Timothy Garton Ash

Den Timothy Garton Ash 2009

Den Timothy Garton Ash, gebuer den 12. Juli 1955 ass e briteschen Historiker, Journalist a politesche Kommentator. Zu de Schwéierpunkte vu senger akademescher Fuerschung zielen d'zäitgenëssesch Geschicht vun Zentral- an Osteuropa, souwéi d'Roll an d'Transformatioun vu villen osteuropäesche Staaten am Kader vun der europäescher Integratioun respektiv hirer Opnam an d'Europäesch Union nom Zesummefall vu kommunistesche Regimer am fréieren Ostblock.

Studium

Den Timothy Ash goung als Bouf op d'Sherborne School an der Südwest-englescher Grofschaft Dorset. Duerno huet hien en Undergraduate-Studium um Exter College vun der Universitéit Oxford a moderner Geschicht absolvéiert, ier hien dann seng Postgraduate studies um St. Anhony's College vun derselwechter Universitéit mat exzellenten Notten ofgeschloss huet. Schonns während senge Studien huet den Timothy Ash sech ganz besonnesch fir d'Geschicht vum däitschsproochege Raum interesséiert, wat net zulescht och op seng grouss Begeeschterung fir d'Bicher vum Thomas Mann zréckzeféieren ass. Wéinst sengem perséinlechen Intressi un Däitschland goung hien dofir schliisslech am Joer 1978 op West-Berlin, fir do op der Freien Universität Berlin Nofuerschunge fir seng geplangten Dokteraarbecht iwwer d'Nazien zu Berlin ze maachen. Op Grond vun der Erfahrung, datt hie bei Reesen op Ostberlin dacks op der Humboldt-Universität keen Zougang zu zouenen Archiven krut an als Student, souwéi spéider och als Journalist, ënner offizieller Iwwerwaachung vun der Stasi stoung, huet hie schliisslech ugefaange sech méi konkret Gedanken doriwwer ze maachen, wei Mënsche sech am allgemengen an Diktature verhalen. D'Faszinatioun un dësem Sujet louch fir hie virun allem an der Tatsaach datt et him duerch säin Openthalt zu Berlin méiglech war sech quasi an Echtzäit mat de schwieregen Decisiounen ze befaassen, déi Mënschen an esou Fäll tëschent Resistenz a Kollaboratioun mam politesche Regime ze treffen hunn. Seng ausféierlech Beschäftegung mat deem Thema huet hien da schliisslech dozou bruecht, de Schwéierpunkt vu senger Dokteraarbecht op déi Fro ze verlageren, notamment mat staarkem Bezuch zu aktuelle Praktiken am vun der SED geféierten DDR-Staat. Déi doraus resultéierend Aarbecht war soumat den Ausgangspunkt vu senger spéiderer an intensiver Fuerschung iwwer osteuropäesch Staaten ënner kommunistesche Regierungen.

Carrière

Journalismus

Nom Ofschloss vun senge Studien ass den Timothy Garton Ash opgrond vu sengem perséinlechen Interessi fir déi Regioun weiderhin duerch eng sëllegen osteuropäesch Länner gereest. Am Kader vun sengen intensiven a wäitleefege Fuerschungsreesen huet hie sech besonnesch mam interne politeschen an ideologesche Wandel vu kommunistesche Staaten an Osteuropa während den 1980er Joren beschäftegt, woubäi hie virun allem hir graduell Emanzipatioun vum sowjetesch markéierte Kommunismus am Detail analyséiert a kommentéiert huet. Opgrond vu senge perséinlechen Erfahrunge souwéi senge Kenntnesser iwwer d'Geschicht, d'Mentalitéiten an d'sozial Strukture vun osteuropäesche Länner an Vëlker krut hie schliisslech d'Geleeënheet, seng Impressiounen als Auslands-Korrespondent vun enger Rëtsch renomméierter Dageszeitungen a Fachzäitschrëften un d'Ëffentlechkeet ze bréngen. Während ville Joren huet hien ënner anerem journalistesch Bäitreeg fir déi britesch Zeitung The Spectator, vun där hie Foreign Editor war, geschriwwen, souwéi och regelméisseg Artikele fir The Independent an The Times. Zousätzlech huet hien och ëmmer erëm an der New York Review of Books publizéiert; zënter 2004 huet hien ausserdeem och eng wöchentlech Kolumn am britesche The Guardian.

