Europäescht Amt fir humanitär Hëllef

Vu Wikipedia
Wiesselen op: Navigatioun, sichen

D'Europäescht Amt fir humanitär Hëllef (engl. European Commission Humanitarian Office - ECHO), ass deen Departement vun der Europäescher Kommissioun, dee sech mat der humanitärer Hëllef an dem Schutz vun der ziviler Bevëlkerung an Drëttlänner befaasst.

2013 huet d'EU iwwer ECHO 1,35 Milliarden Euro fir Nouthëllefsmoossnahmen zur Verfügung gestallt.[1] Zanter 2000 war d'EU all Joer den zweetgréissten Donateur vun humanitärer Hëllef (d'Donnéeë si bis 2012 verfügbar). Zesumme mat hire Memberstaaten ass d'EU de gréissten Donateur vun Humanitärer Hëllef, am Joer 2009 hu si zesummen iwwer 50% vun der ganzer humanitärer Hëllef bereetgestallt.[2] D'Projeten, déi vun ECHO finanzéiert ginn, betreffen all Joer iwwer 120 Millioune Leit an 90 verschiddene Länner.[3]

Am Kader vu sengen humanitären Interventiounen setzt ECHO selwer keng Hëllefsprogrammer ëm, mä finanzéiert Operatiounen iwwert en Netzwierk vun iwwer 200 Partner (ONGen, UN-Agencen an international Organisatioune wéi d'Bewegung Croix Rouge/Croissant Rouge).[4] 2013 hat ECHO 44 lokal Büroen an 39 Länner, mat 149 internationalen humanitären Experten an 315 nationale Mataarbechter. Déi lokal Büroen analyséieren déi aktuell a künfteg Besoinen a bestëmmte Länner oder Regiounen, droen zu der Entwécklung vun den Interventiounsstrategien an der Politik bäi, bidden technesche Support fir d'Aktiounen, déi vun ECHO finanzéiert ginn, suerge fir eng adequat Iwwerwaachung vun dësen Interventiounen a facilitéieren dem Donateur seng Koordinatioun op der Plaz.[5]

ECHO stellt awer net nëmme finanziell Mëttel fir humanitär Hëllef zur Verfügung mä ass och responsabel fir den EU Zivilschutz-Mechanissem. Dee Mechanissem, deen 2001 an d'Liewe geruff gouf, fërdert d'Zesummenaarbecht tëscht den nationalen Autoritéite fir Zivilschutz an Europa. Momentan sinn 31 Länner Member vun deem Mechanissem; et sinn dat déi 28 EU Memberstaaten an zousätzlech Island, Norwegen an déi FJR Mazedonien. Dëse Mechanismus war ageriicht gi fir eng koordinéiert Hëllef vun de deelhuelende Staaten fir d'Affer vun Natur- oder vum Mënsch verursaachte Katastrophen an Europa a soss an der Welt z'erméiglechen.

Nodeems d'EU 2012 mam Nobelpräis ausgezeechent gouf, huet d'Kommissioun Barroso d'Präisgeld fir d'EU entgéintgeholl an et enger neier Initiativ mam Numm Children of Peace (Kanner vum Fridden) zougesprach. 2013 si ronn 2 Milliounen Euro a Projete vu Children of Peace gefloss. Dëse Betrag ass 2014 op 4 Milliounen Euro erhéicht ginn.[6]

Geschichtlech Entwécklung[änneren | Quelltext änneren]

