Eisebunnsstreck Grondhaff-Beefort

Vu Wikipedia
Op d'Navigatioun wiesselen Op d'Siche wiesselen

D'Eisebunnsstreck Grondhaff-Beefort, déi vun der Société anonyme luxembourgeoise des chemins de fer et minières Prince-Henri, kuerz "PH" genannt, exploitéiert gouf, war mat enger Längt vu 7,3 km eng vun de kierzten Eisebunnsstrecken zu Lëtzebuerg. Si ass de 4. November 1904 op der Deelstreck Grondhaff-Carrière vun Déiljen a Betrib geholl ginn, a gouf du bis op d'Beeforter Statioun fir de Persouneverkéier verlängert. Dat Stéck gouf de 5. November 1911 fir de Persouneverkéier opgemaach.

Eng gutt hallef Stonn hunn d'Reesender gebraucht, fir déi kuerz Streck vum Grondhaff op Beefort ze fueren. D'Streckeféirung war nämlech originell a komplizéiert. Den Zuch huet, fir de Bierg eropzekommen, am Zickzack no vir an hanne misse fueren. Am Géigesaz zu der Uschloss-Linn Dikrech-Iechternach war d'Streck Grondhaff-Beefort eng Schmuelspurbunn mat enger Spurbreet vun 1 Meter.

Wéinst hirer Onwirtschaftlechkeet gouf de Betrib op där Streck den 2. Mee 1948 agestallt. D'Streck hat keng eege Gidderween, soudatt d'Normalspurwaggonen op Rullbéck weidertransportéiert goufen.

Den Tracé gëtt haut nach gréisstendeels als Wanderwee profitéiert, sou zum Deel duerch d'Naturschutzgebitt Saueruecht.

Kuckt och[änneren | Quelltext änneren]

Um Spaweck[änneren | Quelltext änneren]