Lëtzebuerger Landesverband fir Beienzuucht

Lëtzebuerger Landesverband fir Beienzuucht
Grënnungsdatum	Januar 1986
Sëtz	Wuermer Bierg
	24, Hënneschtgaass
Presidentin	Alexandra Arendt
Sekretär	Pol Schroeder
Tresorier	Paul Koedinger
RCS	H124
Websäit	https://apis.lu

De Lëtzebuerger Landesverband fir Beienzuucht (Fr.: Fédération des unions d'apiculteurs du Grand-Duché de Luxembourg, kuerz FUAL) ass eng lëtzebuergesch ASBL. Et ass den Daachverband vun de Beienziichter an e vertrëtt d'Interessie vun der Imkerei zu Lëtzebuerg. De Veräin gouf am Januar 1986 gegrënnt.

De Landesverband mat Sëtz zu Wuermer besteet aus zwielef Kantonalveräiner, an deenen d'Beienziichterinnen a Beienziichter op kantonalem Niveau organiséiert sinn.

D'Ziler vum Landesverband sinn:

• d'Verbesserung vun der Praxis vun der Beienzuucht,
• d'Vermaarte vun de Beieprodukter,
• d'Schafe vun enger besserer Ëmwelt fir Bestëbserinsekten,
• d'Vertriede vun den Interessie vun der Beienzuucht an der Gesellschaft a vis-à-vis vun der Politik.

De Landesverband zielt 410 Beienziichter(-innen) mat ronn 6000 Beievëlker (Stand 2018).

E puer Eckdaten iwwer d'Beienzuucht zu Lëtzebuerg:

• Den Duerchschnëttsalter vun de Beienziichter(-innen) ass 58 Joer;
• Am Duerchschnëtt hunn d'Beienziichter(-innen) 12 Joer Erfarung mat der Beienzuucht;
• 89% vun de Beienziichter(-innen) bedreiwen d'Beienzuucht als Hobby an hu manner wéi 30 Beievëlker;
• Den Undeel vun der Bio-Beienzuucht läit bei 4,9 %;
• Zënter 2014 huet de Landesverband en eegene "Beieberoder".

De Landesverband publizéiert d'Lëtzebuerger Beien-Zeitung, déi all Mount op ronn 32 Säite follgend Theeme behandelt: Beienzuucht, Imkereitechnik, Landwirtschaft an Ëmwelt, wëssenschaftlech Neiegkeeten a Liesenswäertes aus de Kantonalveräiner.

Literatur

• Eickermann, M., 2018. Die Imkerei in Luxemburg vor grossen Herausforderungen. forum 387: 29-31.

Um Spaweck

• apis.lu D'Internetsäit vum Landesverband