der Regioun Aquitaine. Si ass e Viruert vu Bordeaux an ass mat iwwer 40.000 Awunner, no Bordeaux, Mérignac a Pessac, déi véiertgréisst Stad vun der Gironde.

Talence ass och de Chef-lieu vum Canton de Talence.

Geographie

Talence läit am Süde vun der Agglomeratioun Bordeaux an ass ëmgi vun de Stied vun der Communauté urbaine de Bordeaux, Pessac, Bègles, Gradignan a Villenave-d'Ornon.

Geschicht

Den Territoire vun Talence war laang mat Bësch bedeckt, an deem vereenzelt Wëllschwäin gelieft hunn. Dëse Bësch soll och um Urspronk vum Numm "Talence" sinn: d'Wuert "Tala" huet d'Holzschloe bezeechent. Am 13. Joerhonnert hu sech dunn noeneen d'Nimm "Talanssa", "Talencia" an "Talance" entwéckelt.

Talence war eng Uertschaft, déi ëmmer erëm a Kricher ausgeplënnert an zerstéiert gouf, an huet sech eréischt richteg am 17. Joerhonnert entwéckelt. D'Proximitéit vun Talence zu Bordeaux an d'Presenz vun dräi groussen an relativ sécheren Handelsstroossen, d'Stroosse vun Toulouse, Bayonne a La Teste, hunn déi räich Bourgeoisie vu Bordeaux ugezunn, vun deenen der vill sech grouss Schlässer baue gelooss hunn, wéi zum Beispill de Banquier Samuel Charles Peixotto.

Trotzdem bleift Talence éischter eng ländlech Géigend. Et ass eréischt um Enn vum 19. an am Laf vum 20. Joerhonnert, datt Talence sech als Stad affiméiert huet a verschidden industriel Aktivitéite sech entwéckelt hunn.

An den 1970er an 1980er Joren ass d'Industrie aus Talence verschwonnen an et sinn haaptsächlech Wunnquartieren iwwreg bliwwen.

Wopen

Um Wope vun Talence steet: "D'or, aux talles de sinople posées sur une terrasse du même, au sanglier de sable défendu et allumé de gueules brochant sur les tiges".

Um Wopen (gréng, schwarz, gold), gesäit een e Bam mat zwéi groussen Äscht ("talles"), déi op den Numm "Talence" hiweisen, an e Wëllschwäin, well fréier déi räich Leit vun Bordeaux op Talence joe komm sinn.

Economie

De gréissten Deel vun de Betriber zu Talence kënnt aus dem Tertiäre Secteur. Landwirtschaft gëtt et quasi keng an d'Industrie ass nëmme schwaach vertrueden. De Chômage huet 1999 14 % erreecht (12,9 % fir ganz Frankräich).

• Primäre Secteur: 0,1 %
• Industrie: 9,2 %
• Tertiäre Secteur: 90,7 %

Demographesch Evolutioun

Joer         Awunner 1793 1.489 1800 1.181 1806 1.340 1821 1.194 1831 1.322 1836 1.288 1841 1.232 1846 1.402 1851 1.434 1856 1.693 1861 2.430 1866 2.577

Joer         Awunner 1872 3.604 1876 3.873 1881 4.621 1886 6.642 1891 7.921 1896 9.221 1901 11.227 1906 11.832 1911 13.224 1921 15.823 1926 17.130 1931 18.944

Joer         Awunner 1936 20.380 1946 21.650 1954 22.695 1962 25.874 1968 29.161 1975 34.127 1982 34.692 1990 34.485 1999 37.210 2009 42.293

Quell: INSEE

Repartitioun

• Undeel vu Männer a Fraen (Schätzung vun 2005, Quell: INSEE):

Geschlecht	Talence (2005)	Frankräich (2005)	Talence (1999)
Männer	46 %	48,3 %	47 %
Fraen	54 %	51,7 %	53 %

• Undeel vun de verschiddenen Altersklassen (Schätzung vun 2005, Quell: INSEE):

Altersgklass	Talence (2005)	Frankräich (2005)	Talence (1999)
Ënner 19 Joer	23 %	25,4 %	20,2 %
Zwëschent 20 an 39 Joer	38 %	26,6 %	40 %
Zwëschent 40 an 59 Joer	23 %	27,7 %	21,4 %
Iwwer 60 Joer	16 %	20,3 %	19,4 %

Den Tram zu Talence (Statioun Forum)

Infrastruktur

• En Deel vum Universitéitsdomaine vu Bordeaux läit zu Talence, ënner anerem d'Université Bordeaux I, den Institut polytechnique de Bordeaux an en Deel vun der Université Bordeaux II.
• De Stade Pierre Paul Bernard an de Stade nautique Henri Deschamps sinn zu Talence.
• Talence gehéiert zur Communauté urbaine de Bordeaux (CUB) an ass iwwert d'Linn B: Pessac Centre ↔ Claveau / Bassins à Flot vum Tram vun der CUB mat Pessac a mat dem Stadzentrum vu Bordeaux verbonnen.

Partnerschafte mat auslännesche Stied

• 1985 Alcalá de Henares (Spuenien)
• 1998 Trikala (Griicheland)
• 2004 Chaves (Portugal)

Um Spaweck

• http://www.talence.fr/ Internetsäit vun der Gemeng Talence

Referenzen

Commons: Talence – Biller, Videoen oder Audiodateien