Artemis II

Artemis II
De Logo vun der Missioun
Typ	Bemannt Moundmissioun
Land	USA Kanada
Agentur	NASA
Ruffzeechen	Integrity
Dauer	9 d, 1 h, 32 Min, 15 Sek
Start	1. Abrëll 2026, 22:35:12 UTC
Startplaz	Kennedy Space Center, LC-39B
Drorakéit	SLS Block 1
Landung	11. Abrëll 2026, 00:07:27 UTC
Landungsplaz	Pazifik, viru San Diego
D'Crew vun der Artemis II: vlnr Christina Koch, Reid Wiseman (vir), Victor Glover an Jeremy Hansen

Artemis II (och alt Artemis 2; uganks Exploration Mission 2, gekierzt EM-2 ) war eng bemannt Raumfaartmissioun vun der NASA a Kooperatioun mat der europäescher an der kanadescher Weltraumagence. Véier Astronauten an engem Orion-Raumschëff, gradewéi d'Buedempersonal hunn d'Systemer an d'Prozedure getest, fir sech op zukünfteg bemannt Moundlandungen am Kader vum Artemis-Programm virzebereeden.

D'Artemis II ass den 1. Abrëll 2026 op Cape Canaveral gestart, de 6. Abrëll ronderëm de Mound geflunn an den 11. Abrëll am Pazifeschen Ozean, virun der Küst vu Kalifornien a Mexiko, nees gelant. Et war déi éischt bemannt Moundmissioun zënter der Apollo 17 am Dezember 1972.

Besatzung

Haaptekipp

D'Orion-Raumschëff huet Plaz fir véier Persounen. D'Crew vun der Artemis II war am Abrëll 2023 bekannt gemaach ginn; se bestoung aus:

Reid Wiseman, Kommandant (2. Weltraumfluch; USA / NASA )
Victor Glover, Pilot (2. Weltraumfluch; USA/NASA)
Christina Koch, Missiounsspezialistin (2. Weltraumfluch; USA/NASA)
Jeremy Hansen, Missiounsspezialist (1. Weltraumfluch; Kanada / CSA )

Reserveekipp

Jennifer Sidey-Gibbons, Missiounsspezialistin (Kanada/CSA fir den Hansen)
Andre Douglas (USA/NASA)

Fir d'Gibbons an den Douglas wär d'Artemis II hiren éischte Weltraumfluch gewiescht.

Ziler vun der Missioun

D'Missioun war den éischte bemannten Testfluch vum Orion-Raumschëff a senger Drorakéit, dem Space Launch System (SLS) an der Versioun Block- 1. Fir se fir zukünfteg Missiounen ze qualifizéieren, war d'Artemis II-Missioun entwéckelt gi fir ënner realistesche Fluchbedingungen all d'Systemer an d'Prozeduren ze testen, déi fir eng bemannt Moundmissiounen néideg sinn. Ënnert anerem goufen d'Navigatioun, d'Kommunikatioun, d'Liewenserhalung, den Undriff, den thermesche Schutz, den Neesantrëtt, gradewéi d'Rette vun der Kapsel geprouft. Zousätzlech goufen och Donnéeën iwwer d'Stralung, de Stress, d'Akustik an dat thermescht Ëmfeld gesammelt.

Billergalerie

„Hello, World“, opgeholl vum Reid Wiseman
Selbstportrait vum Raumschëff Orion um drëtten Dag vum Fluch
D'Mare Orientale (Mëtt vum Bild) op der Grenz tëscht der viischter an der hënneschter Säit vum Mound
„Äerdënnergang“ („Earthset“) wärend dem Moundëmlaf de sechsten Dag
D'Orion (lénks am Bild) kuckt wärend enger Sonnendäischtert op déi aner Säit vum Mound
Trennung vun der Orion-Kapsel (riets) an dem Servicemodul
D'Orion-Kapsel lant am Pazifeschen Ozean