De Büro fir Humanitär Hëllef vun der Europäescher Communautéit (ECHO) gouf 1992 vun der zweeter Delors-Kommissioun gegrënnt. No der Ofschafung vun der Europäescher Communautéit am Joer 2009 gouf de Büro ënner dem Numm Departement fir Humanitär Hëllef vun der Europäescher Kommissioun oder Europäescher Unioun bekannt, huet seng Ofkierzung ECHO awer bäibehalen. D'Ernennung, am Joer 2010, vun engem neie Kommissär fir de Ressort International Zesummenaarbecht, Humanitär Hëllef a Krisenhëllef berout op den Artikelen 214 an 196 vum Vertrag vu Lissabon, an deem d'humanitär Hëllef an den Zivilschutz eng zentral Roll spillen. Den offiziellen Numm ECHO gouf ëmgeännert a Generaldirektioun fir Humanitär Hëllef an Zivilschutz. Bei dësem Changement ass och d'Unitéit Zivilschutz vun der GD Ëmwelt an d'GD ECHO verluecht ginn. All dës Ännerunge gëllen als e Schratt an d'Richtung vun enger besserer Zesummenaarbecht a méi schnellen Decisiounen an engem Beräich an deem rapid Reaktioune Liewe rette kënnen.

Am Kader vum EU Zivilschutz-Mechanismus gouf och deen neien Emergency Response Coordination Centre (ERCC) (Koordinatiounszentrum fir de Katastropheschutz) opgemaach, en „Zivilschutz-Hub“ deen et erlaabt, Katastrofen ze suivéieren a Länner, déi heefeg Katastrofen ausgesat sinn, besser ze preparéieren a méi widderstandsfäeg ze maachen. Fir d'lescht zum Asaz komm ass deen Zivilschutz-Mechanismus bei den Iwwerschwemmungen a Bosnien Herzegovina an a Serbien.[7]

Missioun an Grondsätz[änneren | Quelltext änneren]

Am Beräich vun der humanitärer Hëllef besteet d'Missioun vun ECHO doran, den Affer vu Konflikter an Natur- oder vum Mënsch verursaachte Katastrophen ausserhalb vun der EU Nouthëllef an Ënnerstëtzung ze bidden. Dës Missioun ëmfaasst och d'Preventioun vu Katastrofen an Hëllefsmoossnahmen no der Kris.

Déi europäesch humanitär Hëllef baséiert op den humanitäre Grondsätz vu Mënschlechkeet, Neutralitéit, Onparteilechkeet an Onofhängegkeet. Hir Ëmsetzung hänkt deemno vun der Uwendung vum humanitäre Vëlkerrecht of (HVR).[8]

Mënschlechkeet bedeit, datt mënschlecht Leed iwwerall do, wou et optrëtt, ze bekämpfen ass, woubäi deene Schwächsten an eiser Gesellschaft déi gréisst Opmierksamkeet zousteet.

Neutralitéit bedeit, datt humanitär Hëllef an engem arméierte Konflikt oder aneren Ausenanersetzungen net Partei fir eng Säit ergräifen däerf.

Onparteilechkeet bedeit, datt humanitär Hëllef nëmmen nom Critère vun der Bedierftegkeet, ouni Diskriminatioun, zougestanen ginn däerf.

Onofhängegkeet bedeit d'Autonomie vun den humanitären Ziler par rapport zu politeschen, wirtschaftlechen, militäreschen oder aneren Ziler.

2007 huet d'Europäesch Kommissioun, op Initiativ vum Kommissär Louis Michel, en „Europäesche Konsens iwwer d'humanitär Hëllef“ verabschit, an dat wor den éischten europäesche politesche Referenztext zum Thema humanitär Hëllef.[9] D'ONGe woren aktiv um Ausschaffe vum Europäesche Konsens bedeelegt, an dëst Dokument kann als deen Text betruecht ginn, „deen am vollstännegsten ass an deen déi gemeinsam Positioun erëmspigelt, déi am nooste bei den ONGen ass“.[10] Den Europäesche Konsens reaffirméiert d'humanitär Grondsätz vu Mënschlechkeet, Onparteilechkeet, Neutralitéit an Onofhängegkeet. E leet och fest: „Humanitär Hëllef ass kee Gestiounsinstrument fir Krisemanagement“.

