Elisabeth Stëftung
| Elisabeth Stëftung | |
|---|---|
 | |
| Rechtsform | Stëftung (Lëtzebuerg) |
| Grënnungsdatum | 1. Januar 2016 |
| Sëtz | Lëtzebuerg |
| 22, bd Joseph II | |
| President | Paul Prüssen[1] |
| RCS | G126 |
| Websäit | https://www.elisabeth.lu/ |
 | |
D'Elisabeth Stëftung ass eng lëtzebuergesch Fondatioun déi den 13. Juni 2006 gegrënnt gouf; mam Arrêté grand-ducal vum 24. Juli vum selwechte Joer goufen d'Statuten approuvéiert.
Elisabeth ass eng sozial Organisatioun, déi Servicer ubitt, déi op all Liewensetapp ugepasst sinn – a zwar an de Beräicher Kanner, Jugend, Behënnerung a Senioren. Hire Motto ass „Elisabeth am sozialen Déngscht“. All Dag ginn iwwer 4.000 Leit an de verschiddene Servicer, déi Elisabeth ubitt, betreit. Elisabeth gehéiert zu de gréissten Ubidder vu soziale Servicer zu Lëtzebuerg, mat iwwer 2.300 Mataarbechter, niewent dem Centre Hospitalier de Luxembourg, SERVIOR an der Fondatioun Hôpitaux Robert Schuman.[2]
Ziler vun der Stëftung
[änneren | Quelltext änneren]D'Haaptziler vun Elisabeth sinn:
„La Fondation a pour objet :
- la promotion, le soutien, la sauvegarde et la création d'institutions d'accueil, d'hébergement, de soins pour enfants et jeunes gens, personnes âgées, personnes dépendantes et handicapées, et de structures d'enseignement, ainsi que la promotion de l'encadrement social, culturel et religieux des personnes y accueillies,
- le soutien de projets et initiatives oeuvrant dans le domaine social, socio-éducatif, pédagogique, thérapeutique et des soins de santé.
La Fondation exercera son objet directement ou à travers les différentes oeuvres du Groupe Elisabeth auxquelles elle pourra apporter son concours et son soutien et dont elle assurera la supervision“
Geschicht
[änneren | Quelltext änneren]Um Ursprong vun Elisabeth ass d'Kongregatioun vun de Schwëstere vun der Helleger Elisabeth (CSSE), eng reliéis Organisatioun, déi 1672 gegrënnt gouf. Hiren Numm kënnt vun der Elisabeth vun Thüringen, déi bekannt war fir hir Aarbecht mat de Kranken an den Aarmen.
1869 huet d'Kongregatioun hiert éischt Altersheem zu Beetebuerg opgemaach, haut bekannt als Foyer Sainte Elisabeth.
1982 gouf Elisabeth als ASBL gegrënnt, deemools déi éischt ASBL fir Kannerbetreiungsstrukturen a fir de Secteur vu Leit mat Behënnerungen zu Lëtzebuerg. 2006 ass dunn d'Stëftung an d'Liewe geruff ginn.
2009 goufen déi verschidden Entitéiten, déi vun der Kongregatioun vun de Schwëstere vun der Helleger Elisabeth gegrënnt goufen, ënnert dem Numm “Elisabeth” zesummegefouert.
Am Joer 2016 hu sech d'Schwëstere komplett aus der Gestioun vun de Wierker vun Elisabeth zeréckgezunn, an hu Plaz fir en neie Verwaltungsrot gemaach.
Missioun
[änneren | Quelltext änneren]Elisabeth huet hir Wuerzelen an de chrëschtlech-soziale Wäerter vun den Elisabeth-Schwësteren. Zënter hirer Grënnung steet de Mënsch am Mëttelpunkt vun all Handelen. D'Missioun vun Elisabeth ass et, Hëllef a Wäerter wéi Dignitéit, Respekt a Wuelwëllen am Alldag ëmzesetzen. Gläichzäiteg dréit si zu enger méi inklusiver a solidarescher Gesellschaft bäi. D'Philosophie vun der Organisatioun baséiert op véier Wäerter: Respekt, Integritéit, Solidaritéit a Verantwortung. D'Visioun ass: “Eng Plaz fir jiddereen an enger inklusiver a mënschlecher Gesellschaft.”
Zousätzlech zu hire soziale Missiounen erkennt Elisabeth hir Responsabilitéit fir d'Ëmwelt un. Elisabeth engagéiert sech, nohalteg Praktiken an all hier Aktivitéiten z'integréieren, fir den ekologeschen Ofdrock ze reduzéieren. D'Organisatioun ass och Signataire vun der Charte de la bientraitance an der Charte de la diversité.
Elisabeth Enfance
[änneren | Quelltext änneren]D'Kannerbetreiungsstrukture vun Elisabeth Enfance bidden eng breet Pallett u Servicer fir Kanner, Jugendlecher a Famillen. Doriwwer eraus hëllefen si Elteren, Aarbecht a Famill ze verbannen.
D'Crèchen huele Kanner vun 2 Méint bis 3 oder 4 Joer (jee no Gemeng) op, an d'Maison-relaise betreie Kanner vun 3 bis 12 Joer a bidden eng frëndlech a pedagogesch wäertvoll Ëmgéigend.
D'Zil geet wäit iwwer d'Betreiung eraus: et geet drëms, sécher a léierstimuléierend Raim ze schafen, wou d'Kand sech entwéckele kann, a wou d'Famill am Alldag ënnerstëtzt gëtt.
