Bow River

Bow River

Längt	587 km
Debit	129 m³/s
Fläch vum Anzuchsgebitt	26.200 km²
Haaptnieweflëss	Cascade, Elbow, Johnston Creek, Kananaskis, Spray, Highwood, Pipestone

De Bow River ass e 587 Kilometer laange Floss an der kanadescher Provënz Alberta.

Säi Quellegebitt läit an de kanadesche Rocky Mountains am Norde vum Banff-Nationalpark, wou en aus dem Bow Lake erausleeft. Dëse gëtt sengersäits mam Waasser aus dem Bow-Gletscher gespeist. De Bow River leeft ufanks 80 km a südsüdëstlecher Richtung duerch d'Bierger. Da béit en no Osten of a leeft laanscht d'Stiedche Banff, wou en an de Bow Falls 10 Meter fält, ier en dann d'Gemeng Canmore erreecht. Um Bord vun de Rocky Mountains gëtt de Floss zum Ghost Lake ogestaut. E leeft dann duerch d'Stad Cochrane an dono duerch d'Agglomeratioun vu Calgary.

Weider geet et an ëstlecher Richtung duerch d'Prärielandschaft vun Alberta. Beim Grassy Lake vereenegt e sech schliisslech mam Oldman River zum South Saskatchewan River.

De Bow River ass wichteg fir d'Bewässerung, d'Gewanne vun Energie an als Drénkwaasserressource. En ass och e wichtege Biotop an deem eng ganz Rëtsch Fëschaarte virkommen, wéi Reeboufrellen, Baachfrellen, Stéierfrellen (Salvelinus confluentus), an nach eng jett aner.

Wichteg Nieweflëss

• Pipestone River
• Spray River
• Cascade River
• Kananaskis River
• Ghost River
• Elbow River
• Highwood River
• Linkston River

Um Spaweck

Commons: Bow River – Biller, Videoen oder Audiodateien

• Geographical Names of Canada: Bow River
• https://www.britannica.com/place/Bow-River
• Bow River Basin Council