2012 huet ECHO de Konsens fir d'éischte Kéier iwwerschafft an dobäi ënnerstrach, datt méi staark Partenariater duerch eng qualitativ besser Selektioun vun de Partner gebraucht ginn. D'Rechenschaftsflicht vis-à-vis vun de Bierger an de Stakeholderen soll och verbessert ginn.[11]

2012 hunn ECHO an aner Donateuren och mam Inter-Agency Standing Committee (IASC – Interinstitutionelle Comité Permanent) zesummegeschafft fir den Transformatiounsprogramm (Transformation Agenda) op d’Been ze stellen. Et gouf sech dobäi gëeenegt op d'Grondsätz vun humanitärem Leadership, Rechenschaftspflicht a Koordinatioun, fir d'Rapiditéit, d'Efficacitéit an d'Wierksamkeet vun humanitären Hëllefsmoossnahmen ze verbesseren. Ausserdeem gouf festgeluecht, datt den Zivilschutz zu de Missioune vun ECHO gehéiert, fir eng besser Koordinatioun an e bessere Schutz während der Katastroph tëscht Drëttlänner, de regionale Länner an den internationalen Organisatioune sécherzestellen.

Legislatioun[änneren | Quelltext änneren]

Zanter datt de Vertrag vu Lissabon a Kraaft getrueden ass, ënnerläit d'humanitär Hëllef vun der Europäescher Unioun dem Artikel 214 vum Vertrag iwwer de Fonctionnement vun der Europäescher Unioun.[12] Humanitär Hëllef ass eng gedeelten a parallel Kompetenz: dat heescht, datt d'Unioun eng autonom Politik féiert, déi weder d'Memberstaaten dovun ofhält, hir Kompetenzen auszeüben nach d'Politik vun der Unioun zu enger renger „Komplementär-Politik“ par rapport zu där vun de Memberstaate mécht.[13]

Bis dohin huet d'humanitär Hëllef sech – par défaut – op Artikel 179 vum Vertrag vun der EC (Entwécklungspolitik) baséiert. Et wor en Deel vum Ressort vum Kommissär fir Entwécklung, fir d'éischt de Louis Michel an duerno de Karel de Gucht während der Barroso-Kommissioun. De Vertrag vu Lissabon huet fir d'éischte Kéier humanitär Hëllef als eegestänneg Politik am EU-Vertrag verankert. Den Artikel 214 leet fest, datt d'Moossnahme vun der EU am Beräich vun der humanitärer Hëllef dozou bestëmmt sinn, Leit aus Drëttlänner, déi Affer vun Natur- oder duerch de Mënsch verursaachte Katastrophe gi sinn, ad hoc-Hëllef an Ënnerstëtzung ze bidden. Den Artikel 214 widderhëlt och d'Grondsätz vun der humanitärer Hëllef, d.h. de Respekt vum internationale Recht an d'Grondsätz vun der Mënschlechkeet, Onparteilechkeet, Neutralitéit an Net-Diskriminatioun.[4]

D'Kommissioun huet 2013 eng nei Gesetzgebung iwwert den EU Zivilschutz-Mechanismus verabschit, déi iwwert de Wee vu méi Koordinatioun an Ënnerstëtzung d'Efficacitéit vun der Preventioun a der Virbereedung souwéi vun den Hëllefssystemer während de Katastrophe verbessere soll. Duerch dës Gesetzgebung gouf e fräiwëllege Pool vun zougesoten Hëllefskapazitéiten a –material, e Formatiounsnetzwierk fir Eischtversuerger an eng nei Approche fir de Katastrophen-Risk Management vun de 31 deelhuelenden Staaten ageriicht.[14]

De Vertrag vu Lissabon féiert och en Europäesche Fräiwellegekorps fir humanitär Hëllef an (Artikel 214 vum Vertrag iwwer de Fonctionnement vun der EU), deen et den Europäer, déi sech direkt un humanitären Aktioune bedeelege wëllen, erlaabt, matzemaachen.

