Xavier Bettel

Vu Wikipedia
Wiesselen op: Navigatioun, sichen
De Xavier Bettel, Oktober 2012.

De Xavier Bettel, gebuer den 3. Mäerz 1973 an der Stad Lëtzebuerg, ass e lëtzebuergeschen Affekot an DP-Politiker . Hien ass zënter dem 4. Dezember 2013 Premierminister a Minister fir Kommunikatioun an de Kultus an der Regierung Bettel-Schneider.

Hie war vun 1999 bis 2013 Deputéierten an der Chamber, vum 24. November 2011 bis zu senger Ernennung zum Premierminster Buergermeeschter vun der Stad Lëtzebuerg an ass zanter dem 29. Januar 2013 President vun der DP.

Seng Carrière[änneren | Quelltext änneren]

Nom Ofschloss vum Secondaire classique huet hien eng Maîtrise am Droit public an am Droit européen, an och en Diplom am Droit maritime an am Droit ecclésiastique op der Universitéit Aristoteles zu Thessaloniki a Griicheland gemaach. Hien ass Affekot.

1988 gouf hie Member an der Demokratescher Partei an 1989 Komiteesmember a Member vum Nationale Büro vun der JDL (Jeunesse démocrate et libérale) am Bezierk Zentrum.

1991 gouf hie President am Bezierk Zentrum a Vizepresident op nationalem Niveau vun der JDL. Hie war President vun der JDL vun 1994 bis 2002.

Bei de Gemengewale vum 10. Oktober 1999 ass hie fir d'éischt an de Gemengerot vun der Stad Lëtzebuerg gewielt ginn. 2005 gouf hie Schäffen. Bei de Gemengewale vum 9. Oktober 2011 gouf hien Éischtgewielten, virum amtéierende Buergermeeschter Paul Helminger. De 24. November 2011 gouf hien als neie Buergermeeschter vun der Stad vereedegt.

Den 13. Juni 1999 gouf hie fir d'éischt an d'Chamber gewielt. Bei de Chamberwale vum 13. Juni 2004, deene vum 7. Juni 2009 an deene vum 20. Oktober 2013 ass hien als Deputéierten all Kéier erëmgewielt ginn.

Als Folleg vun de Chamberwale vum 20. Oktober 2013 ass hien de 25. Oktober vum Grand-Duc Henri zum Formateur vun der neier Regierung ernannt ginn.[1] Dës Koalitioun aus DP, LSAP an Déi Gréng gouf de 4. Dezember 2013 vereedegt.

Säi Privatliewen[änneren | Quelltext änneren]

Hien ass gebuer als Bouf vun engem Wäinhändler an enger Franséisin mat russeschen Originen (Famill vum Komponist a Pianist Rachmaninow[2][3][4]).

Den 28. Juni 2008 huet de Xavier Bettel an der RTL-Emissioun "Background" offen zu senger Homosexualitéit Stellung geholl a betount, wéi schwéier et och haut nach ass mat deem intime Sujet un d'Ëffentlechkeet ze goen. An deem Kontext huet hien op eng Titulatioun vun der Staatssekretärin Octavie Modert higewisen, déi hien an der Chamber als "Joffer" bezeechent huet.

Den 19. Mäerz 2010 huet hie sech mat sengem Liewenspartner, dem belschen Architekt Gauthier Destenay, gepacst.

Gielecher[änneren | Quelltext änneren]

Kuckt och[änneren | Quelltext änneren]

Um Spaweck[änneren | Quelltext änneren]

Commons: Xavier Bettel – Biller, Videoen oder Audiodateien

Referenzen[änneren | Quelltext änneren]