Jemp Michels
|
Dësen Artikel beschäftegt sech mat dem Architekt a Kënschtler Jean-Pierre "Jemp" Michels. Fir de Politiker, kuckt wgl. Jean-Pierre Michels. |
| Jemp Michels | |
|---|---|
 | |
| Gebuertsnumm | Jean Pierre Nicolas Michels |
| Gebuer |
1. Abrëll 1906 Esch-Uelzecht |
| Gestuerwen |
16. August 1989 Lëtzebuerg |
| Nationalitéit | Lëtzebuerg |
| Aktivitéit | Architekt |
| Famill | |
| Papp | Jean-Pierre Michels |
 | |
De Jean-Pierre-Nicolas "Jemp" Michels, gebuer den 1. Abrëll 1906 zu Esch-Uelzecht, a gestuerwen de 16. August 1989 an der Stad Lëtzebuerg, war e lëtzebuergeschen Architekt, Moler a Sculpteur.
Liewen
[änneren | Quelltext änneren]De Jemp Michels war de Fils vum Jean-Pierre Michels, Deputéierten a Buergermeeschter vun Esch-Uelzecht an en Neveu vum Émile Hamilius.
Hien huet ufanks vun den 1920er Joren op der École des Beaux-Arts zu Paräis Architektur studéiert. Dono huet hien eng sëllegen Haiser entworf, an 1939 huet hien zesumme mat anere Lëtzebuerger de Lëtzeburger Pavillon vun der Weltausstellung zu New York opgebaut. Deemools huet hien en Diplom als Éierebierger vun New York kritt.
Wéi den Zweete Weltkrich ausgebrach ass, koum hien aus Amerika hannescht an dat besate Lëtzebuerg. Hien huet 1941 en Handel mat Antiquitéiten a Konscht opgemaach, wou en ë.a. Konschtwierker, déi en zu Paräis opkaf huet, verkaaft huet, zum Deel direkt an Däitschland. Ënner de Galerien, wou e seng Objeten hier hat, waren der eng jett, déi Besëtz, déi de Judden ofgeholl gi war, oder deen s'ënner Präis hu misse verkafen, weiderverkaaft hunn. Obwuel en am ganze fir iwwer 2 Millioune Franséisch Frang Wueren importéiert huet, a mat Naziorganisatiounen oder notoresche Kollaboratueren zesummegeschafft huet, gouf en an den Epuratiounsprozeduren nom Krich net als collaborateur économique de l'occupant et profiteur de la guerre konsideréiert, sou dass e säin Architekteberuff weider ausübe konnt.[1]
Nom Krich gouf hie mat der Rekonstruktioun beoptragt; zesumme mam Robert Lenz an dem Archie Thill hu si Bäerdref a Beefort nees opgebaut. An den 1950er Joren huet en och, zesumme mat ville bekannte Kënschtlerfrënn, de Kënschtlertreff "Cavo" gegrënnt.
Vun 1962 bis 1968 war de Jemp Michels President vum Cercle artistique de Luxembourg.
Als Direkter vun de Foires internationales de Luxembourg (FIL), fir d'éischt um Lampertsbierg, duerno um Kierchbierg, huet en de Projet vun der neier Foire konzipéiert. Hie war bis 1978 Direkter vun der Foire, dertëschent och zwéi Joer Vize-President vun der Union des Foires Internationales (UFI).
Nieft all dësen Aktivitéiten huet hie seng Molerei net aus den Ae verluer. Am Nationalmusée fir Geschicht a Konscht um Fëschmaart hänke Portraite vun him, déi de Joseph Probst an den Auguste Trémont gemoolt hunn.
Gielchen
[änneren | Quelltext änneren]- Chevalier vum Ordre de la couronne de chêne (Promotioun 1958)[2]
- Commandeur vum Ordre de Mérite du Grand-Duché de Luxembourg (1975)[3]
Literatur
[änneren | Quelltext änneren]- Les Cahiers luxembourgeois(Artikel? Nummer?)
- Katrin C. Martin: Collections de Portraits Luxembourgeois. (Säit 136 - 138)
Um Spaweck
[änneren | Quelltext änneren]- Robert Philippart: "Jemp Michels, architecte, citoyen d'honneur de New York." In: Patrimoine urbain - revue technique luxembourgeoise, 2016 (3), p. 46-49.
- Robert Philippart, "Jemps Michels, architecte moderniste", Tageblatt, 12.01.2021.
Kuckt och
[änneren | Quelltext änneren]Referenzen
[Quelltext änneren]- ↑ Blandine Landau: " 'Les années de guerre lui furent une rude épreuve'. L'activité de marchand de l'architecte Jemp Michels." tageblatt, 21.01.2025, S.x.
- ↑ Memorial A N°12 vun 1958 mat enger Lëscht vu Leit déi am Ordre de la couronne de chêne dekoréiert goufen
- ↑ "Jemp Michels, directeur-délégué de la Foire Internationale, promu Commandeur de l’Ordre du Mérite", Luxemburger Wort, 4. Juli 1975.