Foussball-Europameeschterschaft

Dësen Artikel beschäftegt sech mat de Foussball-Europameeschterschafte vun de Männer. Fir d'Europameeschterschaft vun de Fraen, kuckt Fraefoussball-Europameeschterschaft. Fir aner Bedeitungen, kuckt wgl. Europameeschterschaft.

D'Foussball-Europameeschterschaft (Euro oder EM) ass en Turnéier fir Foussballnationalekippe vun den nationale Foussballverbänn aus Europa, deen all véier Joer ofgehale gëtt. Organisateur ass den europäesche Foussballverband UEFA. Et gëtt souwuel Europameeschterschaften fir d'Häre wéi och fir d'Dammen.

Wéi a wou gespillt gëtt[änneren | Quelltext änneren]

Nom offiziellen UEFA-Reglement ass d'Turnéier an eng Vir- an eng Ennronn gegliddert. D'Virronn gëtt eng am Meeschterschaftsmodus ausgedroen, Qualifikatioun mat Hin- a Réckspiller. D'Ennronn gëtt an der Gruppephase an de Finalmatcher ausgedroen. Dat, wat UEFA-intern als Ennronn bezeechent gëtt, ass dat eigentlecht vum Ausriichter organiséiert Turnéier vu ronn dräi Wochen a gëtt allgemeng als "Foussball-Europameeschterschaft" bezeechent.

De Gewënner vun der Foussball-Europameeschterschaft ass, genee sou wéi och de Weltmeeschter, d'Ausdroungsland an d'Gewënner vun den anere fënnef kontinentale Concoursen (Afrikameeschterschaft, Asienmeeschterschaft, Copa América, Gold-Cup an OFC-Natiounen-Pokal) fir den nächste FIFA-Konfederatioune-Pokal qualifizéiert.

D'Recht, d'Foussball-Europameeschterschaft auszeriichte wiesselt permanent a gëtt vun der UEFA no Bewäertung vun de Kandidature verginn. Et spille 16 Ekippe mat, déi sech an der EM-Qualifikatiounsronn qualifizéiert hunn, opgedeelt a véier Gruppe vun all Kéier véier Ekippen.

All Ekipp absolvéiert, well an enger Grupp jiddwer Ekipp géintenee spillt, dräi Gruppematcher. Déi zwou éischt Ekippen aus all Grupp kommen an d'Véierelsfinall, wou den Eliminatiounssystem ufänkt, de Verléierer aus all Match scheet aus. Bei der Euro 2004 huet d'Reegel vum Silver Goal gegollt, déi duerno awer erëm ofgeschaaft gouf.

D'Lëtzebuergesch Foussballnationalekipp war an der Virronn vun der EM 1964 mat dobäi. No dem 2:1 (1:1) géint Holland an der Aachtelsfinall, sinn d'Léiwen awer dunn, nodeem se mat 3:3 (2:2) an der Halleffinall géint Dänemark gläich gespillt hunn, am Play-Off-Match mat 0:1 (0:1) ausgescheet.

Den amtéierende Foussball-Europameeschter ass, zanter der leschter EURO 2020/21, Italien.