Benevole Hëllef aus der EU[änneren | Quelltext änneren]

D'Europäesch Kommissioun huet eng Initiativ an d'Liewe geruff, an där hirem Kader iwwer 18 000 Plaze geschafe goufen, fir datt Bierger sech weltwäit tëscht 2014- 2020 benevole an humanitären Aktiounen engagéiere kënnen. Bei dëser Initiativ ginn déi Fräiwëlleg am Kader vun engem europäeschen Trainingsprogramm zesummen ausgebilt, ier si bei certifiéierten humanitären Organisatiounen agesat ginn.[15] Fir fënnef Pilotprojeten, bei deenen 2012 ronn 150 Benevoller zum Asaz komm sinn, goufe finanziell Mëttel, haaptsächlech fir den Opbau vun der Widderstandsfäegkeet an den Zivilschutz, bereetgestallt.

D'Europäescht Parlament (EP) huet dës Initiativ am Februar 2014 gestëmmt. Déi Benevolle kënnen entweder weltwäit bei humanitären Aktiounen, déi vun der EU finanzéiert ginn, agesat ginn, bei humanitären Organisatioune bannent der EU schaffen oder d'Aktiounen online vun doheem ënnerstëtzen.[16]

Bedeelegt ONGe mussen sech engem Certificatiounsprozess ënnerzéie fir sécherzestellen, datt si déi europäesch Norme fir den Ëmgang mat Benevolle respektéieren.

Budget[änneren | Quelltext änneren]

2013 huet ECHO iwwert en Hëllefsbudget vu dat ass manner wéi ee Prozent vum gesamten EU-Budget. Zousätzlech dozou huet d'Europäesch Kommissioun hir Nouthëllefreserve benotzt, fir op Krisen an onerwaarte Katastrophen ze reagéieren. Zesumme mat de Reservefonge loung de Budget 2013 bei 1,35 Milliard Euro. Wat d'humanitär Hëllef ubelaangt huet ECHO iwwer 124 Millioune Leit an 90 Net-EU-Länner humanitär ënnerstëtzt, wouvun der 39 als Krisegebidder bezeechent goufen. Am Beräich Zivilschutz gouf den entspriechende Mechanismus 2013 36 Mol wéint Krise in- an ausserhalb vun Europa aktivéiert.

De gréissten Deel vun de Fonge gëtt fir Liewensmëttel an Ernährung agesat (40%). Déi aner Haaptaktivitéitsberäicher si Gesondheet a Medezin (inklusiv psychologesche Support) (13%), Waasser a sanitär Ariichtungen (13%), Logement (19%) a Schutz (7%). ECHO huet 3% vum Budget 2013 benotzt fir d'Preparatioun op Katastrophen, dat ass manner wéi am Joer 2012. Fir den Zivilschutz sinn 2013 2% vum Budget agesat ginn.

2012 goungen 40% vum Budget an Afrika an 18% an Asien, Latäinamerika, de karibeschen a pazifesche Raum an 32% an de Mëttleren Osten an d'Mëttelmierlänner.[17]

Am Joer 2010 huet d'Entwécklungshëllef en historeschen Héichpunkt erreecht. Zesumme mat de Fongen, déi d'Memberstaaten individuell verginn, ass d'Unioun de gréissten Donateur vun Hëllefsmëttel op der Welt. Vun den 9,8 Milliarden Euro humanitärer Hëllef, déi 2010 weltwäit bereetgestallt goufen, koume ronn 41% aus der EU.[18]

De Budget, deen 2014 adoptéiert gouf, gesäit bal 1 Milliard Euro un Engagementer fir humanitär Hëllef an Zivilschutz vir.[19]

Strategie[änneren | Quelltext änneren]

ECHO huet als Missioun, an Noutsituatiounen an direkt duerno Liewen ze retten an ze schützen, egal ob et sech ëm Naturkatastrophen oder ëm Katastrophen, déi de Mënsch verursaacht huet, handelt. Dëse Grondsätz no huet d'Kommissioun sech engagéiert, all Joer e Strategiedokument auszeschaffen, fir d'Aktivitéiten efficace an adequat ze koordinéieren an ze plangen, an dat mat enger onparteilecher a besoinsorientéierter Approche.