Duerch seng wäitleefeg journalistesch Reesen an Reportagen war et dem Timothy Garton Ash leschten Enns ëmmer nees méiglech, historesch Evenementer an Entwécklungen méi oder wéineger intensiv an hautno mat ze erliewen, an engem gewëssen Sënn also souzesoen „as it happened.“ Deementspriechend war hien, wann och net als aktive Matkämpfer, esou dach awer als passive Observateur, méi wei eemol matzen am Zentrum vu Streikbeweegungen, déi Ufank den 1980er Joer vun der polnescher Solidarnosc-Bewegung organiséiert gouwen, a konnt weiderhin opgrond vu perséinlechen Impressiounen an Erfahrungen och quasi aus éischter Hand en detailléierten Androck vun de politeschen a sozialen Ëmwelzunge während de „friddleche“ Revolutiounen am Joer 1989 an zentral- an osteuropäesche Stied wei Budapest, Warschau, Prag (Samette Revolutioun) an natierlech och Berlin ginn. An obwuel hie sech trotz allem primär als Historiker gesäit, esou betount den Timothy Garton Ash gläichzäiteg awer och, datt seng beruflech Tätegkeeten – notamment eebe wéinst hirer heefeger Abannung a weltgeschichtlech Evenementer – leschten Enns och eng Aart Schnëttstell tëschent modernem Journalismus an zäitgenëssescher Geschichtsfuerschung duerstellen, souzesoen eng Verschmëlzung vun aktuellen Tatsaachenberichter an historesch bedéngten Entwécklungen, déi hien esou dann nodréiglech och ëmmer nees a verschiddene Monografien festzehalen, respektiv opzeschaffe versicht.

Akademesch Carrière

Seng éischt akademesch Ustellung krut den Timothy Garton Ash 1986 als Professer um Woodrow Wilson International Center for Scholars zu Washington D.C. Schonns am Joer 1990 goung hien awer zréck op seng Alma Mater zu Oxford, wou him eng Professur um St. Antony's College ugebuede gouf. Vun 2001-2006 war hien dann zu Oxford Direkter vum European Studies Centre; an 2006 gouf en Isaiah Berlin Professional Fellow zu Oxford . Niewent Oxford, wou hie gefuerscht an enseignéiert huet, huet den Ash sech awer och ëmmer nees bei anere renomméierte Universitéiten duerch d'ganz Welt engagéiert, z. B. vun 2000 un als Senior Fellow of the Hoover Institution op der amerikanescher Standford University. Derniewent ass hien och Member a regelméissege Gaaschtlieser vun enger ganzer Rei vun international bekannten Akademien a Fuerschungsinstituter, ënner anerem vun der British Royal Historical Society, der Royal Society of Literature wéi och vun der Berlin-Brandenburgischen Akademie der Wissenschaften.

Fuerschung

Zentral- an osteuropäesch Geschicht

Den akademesche Schwéierpunkt vum Timothy Garton Ash senger Fuerschung läit ganz kloer op der zäitgenëssescher, europäescher Geschicht nom Zweete Weltkrich, besonnesch op de laangwieregen a fundamentalen Transformatiounsprozeser vu villen osteuropäesche Staaten während deene leschte Jorzéngten. Dobäi huet hie sech an enger éischter Phase virun allem mat den internen, sozial-politesche Strukturverännerungen a schrëttweisen Denkëmschwéng vun osteuropäesche Gesellschaften ënner kommunistesch geféierte Regierunge beschäftegt, notamment mat hirer intellektueller Liberatioun an Emanzipatioun vum sowjetesche Kommunismus. Nom Zesummebroch vun der Sowjetunioun huet hie sech dunn an éischter Linn dem Rapprochement vu ville eemolegen Ostblock-Staaten un e gréissert a vereent Europa gewidmet, am konkreten also dem Prozess vun der europäescher Integratioun an dem laangen a beschwéierleche Wee, deen dës Staate bis zur hirer Opnam an d'Europäesch Unioun hu missen zréckleeën.

Däitsch Geschicht

Opgrond vu sengem fréien Intressi un Däitschland huet den Timothy Garton Ash sech awer och intensiv mat der Geschicht vum däitschsproochege Raum ausernanergesat, woubäi hie virun allem d'Ostpolitik vun der Bundesrepublik Däitschland mäi genau analyséiert a sech och ausféierlech mam däitsche Vereenegungsprozess no 1990 beschäftegt huet.

