Henri Rinnen (Sproochfuerscher)

Dësen Artikel beschäftegt sech mat dem Natur- a Sproochfuerscher Henri Rinnen. Fir de Lokalpolitiker, kuckt wgl. Henri Rinnen (Politiker).

Henri Rinnen
Gebuer	17. September 1914 Bënzelt
Gestuerwen	26. September 1998 Lëtzebuerg
Nationalitéit	Lëtzebuerg
Aktivitéit	Linguist

Den Henri (Heng) Rinnen, gebuer de 17. September 1914 zu Bënzelt, gestuerwen de 26. September 1998 an der Stad Lëtzebuerg, war e lëtzebuergesche Sprooch- a Vullefuerscher.

Vu Beruff war den Henri Rinnen Employé op der Post. Hie war Member vun der linguistescher Sektioun vum Institut grand-ducal a Matgrënner an éischte President vun der Actioun Lëtzebuergesch (bis 1972, dann nees vun 1984 bis 1992). Hien huet déi éischt Dictionnairen an d'Lëtzebuergescht, en Däitsch-Lëtzebuergeschen an e Franséisch-Lëtzebuergeschen, zesumme mam Will Reuland erausginn, an op Radio Lëtzebuerg reegelméisseg Emissiounen iwwer d'Lëtzebuergesch gemaach.

Den Henri Rinnen war och en aktiven Naturschützer; hie war Matgrënner vun der Natura a vun 1968 bis 1986 President un der Lëtzebuerger Natur- a Vulleschutzliga. Als eng Zort Synthees vu sengen zwéin Haaptintressie kann ee seng Sammlung iwwer Lëtzebuerger Vullennimm gesinn, déi 1969 erauskoum.

Wierker (Auswiel)

• (mam Will Reuland): Kleines Deutsch-Luxemburgisches Wörterbuch, 1973 (iwwer 10 Oploen)
• déis.: Petit dictionnaire français-luxembourgeois
• "Luxemburger Vogelnamen", in: Bulletin linguistique et ethnologique 15, 1969.
• Ueter d'Joer, 1978

Gielercher

• Chevalier de l'Ordre de la couronne de chêne (Promotioun 1976).

Literatur

• Jeff Baden, 2014. E grousse Frënd vun der Lëtzebuerger Sprooch, Kultur an Natur - Zur Erënnerung un den Henri Rinnen (1914-1998). Die Warte, 18. September 2014, S. 2-3.

Kuckt och

• Lëtzebuergesch Dictionnairen
• Lëscht vun de Vullen zu Lëtzebuerg

Um Spaweck

• "Nachruf auf Heng Rinnen" am Regulus.
• Den Henri Rinnen am Autorenlexikon