André Hentges

André Hentges
André Hentges
Gebuer	22. August 1843; Allënster
Gestuerwen	27. August 1920; Paräis
Alter	77 Joer
Nationalitéit	Lëtzebuerg
Aktivitéit	Steemetzer, Sportler

Den André Hentges, gebuer den 22. August 1843 zu Allënster, a gestuerwen de 27. August 1920 zu Paräis^[1]^[2], war e lëtzebuergesche Sportler am Ringen a Gewiichthiewen.
Mat zwee Joer ass hie mat senger Famill op Waldbëlleg geplënnert. 1852 ass hie mat sengem Papp op Paräis wunne gaangen.

No senger Schoul huet hien do als Steemetzer geschafft. A senger Fräizäit huet hie mat vill sportlechem a finanziellem Erfolleg Ringsport gedriwwen a gouf ënner sengem Kënschtlernumm André Lacaisse an der Ringerzeen eng Vedette. Duerch seng Renommée gouf hien no senger sportlecher Karriär, Impresario vun de Sportspektakele vun de Folies-Bergère vun 1873 bis de Moment wou d'Haus sech nëmme méi op erotesch Revuen a Varietéspektakele spezialiséiert huet.

Zäitliewens war den André Hentges sentimental mat sengem Heemechtsduerf verbonnen an huet Waldbëlleg bei sengen heefege Visitten, déi lescht zwanzeg Joer vu sengem Liewen, bedeitend Done gemaach. Sou gouf de Bau vun enger Rëtsch Haiser vun him (mat)finanzéiert, dorënner och dee vun engem Danz- an Turnsall. D'Gebai hat bis 1944 faarweg Glasfënsteren aus de Folie-Bergères. De Paschtouer war géint dee 'frivole' Gebrauch, a sou gouf d'Gebai just als Stall a Scheier benotzt. Nodeem et laang eidel stoung an delabréiert ass, gouf et 2001 renovéiert an zanter 2002 vun der Gemengeverwaltung, sou wéi och als Festsall, benotzt.^[3]

Ënneranerem huet hien 1902 d'Harmonie vu Waldbëlleg gegrënnt.

Virum Gemengenhaus zu Waldbellëg steet zu senger Erënnerung, nieft der Büst vum Michel Rodange och eng vum André Hentges.

Literatur

Keiser, Jean F., 1989. André Hentges, le lutteur d'acier ou l'homme de coeur. In: Waldbëlleg 1989, Livre d'or. Chorale Ste Cécile Waldbillig, p. 83-93.
Keiser, Nicolas, 1962. André Hentges, le champion des champions. In: Fanfare Waldbillig 1902-1962, 60e Anniversaire et inauguration d'un nouveau drapeau. Luxembourg, p. 45-55.
Nilles, Léon N., 1970. André Hentges: im Ring unbesiegt. In: Revue, Nr. 34, 22. August 1970, S. 26-29. Digitised by the National Library of Luxembourg.
Union Grand-Duc Adolphe, 100 Jar Waldbëlleger Musek, Revue musicale de l'UGDA, N° 1, Januar 2002, S. 23.

Kuckt och

Referenzen

↑ Nilles 1970, S. 29; Keiser 1989, S. 92.
↑ Avis mortuaire. In: Luxemburger Wort, 1920. Jg., Nr. 371 (01.09.1920), S. 3. Digitised by the National Library of Luxembourg. — D'Begriefnes war den 2. September 1920 zu Waldbëlleg.
↑ Christina Mayer: Kanton Echternach. =Topographie der Baukultur des Großherzogtums Luxemburg Band 1. Luxemburg: Ministère de la Culture, Service des Sites et Monuments 2010, S. 513-514.

[1] Nilles 1970, S. 29; Keiser 1989, S. 92.

[2] Avis mortuaire. In: Luxemburger Wort, 1920. Jg., Nr. 371 (01.09.1920), S. 3. Digitised by the National Library of Luxembourg. — D'Begriefnes war den 2. September 1920 zu Waldbëlleg.

[3] Christina Mayer: Kanton Echternach. =Topographie der Baukultur des Großherzogtums Luxemburg Band 1. Luxemburg: Ministère de la Culture, Service des Sites et Monuments 2010, S. 513-514.

[1]

[2]

[3]