Stasi-Akten

No der däitscher Wiedervereenegung huet den Timothy Garton Ash sech bei engem weideren Openthalt zu Berlin der Geschichtsfuerschung mat enger éischter ongewinnter Approche gewidmet, nämlech andeems hien sech intensiv mat den Informatiounen aus dem Fichier befaasst huet, den d'Stasi während senger Studienzäit ännert dem Codenumm „Romeo“ iwwert hien ugeluecht an de Jore duerno ëmmer nees am Kader vun Iwwerwaachungsmesuren aktualiséiert hat. Fir den Timothy Ash war et dobäi besonnesch interessant, säi Liewen duerch d'Aen an d' Perspektiv vun anere Leit nach enge Kéier Revue passéiren ze loossen. Deementspriechend war et och e perséinlech Uleies vum him, sech mat deene Leit an Kontakt ze setzen, déi als Informant fir d'Stasi Noten iwwer säin Alldeegleche geholl hunn an hien dobäi ouni säi Wëssen op Schratt an Tratt duerch Ostberlin verfollegt haten. Dës speziell Erfahrung huet et dem Timothy Ash virun allem och erméiglecht, sech quasi aus eeschener Hand mat der schwiereger an komplizéierter Dialektik vun historeschen Tatsaachen an perséinlechen Erënnerungen ausenanerzesetzen, net zulescht well hien doduerch eventuell och méiglech Diskrepanzen tëschent der historescher Realitéit, wei hien se selwer an Erënnerung hat, an der offizieller Dokumentatioun vun de Stasi-Beamten iwwert säin Liewen konnt opdecken.

Eng weider wichteg Erkenntnis, déi him während sengen Recherchen an den Stasi-Akten lues awer sécher ëmmer méi bewosst gouf an déi doriwwer eraus grad och am Hibléck op déi fir en Historiker esou wichteg wëssenschaftlech Objektivitéit am Ëmgang mat historeschen Evenementer an Entwécklungen vu Bedeitung ass, betrëfft d'Tatsaach, datt den Timothy Garton Ash am Kader vun sengen eegenen Nofuerschungen an Interviewe mat fréiere Stasi-Beamten am Fong geholl keng Confirmatioun fonnt huet fir dat an der Ëffentlechkeet heefeg verbreete Bild vum „béise“ Stasi-Agent. Ganz am Géigendeel huet d'Ausenanersetzung mat dësem Thema him vill éischter déi mënschlech Säit vun dësem historeschen Sujet gewisen, méi konkret d'Realisatioun datt och d'Handlungen vun deenen meeschte Stasi-Agenten dach eigentlech vill méi Ausdrock vun mënschlecher Schwächt a Selbsttäuschung ënnert schwierege sozialen an politeschen Verhältnisser waren wei eng ugebueren oder muttwëlleg Predispositioun zur „Béisaartegkeet.“ Deementspriechend hu seng perséinlech Erfahrungen an dësem Kontext et dem Timothy Garton Ash erméiglecht. eng vill méi nuancéiert Vue op'd Liewen an d'Handlungen vu Mënschen a verschiddene Gesellschaften esou wei ënnert alles anescht wéi einfache Konditiounen ze formen, soudatt hie letztendlech och dofir plädéiert, d'Mënschen am allgemengen net fir eppes ofzestempelen oder ze veruerteelen wat mir selwer als objektive Aussestehenden ni selwer hu misse matmaachen, ëm esou méi well mir letztendlech jo iwwerhaapt guer net wësse kennen, wéi mir an hirer Platz gehandelt hätten.

Niewent villen aneren Aarbechten vum Timothy Garton Ash war et besonnesch seng ausféierlech Ausenanersetzung mat dësem konkreten Thema, déi an der Fachwelt op groussen Uklang gestouss ass, notamment well et him duerch seng speziell Approche a Form vun enger Mëschung aus akribesche Recherchen an den Archiven an Kombinatioun mat enger subjektiver Veraarbechtung vu senger eegener Vergaangenheet gelongen ass, e méi differenzéiert an nuancéiert d'Bild vun de Machenschaften an Mentalitéiten vun eenzele Stasi-Beamten ze entwerfen wéi dat wat dacks an offiziellen oder ëffentlechen Discoursen presentéiert gouf. An och wann seng autobiographesch Reflektiounen zu dësem Sujet sécherlech net esou eng ëmfaassend an komplett Beschreiwung respektiv Analyse vun der DDR-Gesellschaft bidden wéi dat beispillsweis an aneren Monografien, notamment der Anna Funder hirem "Stasiland" de Fall ass, sou hunn d'Kritiker dann awer virun allem ëmmer nees grad den aussergewéinlech perséinlechen an ongewinnt realisteschen Abléck hannert d'Kulissen, speziell wat d'Motivatioun an d'Denkweise vun eenzele Stasi-Beamten betrëfft, beim Timothy Ash sengen Nofuerschungen ervirgehuewen an dës dann och deementspriechend als e wichtege an interessante Beitrag zu dësem nach relativ rezenten historiographeschen Fuerschungsgebiet bezeechent.

