Europäeschen Dag vun de Sproochen

Den Europäeschen Dag vun de Sprooche geet op eng Initiativ vum Europarot zeréck. D'Zil vun dësem järlechen Aktiounsdag deen de 26. September ass, ass fir zur Valoriséierung vun alle Sproochen a Kulture bäizedroen, d'Bewosstsi vun de Virdeeler vu Sproochkompetenzen ze stäerken, déi individuell Méisproochegkeet ze fërderen an d'Leit an Europa ze motivéieren, Sprooche wärend hirem ganze Liewen ze léieren. Dobäi soll dat räicht Ierwe vun den 200 europäesche Sprooche bäibehale ginn.

Historeschen Hannergrond

Den Aktiounsdag ass fir d'éischt Kéier am Joer 2001, dem Europäesche Joer vun de Sproochen, organiséiert ginn; e war am Summer 2000 decidéiert ginn, ouni datt e prezisen Datum festgeluecht gouf. Nom Erfolleg, gouf de 6. Dezember 2001 decidéiert, vun 2002 un all Joer en "Europäeschen Dag vun de Sproochen" ze feieren, an esou d'Méisproochegkeet weiderhin ze fërderen. Den Dag gëtt zënterhier all Joer de 26. September gefeiert. Am Kader vum Aktiounsdag ënnerstëtzt den Europarot zesumme mat der Europäescher Unioun Initiativen, Aktiounen a Manifestatiounen am Zesummenhang mam Léiere vu Sproochen. A ronn 45 Länner ginn deen Dag spezifesch Aktiounen organiséiert, déi vum Europäeschen Zentrum fir Friemsproochen (ECML/CELV) vum Europarot zu Graz koordinéiert a mat lokale Partnerorganisatiounen an den eenzele Länner duerchgefouert ginn.

Den éischten „Dag vun der Lëtzebuerger Sprooch“ ass um „Europäeschen Dag vun de Sproochen“, de 26. September 2025, organiséiert ginn^[1]^[2].

Sproochen an Europa

Bannent der Europäescher Unioun

Offiziell Sproochen:
- zënter 1957, am Europa vun de Sechs: Däitsch, Franséisch, Italieenesch an Hollännesch;
- zënter 1973, am Europa vun den Néng: déi viregt 4 + Dänesch an Englesch;
- zënter 1981, am Europa vun den Zéng: déi viregt 6 + Griichesch;
- zënter 1986, am Europa vun den Zwielef: déi viregt 7 + Portugisesch a Spuenesch;
- zënter 1995, am Europa vun de Fofzéng: déi viregt 9 + Finnesch a Schweedesch;
- zënter 2004, am Europa vun de fënnefanzwanzeg Staaten: déi viregt 11 + Estnesch, Lettesch, Litauesch, Malteesesch, Polnesch, Slowakesch, Slowenesch, Tschechesch an Ungaresch;
- zënter 2007, am Europa vun de Siwenanzwanzeg: déi viregt 20 + Bulgaresch, Iresch (Vertragssprooch zënter 1973) a Rumänesch;
- zënter 2013, am Europa vun den Aachtanzwanzeg: déi viregt 23 + Kroatesch.
Hallef-offiziell Sproochen: Baskesch, Galizesch, Katalanesch, Lëtzebuergesch;
Keng offiziell Sproochen: Bretonesch, Friulesch, Frisesch, Kaschubesch, Korsesch, Ladinesch, Nidderdäitsch, Okzitanesch, Samesch, Sardesch, Sorbesch an anerer.