Blues-Club Lëtzebuerg

De Blues-Club Lëtzebuerg ass e Veräin ouni Gewënnzweck, dee sech zum Zil gesat huet, d'Blues-Musek an hir derivéiert Museksstiler z'ënnerstëtzen.

De Blues-Club organiséiert reegelméisseg Concerten, bei deenen international renomméiert Museker op der Affiche sinn, woubäi lokal oder regional Bluesgruppen d'Geleeënheet kréien, fir den éischten Deel ze spillen a sech domat en Numm ze maachen. D'Concerte vum Blues-Club fanne gewéinlech am Sang a Klang am Pafendall statt.

Do dernieft ass de Blues-Club un der Organisatioun vu verschidde Festivalle bedeelegt:

• Blues 'n' Jazz Rallye am Gronn an a Clausen, zanter 1995 all Joer Enn Juli an Zesummenaarbecht mat dem LCTO (Luxembourg City Tourist Office);
• Blues-Express zu Zowaasch an am Fonds de Gras, all Joer uganks Juli an Zesummenaarbecht mat der Gemeng Déifferdeng;
• Blues 'n' Jazz um Haff, all Joer Mëtt Juni an Zesummenaarbecht mat dem Päerdsatelier zu Mëtscheed.

Geschicht

De Veräi gouf den 9. Oktober 1997 gegrënnt an huet säi Sëtz an der Stad Lëtzebuerg. Grënnungsmemberen: Ben Boulanger, Vic Degrell, Claude Hastert, René Rieth, Fernand Rossi, Roland Trierweiler.

Affiliatiounen

De Blues-Club Lëtzebuerg ass Member vu follgend international Verbänn:

• The Blues Foundation
• European Blues Union

Bekannt Museker

Beispiller vun international bekannte Museker, déi de Blues-Club Lëtzebuerg bis ewell am Kader vu Concerte presentéiert huet: Carey Bell, Magic Slim, The Paladins, Studebaker John, Larry Garner, Debbie Davies, Mike Morgan & Lee Mc Bee, Deborah Coleman, Smokey Wilson, Otis Grand, D.C. Bellamy, Amos Garrett, Taildragger, Kinsey Report, Anson Funderburgh & Sammy Myers, Big George Jackson, Big Jack Johnson, Duke Robillard, Candye Kane, Bryan Lee, Omar & The Howlers, Phil Guy, Little Charlie & The Nightcats, Mojo Buford, Sonny Rhodes, Nick Moss & The Flip Tops, Canned Heat, Savoy Brown, Gary Primich, etc.

Publikatiounen

• Wärend e puer Joer huet de Blues-Club de Magazine Rollin & Tumblin erausbruecht, an deem op 120 Säiten Artikelen, Nouvellen, CD-Bespriechungen a Concerte presentéiert goufen.
• Zënterhier publizéiert de Blues-Club véiermol am Joer de Bluesnews, en Depliant deen an enger Oplo vu 4000 Exemplaire gedréckt gëtt.
• D'Fotobuch "10 Joer Bluesclub Lëtzebuerg: 1997–2007".
• D'Fotobuch "20 Joer Bluesclub Lëtzebuerg: 1997–2017".

Literatur

• Anonym, 2007. 10 Joer Blues-Club Lëtzebuerg: 1997-2007. Net paginéiert, 30 cm. Erausbruecht vum Blues-Club Lëtzebuerg.

Um Spaweck

• Homepage bluesclub.lu
• De Blues-Club um Facebook