Villa Louvigny

Vu Wikipedia
Wiesselen op: Navigatioun, sichen
D'Villa Louvigny, am Mee 2008

D'Villa Louvigny ass e Gebai am Park vun der Stad Lëtzebuerg, dat op der Plaz vum ale Reduit Louvigny vun der Festung Lëtzebuerg steet, deen hir den Numm ginn huet. Si war 64 Joer laang de Sëtz vun der CLT (haut RTL Group).

Wéi d'Festung ofgerappt gouf, gouf de Réduit 1872 fir 9600 LUF verkaf, an an e Restaurant mat Festsall ëm- an ausgebaut. An dësem Sall goufe Variété-Representatiounen a soss Attraktiounen organiséiert, 1896 zum Beispill gouf et den "Titanen-Kampf" tëscht de Bridder Travelli, de "Fielse vun Elsass-Loutrengen", an dem John Grün, dem Munnerefer Kraaftmënsch, an et gouf (no Iechternach) eng éischt Kéier e Film vun de Bridder Lumière an der Stad gewisen.

Et gouf och e Vëlodrom do. Kuerz virum Éischte Weltkrich gouf d'Villa Louvigny an eng Haushaltsschoul, ëmfunktionéiert.

Dat haitegt Gebai gouf an den 1920er Jore gebaut.

1930 gouf et do e Casino.

1932 huet d'Compagnie luxembourgeoise de Radiodiffusion (CLR), déi kuerz virdru gegrënnt gi war, fir vu Lëtzebuerg aus Radiosemissiounen auszestralen, d'Villa Louvigny gelount. 1936 huet d'CLR d'Villa mam Terrain ronderëm opkaf a se 3 Joer laang ëmgebaut.

Während dem Zweete Weltkrich ass d'Villa vun der däitscher Besatzung zur Ausstralung vun hire Sendunge benotzt ginn. D'Gebai verfällt während där Zäit ëmmer méi. No der Befreiung hunn d'Alliéiert d'Gebai fir hir eege Sendunge benotzt.

1945 ass d'CLR nees Proprietär vun der Villa ginn. D'Schied, déi d'Preisen hannerlooss hate, si behuewe ginn, an en neien Trakt gouf bäigebaut.

1952 war deen neien Deel mam Auditorium fir den RTL-Orchester fäerdeg. 1956-57 ass de markanten 8-stäckegen Tuerm gebaut ginn, an deem d'Radiostudioen a Büroen ënnerbruecht waren. D'Grondmauere vum Tuerm stinn op der Reschter vum Fort.[1]

1962 an 1966 gouf an der Villa Louvigny de Grand Prix Eurovision de la Chanson Européenne organiséiert.

1991 sinn d'CLT-Verwaltung an d'Studioen op de Kierchbierg geplënnert, 1996 och den techneschen Déngscht, wéi en zweet Gebai um Kierchbierg fäerdeg gebaut war. D'Gebai dat eidel stoung, gouf fir 931 Millioune Lëtzebuerger Frang (eppes méi wéi 23 Milliounen Euro) un de Lëtzebuerger Staat verkaaft. Just de fréieren RTL-Orchester, den haitegen Orchestre philharmonique du Luxembourg ass dra bliwwen, bis 2005 d'Philharmonie fäerdeg gebaut war, an huet sech d'Raimlechkeeten zäitweileg mam Institut monétaire luxembourgeois a Servicer vum Gesondheetsministère missen deelen.

Zanter 2000 ass d'Villa Louvigny de Sëtz vum Gesondheetsministère. Den Numm vun der Strooss déi dohinnerféiert, d'Allée Marconi, erënnert nach un d'Roll, déi se an der Geschicht vum Radio gespillt huet.

Reschter vum Fort Louvigny, Fundament vum Tuerm.

Literatur[änneren | Quelltext änneren]

  • Marc Jeck, 2008. "D'Villa Louvigny." In: Lieux de mémoire au Luxembourg. Erinnerungsorte in Luxemburg. 2. Editioun, S. 209-214. S. Kmec, B. Majerus, M. Margue, P. Peporte, éditeurs. éditions saint-paul, Lëtzebuerg. ISBN 978-2-87963-705-1
  • Lobo, Paulo, 2011. 12 Bemerkenswerte Gebäude in Luxemburg: 7. Die Villa Louvigny. S. 68-75, Luxédit, ISBN 978-99959-733-0-8

Kuckt och[änneren | Quelltext änneren]

Referenzen[änneren | Quelltext änneren]