2013 hat ECHO geplangt, seng humanitär Hëllef op ronn 90 Länner ze konzentréieren. Als déi fënnef gréissten humanitär Aktiounsgebidder huet ECHO d'Sahel-Regioun a Westafrika, einschliisslech weider Hëllef fir de Konflikt am Mali (82 Milliounen Euro), Sudan a Südsudan (80 Milliounen Euro), d'demokratesch Republik Kongo (54 Milliounen Euro), Pakistan (42 Milliounen Euro) a Somalia (40 Milliounen Euro) festgeluecht. Des Weidere sinn 40% vun der humanitärer Hëllef vun ECHO fir afrikanesch Länner südlech vun der Sahara bestëmmt.[20]

De Reservebudget gouf benotzt fir op grouss humanitär Krisen a Syrien, dem Mali, dem Sahel, dem Südsudan, der Demokratescher Republik Kongo, Myanmar an die Philippinen. Donieft ënnerstëtzt ECHO och vergiesse Krisegebidder zum Beispill am Bangladesh, a Kolumbien, dem Yemen, Algerien, Pakistan a Myanmar.

Ëffentlech Meenung[änneren | Quelltext änneren]

Eng speziell Eurobarometer-Ëmfro zum Thema humanitär Hëllef, déi 2012 duerchgefouert gouf, weist dat grousst Solidaritéitsgefill vun europäesche Bierger fir Affer vu Konflikter an Naturkatastrophen baussent hire Grenzen, woubäi 9 vun 10 Bierger mengen datt et „wichteg ass, datt d'EU humanitär Hëllef ausserhalb vun hire Grenze finanzéiert“, an 8 vun 10 mengen datt „eng koordinéiert EU-Aktioun am Beräich vum Zivilschutz méi efficace ass, wéi Aktioune vun eenzelne Länner“.[21]

Um Spaweck[änneren | Quelltext änneren]

  1. ECHO Humanitarian Aid Factsheet 2013
  2. Global Humanitarian Assistance website
  3. ECHO Annual Report 2012
  4. 4,0 4,1 European Parliament Factsheet on the European Union: Humanitarian Aid
  5. ECHO Field Network [1], ECHO, retrieved 29-07-2014.
  6. EU dedicates its Nobel Peace Prize to Education projects for Children in Conflict. Retrieved 27-06-14.
  7. EU Civil Protection [2] Retrieved 23-07-2014.
  8. Summaries of the EU legislation
  9. European consensus on humanitarian aid, [3], Retrieved 2014-07-03
  10. Pierre Salignon, "L'Europe humanitaire en question(s)" [4], Humanitaire, 19, Été 2008. 2009-10-23. Retrieved on 2012-01-16
  11. Annual Report on the Implementation of the European Consensus on Humanitarian Aid – 2012 [5]
  12. Treaty on the functioning of the European Union [6], Official Journal of the European Union, 2010-03-30
  13. Treaty of Lisbon: questions and answers
  14. Trend, Eastern Partnership countries to gather for civil protection meeting, 10-06-14. Retrieved 27-06-14.
  15. EU Aid Volunteers: Commission proposes new global humanitarian initiative [7]
  16. New EU aid volunteers program to make a 'concrete, positive difference' [8], Richard Jones, Devex. 2014-02-26. Retrieved 2014-06-23.
  17. ECHO 2013 Annual Report
  18. ECHO, ECHO's finances
  19. ECHO, Humanitarian aid and civil protection – 2014 Adopted budget
  20. Where the European Commission's humanitarian aid will go in 2013 [9],10-01-2013. Retrieved 27-06-2014.
  21. Eurobarometer survey on humanitarian aid: Europeans care – and endorse the Commission's mandate [10], European Commission. 2012. Retrieved 23-07-2014