Institut fir Radioastronomie am Millimeterberäich
D'Institut fir Radioastronomie am Millimeterberäich (IRAM) ass en internationale Radioobservatoire.
D'IRAM gouf am Joer 1979 gegrënnt a gëtt an däitsch-franséisch-spuenescher Zesummenaarbecht bedriwwen. Dréierorganisatioune sinn d'Max-Planck-Gesellschaft, de franséische Centre national de la recherche scientifique (CNRS) an de spueneschen Instituto Geográfico Nacional (IGN). D'IRAM bedreift zwéin Observatoirë fir Radioastronomie. Béid stinn op enger grousser Héicht, well do d'Duerchléissegkeet vun der Äerdatmosphär fir Radiowelle vun 1–3 mm Wellelängt méi gënschteg ass.
D'Institut huet Ariichtungen zu Grenoble an zu Granada fir d'technesch Entwécklung an Ënnerstëtzung, d'Verwaltung an de wëssenschaftleche Gebrauch.
30 m-Teleskop um Pico del Veleta
[änneren | Quelltext änneren]Den Eenzelteleskop mat 30 m Reflekterduerchmiesser steet op enger Héicht vun 2.920 m an der Géigend vum Pico Veleta an der Sierra Nevada a Südspuenien, ronn 50 km südëstlech vu Granada. Zanter den 1980er Joren ass et dat weltgréisst Radioteleskop fir de Wellelängteberäich vu 4 mm bis erof op 1 mm, wat engem Frequenzberäich vun 72 bis 300 GHz entsprécht. Et ass ee vun den empfindlechste Radioteleskope vun der Welt fir Miessunge bei kuerze Millimeterwellelängten.
Koordinaten: 37° 03’ 58.3’’ N 03° 23’ 33.7’’ W
Millimeter-Interferometer um Plateau de Bure
[änneren | Quelltext änneren]Um 2.552 m héije Plateau de Bure am Dévoluy-Massiv an de franséischen Alpe steet zanter 1988 e Radiointerferometer vu 6 Antenne mat jee 15 m Duerchmiesser fir Observatioune mat héijer Wénkelopléisung bei Wellelängte vun 1, 2 an 3 mm. Mat gréissten Distanze vu 760 m, tëscht den Antenne, gëtt eng Wénkelopléisung bis zu 0,4 Bousekonnen erreecht.
Koordinaten: 44° 38’ 02’’ N 05° 54’ 28.5’’ O