D'Servicer fir Kanner, Jugendlecher a Famillen, déi a schwéiere Liewenssituatioune sinn, ginn op Uerder vum Jugendriichter oder op fräiwëlleger Basis organiséiert. Ofhängeg vum individuelle Besoin gëtt eng geziilt Betreiung garantéiert. Elisabeth bitt ambulant a stationär Betreiung, Wunngruppe fir onbegleet Mannerjäreg a betreite Wunne fir jonk Erwuessener un.
Zu Ëlwen gëtt et en Internat socio-familial, wou Kanner aus den Zyklen 2 bis 4 vun der Grondschoul e strukturéiert a séchert Ëmfeld fannen.
Elisabeth Jeunesse
[änneren | Quelltext änneren]Elisabeth Jeunesse bitt verschidde Strukture fir déi Jonk tëscht 12 a 26 Joer, absënns Jugendhaiser an en Aktivitéits- a Formatiounsservice.
D'Jugendhaiser bidden en Ëmfeld wou jonk Leit sech treffe kënne fir ze diskutéieren, Interessen ze deelen an u pedagogeschen a Fräizäitaktivitéiten deelzehuelen.
Den Animatiouns- a Formatiounsservice ass e komplementare Service deen eng Rei pedagogesch a Fräizäitaktivitéite fir jonk Leit ubitt. Dës Aktivitéite sinn entwéckelt fir jonke Mënschen ze hëllefen, sozial a perséinlech Fäegkeeten z'entwéckelen. Zousätzlech gi Vakanzenaktivitéiten a Kolonien ugebueden. D'Plattform babysitting.lu erméiglecht et Elteren, zouverlässeg Babysitter ze fannen.
École privée Marie-Consolatrice
[änneren | Quelltext änneren]D'Privatschoul Marie-Consolatrice (EPMC) bitt de Schülerinne vill méi wéi nëmmen eng akademesch Ausbildung. Scho vu Septième u kritt all jonkt Meedchen eng perséinlech Begleedung, déi hëlleft, schoulesch, sozial a perséinlech Kompetenzen z'entwéckelen. Mat engem Fokus op d'Entrepreneuriat an d'Aarbechtswelt fërdert d'EPMC den Initiativgeescht, d'Kreativitéit an d'Innovatioun, a mécht gläichzäiteg op aktuell ekonomesch an ekologesch Erausfuerderungen opmierksam. D'Schoul setzt sech dofir an, e gutt Ëmfeld ze bidden, dat d'Selbstvertraue stäerkt, d'Potenzial vun all Schülerin entfale léisst an op eng Zukunft mat vill Méiglechkeete virbereet.
Elisabeth Handicap
[änneren | Quelltext änneren]Elisabeth Handicap bitt ugepasst Servicer fir Kanner, Jugendlecher an Erwuessener mat enger intellektueller Behënnerung un – mam Zil, hir Autonomie, hiert Wuelbefannen an hir sozial Integratioun ze fërderen. Den Elisabeth Grupp geréiert zwee Centres d'hébergement fir Leit mat enger Behënnerung zu Betzder an zu Munneref, gradewéi betreit Wunnen an och semi-autonom Better. Zousätzlech gëtt et eng Dagesbetreiung, e Formatiounszenter an aacht Ateliers d'inclusion professionelle, geréiert vun der Yolande Coop, an deenen iwwer 100 Persoune mat enger Behënnerung agestallt sinn. Dës Atelieren hëllefen hinnen hir Fäegkeeten z'entwéckelen a si op den Aarbechtsmaart virzebereeden. Ee vun dësen Atelieren ass de Päiperleksgaart zu Gréiwemaacher. D'Epicerie beim LIS[Wien?] zu Rued-Syr bitt zousätzlech Ausbildungs- a Beschäftegungsméiglechkeeten. De Kontakt mat der Clientèle stäerkt d'Selbstvertrauen an hëlleft bei der sozialer Integratioun.
Elisabeth Senior
[änneren | Quelltext änneren]Elisabeth bitt Wunn- a Betreiungsstrukture fir eeler Mënschen, déi Selbststännegkeet, Dignitéit a Liewensqualitéit fërderen. An de moderne Wunnheemer steet e respektvollen, waarmen a séchere Kader am Mëttelpunkt – egal ob fir kuerz oder laang Openthalter. Multidisziplinär Ekippe suerge fir eng ëmfaassend Betreiung, déi all Aspekt vum Wuelbefanne berécksiichtegt.
De Club „Aktiv+ deForum“ zu Beetebuerg bitt eng grouss Villfalt u Aktivitéiten: Sport, Kreativatelieren, kulturell Ausflich a Gespréichsronnen, fir och am Pensiounsalter aktiv ze bleiwen.
Presidente vum Verwaltungsrot
[änneren | Quelltext änneren]| Vun | Bis | President |
|---|---|---|
| 09.01.2007 | 17.12.2024 | Rhett Sinner |
| 17.12.2024 | 2027 | Paul Prüssen |
Um Spaweck
[änneren | Quelltext änneren]Referenzen an Notten
[Quelltext änneren]- ↑ Nominatioun 17/12/2024, bis 2027
- ↑ Liste des principaux employeurs au Luxembourg classés par branche d'activité économique de la NACE Rév. 2. Situation au 1er janvier 2025 (édition juillet 2025), gekuckt den 18.10.2025.
- Offiziell Websäit vun Elisabeth – am sozialen Déngscht zu Lëtzebuerg
- Informatiounen aus de Publikatiounen vum Grupp Elisabeth (Berichter, Broschüren, Websäiten)