Belvédère um Escher Gaalgebierg
 De Belvédère (2015) | |
| Koordinaten | 05° 59’ 08.7’’ E 49° 29’ 10.6’’ N |
|---|---|
| Baustil | neo-klassizistesch |
| Datum vum Bau | 1936 |
| Proprietär | Gemeng Esch-Uelzecht |
De Belvédère um Escher Gaalgebierg ass e Monopteros aus 10 Sailen, deen 1936 no engem Entworf vum Architekt Paul Flesch zu Esch-Uelzecht, um Gaalgebierg, iwwer dem Stadpark, opgeriicht gouf.
Sonndes, den 13. September 1936 gouf en am Kader vum 35. Anniversaire vum Verschéinerungsveräin, an enger Zeremonie ënnert dem Titel "Fêtes de la Beauté" ageweit. Dobäi gouf et moies e Cortège vun Troubadouren a Mandolinisten duerch d'Stad, an nomëttes eng Zeremonie beim Belvédère, bei där dräi jonk Dammen, déi als Pallas Athene, Artemis an Aphrodite verkleet waren, mat dobäi waren. Owes hunn d'Turnerinne vun der Eschois, och a griichesche Kostümen, zu griichescher Musek rhythmesch Dänz opgefouert.[1][2]
Virun dësen Zeremonie war e Kongress, op deem e kantonale Verschéinerungsveräin gegrënnt gouf. De Pavillon Belvédère war dann och konzipéiert, fir de Park um Gaalgebierg no uewen hin ofzeschléissen.
1937 koum e Kofferdaach op de Belvédère.[3]
Den Numm Belvédère deit drop hin, datt een deemools vun do eng gutt Vue no Nordwesten hin, bis an d'Arelerland eran, hat. Mëttlerweil ass déi Vue scho laang duerch Beem verspaart.
Literatur[änneren | Quelltext änneren]
- J. Van Dooren: Les 'Fêtes de la Beauté' à Esch-sur-Alz. in: La Meuse; ofgedréckt am Escher Tageblatt vum 28.9.1936.
- Artikel Le Belvédère Gaalgebierg, S. 294 am Buch: 100 Joer Esch - 1906-2006, Ville d'Esch-sur-Alzette (éd.), 2005, Éd. G. Binsfeld, 480 S., ISBN 2-87954-149-2
Referenzen[Quelltext änneren]
- ↑ Obermoselzeitung vum 9. Sept. 1936.
- ↑ Obermoselzeitung vum 17. 9. 1936.
- ↑ Obermoselzeitung vum 15.5.1937.