Op den Inhalt sprangen

Guillaume vu Lëtzebuerg

Vu Wikipedia
Dësen Artikel beschäftegt sech mat dem Ierfgroussherzog Guillaume. Fir Leit mat engem änlechen Numm, kuckt wgl. Guillaume vu Lëtzebuerg (Homonymie).
Guillaume vu Lëtzebuerg
Titelen
Lieutenant-Représentant vu Lëtzebuerg
Zäit zanter dem 8. Oktober 2024
Ierfgroussherzog vu Lëtzebuerg
Zäit zanter dem 18. Dezember 2000
Biographie
Gebuer 11. November 1981
Maternité Grande-Duchesse Charlotte
Bestuet mat Stéphanie vu Lëtzebuerg
Papp Henri vu Lëtzebuerg
Mamm Maria Teresa Mestre
Geschwëster Félix vu Lëtzebuerg, Louis vu Lëtzebuerg, Alexandra vu Lëtzebuerg, Sébastien vu Lëtzebuerg
Kanner Charles vu Lëtzebuerg, François vu Lëtzebuerg
De Monogramm

De Guillaume Jean Joseph Marie vu Lëtzebuerg, gebuer den 11. November 1981 an der Maternité Grande-Duchesse Charlotte an der Stad Lëtzebuerg, ass Prënz vu Lëtzebuerg a Prënz vun Nassau a vu Bourbon-Parma. Hien ass den 18. Dezember 2000 offiziell zum Ierfgroussherzog vu Lëtzebuerg an den 8. Oktober 2024 Lieutenant-Représentant ernannt ginn.

Iwwersiicht

Hien ass den eelste Jong vum Groussherzog Henri vu Lëtzebuerg an der Groussherzogin Maria Teresa.

Hien ass am Lycée Robert-Schuman an der Stad Lëtzebuerg an an de Schwäizer Pensionater Beau Soleil an Institut Le Rosey an de Lycée gaangen an huet duerno op der Royal Military Academy Sandhurst, bei Camberley am Berkshire an England eng Offizéieschausbildung gemaach.

Vun 2000 bis 2011 huet de Prënz Guillaume de Verwaltungsrot vun der Fondatioun Kräizbierg presidéiert, déi sech an den Déngscht vun handicapéierte Leit setzt. Am Mäerz 2011 huet de Prënz d'Éierepresidentschaft vun dëser Fondatioun akzeptéiert.

Hie gouf den 23. Juni 2009, um Nationalfeierdag, zum Majouer vun der Lëtzebuerger Arméi ernannt. Duerch en Arrêté grand-ducal vum 25. Mee 2012 gouf hie Lieutenant-colonel genannt, an dëst mat Wierkung vum 23. Juni 2012 un[1],[2].

Seng Geschichts- a Politologiestudien op der Universitéit vun Durham huet en net ofgeschloss.

Wéi och säi Papp, wéi deen Ierfgroussherzog war, ass hien Éierepresident vum Board of Economic Development (zanter Ufank 2001). Hie war och zanter dem 24. Juni 2005 Member vum Staatsrot, huet dee Posten awer opginn wéi e Lieutenant-Représentant genannt gouf[3].

Sou wéi säi Papp, de Grand-Duc Henri, dat am Kader vum Nationalfeierdag 2024 ugekënnegt hat[4], huet dësen den 8. Oktober 2024 dem Prënz Guillaume d'Lieutenance iwwerdroen.[5]

An der Chrëschtusproch vun 2024 huet de Grand-Duc Henri matgedeelt, datt hien den 3. Oktober 2025 zerécktriede géif, sou dass de Guillaume dann neie Grand-Duc kéint ginn.[6]

Famill

De 27. Abrëll 2012 huet hie sech mat der Gräfin Stéphanie de Lannoy verloobt. Den 19. Oktober 2012 huet de Stater Buergermeeschter Xavier Bettel d'Koppel am Gemengenhaus um Knuedler an der Stad Lëtzebuerg zivil bestuet. Déi kierchlech Feier war den 20. Oktober 2012 an der Kathedral vun der Stad Lëtzebuerg a gouf vum Äerzbëschof Hollerich zelebréiert.

Kanner

D'Koppel huet zwéi Jongen:

Den 10. Mee 2020 koum um 5:13 an der Maternité Grande-Duchesse Charlotte an der Stad Lëtzebuerg hire Jong Charles Jean Philippe Joseph Marie Guillaume op d'Welt.[7]

De 27. Mäerz 2023 koum um 10:04 an der Maternité Grande-Duchesse Charlotte an der Stad Lëtzebuerg hiren 2. Jong François Henri Luis Marie Guillaume op d'Welt.[8]

Gielercher

Kuckt och

Um Spaweck

Commons: Guillaume vu Lëtzebuerg – Biller, Videoen oder Audiodateien

Referenzen

  1. ↑ wort.lu, 18. Juni 2012.
  2. ↑ (fr)Armée - Nomination. legilux.public.lu (11.06.2012). Gekuckt de(n) 14.08.2020.
  3. ↑ (lb)Papp a Fils am Interview: Prett fir eng nei Etapp an hirem Liewen. www.rtl.lu. Gekuckt de(n) 08.10.2024.
  4. ↑ (fr)Annonce de la Lieutenance de Son Altesse Royale le Grand-Duc Héritier | Cour grand-ducale. monarchie.lu. Gekuckt de(n) 24.06.2024.
  5. ↑ Kevin Kayser a Pierre Weimerskirch: "Lieutenant-Représentant huet Eed ofgeluecht: 'Nei Etapp, déi fir déi ganz Famill ufänkt', esou den Ierfgroussherzog." rtl.lu, 08.10.2024.
  6. ↑ (lb)Chrëschtusprooch vum Grand-Duc Henri: Den 3. Oktober 2025 ass den offiziellen Datum vum Trounwiessel um Haff. www.rtl.lu. Gekuckt de(n) 24.12.2024.
  7. ↑ "Naissance du premier enfant du couple héritier." op monarchie.lu, 10. Mee 2020.
  8. ↑ (fr)Naissance de S.A.R. le Prince François. monarchie.lu (17.3.2023). Gekuckt de(n) 27.3.2023.
  9. ↑ Memorial B n° 103 vun 2012 mat der Lëscht vun de Leit déi 2012 eng national Auszeechnung kritt hunn
  10. ↑ 10,0 10,1 10,2 (fr)S.A.R. le Grand-Duc Héritier | Cour grand-ducale. www.monarchie.lu. Gekuckt de(n) 26.07.2023.
Vun „https://lb.wikipedia.org/w/index.php?title=Guillaume_vu_Lëtzebuerg&oldid=2581423“