Globaliséierungs- an Volleksgeschicht

Dem Timothy Ash säin Fuerschungsinteressi huet sech allerdéngs ni ausschliisslech nëmmen op e geschlossene, grouss-europäesche Raum konzentréiert, mä hien huet och ëmmer nees D'Evolutioun vun de Relatioune vun der Europäescher Unioun mat hiren ausser-europäesche Partner, wéi z. B. mat der Volleksrepublik China an de Vereenegte Staate vun Amerika, ënnersicht. Méi rezent huet hien sech an dësem Kontext duerfir och widderhuelt mat Froestellungen a Problemer virum Hannergrond vu wirtschaftlechen an politesche Globaliséierungsprozesser beschäftegt, woubäi hien allgemeng der fester Iwwerzeegung ass, datt weder d'Vereenegt Staaten op laang Siicht wäerten am Stand sinn sech aktuelle wirtschaftlechen an geo-politesche Problemer op der Welt alleng unzehuelen, nach datt Europa senge villfältege Ambitiounen wäert nokomme kënnen, ouni sech nach mäi intensiv an enger gréisserer, transatlantescher Communautéit z'engagéieren an dobäi virun allem duerch eng nach méi staark op multilateral Kooperatioun ausgeriicht Politik mat sengen internationale Partner och versicht, sech méi konkret mat akuten Noutstänn an der drëtter Welt esou ewéi mat nach ëmmer net geléiste Froen am noen Osten ausenanerzesetzen. An deem Zesummenhang keent den Timothy Garton Ash, baseierend op der kritescher Analyse an Interpretatioun vun verschiddenaartege, zäitgenëssesche Quellen wéi Meenungsëmfroen an Interviewe mat politesche Feier esou wéi sengen eegenen Andréck an Erfahrungen am Kader vu wäitleefege Fuerschungsreesen duerch d'ganz Welt, zum Schluss, datt sech der globaler Weltgemeinschaft trotz vereenzelte politesche Krisen an wirtschaftlech onbestännegen Zäiten gläichzäiteg och eng eemoleg historesch Chance biet fir nom Enn vun enger gedeelter Welt opgrond vum Kale Krich zesummen zu enger neier internationaler Uerdnung vun universellem Fridden a Fräiheet ze avancéieren.

Doniewent huet den Timothy Ash seng Fuerschungen awer net nëmmen op d'Ënnersiche vu soziale Gesellschaftsstrukturen a politesche Verännerungen begrenzt, mä hien huet sech doriwwer eraus och mat de Formen vu kollektive Mentalitéiten an Liewensastellungen vun ënnerschiddleche Bevëlkerungen virum Hannergrond vun verschiddene Epochen an Gesellschaftsmodeller ausernanergesat. Opbauend op senger Dokteraarbecht huet hien an dësem Zesummenhang ë. a. d'Liewen vun Leit ënnert diktatoresche Regimen ënnersicht, sech mam Afloss vun Intellektuelle op déi national Politikgestaltung beschäftegt souwéi schliisslech och mat der Fro, wéi Gesellschaften am allgemengen mat enger beweegter an schwiereger Vergaangenheet ëmginn. Deemenstspriechend louch de Fokus vun senge rezenten Aarbechten dann virun allem och op der historescher Erfuerschung vun verschiddene Formen vun ziviler an gewaltfräier Resistenz géint Ënnerdréckung a sozial Ongerechtegkeeten an ënnerschiddleche Gesellschaften zënter dem Zweete Weltkrich.

Literatur

• Und Willst Du Nicht Mein Bruder Sein...Die DDR Heute (Rowohlt, 1981) ISBN 3-499-33015-6

• The Polish Revolution: Solidarity, 1980–82 (Scribner, 1984) ISBN 0-684-18114-2

• The Uses of Adversity: Essays on the Fate of Central Europe (Random House, 1989) ISBN 0-394-57573-3

• The Magic Lantern: The Revolution of 1989 Witnessed in Warsaw, Budapest, Berlin, and Prague (Random House, 1990) ISBN 0-394-58884-3

• In Europe's Name: Germany and the Divided Continent (Random House, 1993) ISBN 0-394-55711-5

• The File: A Personal History (Random House, 1997) ISBN 0-679-45574-4

• History of the Present: Essays, Sketches, and Dispatches from Europe in the 1990s (Allen Lane, 1999) ISBN 0-7139-9323-5

• Free World: America, Europe, and the Surprising Future of the West (Random House, 2004) ISBN 1-4000-6219-5

• Facts are Subversive: Political Writing from a Decade without a Name (Atlantic Books, 2009) ISBN 1848870892

Referenzen

Um Spaweck

http://www.timothygartonash.com/biography.html.

http://www.hoover.org/fellows/10575.

http://www.timeshighereducation.co.uk/story.asp?storyCode=103674&sectioncode=26

http://conversations.berkeley.edu/content/timothy-garton-ash

• Element vun der Lëscht mat Punkten