Kierch Rued-Sir

Vu Wikipedia
Wiesselen op: Navigatioun, sichen


Kierch vu Rued-Sir
De Kierchtuerm vu Rued-Sir
De Kierchtuerm vu Rued-Sir
Uertschaft Rued-Sir
Par Rued-Sir
Dekanat Gréiwemaacher
Numm / Patréiner Hl. Mäerten
Architekt(en) René Schmit
Jean Ewert
André Haagen
Baujoer 1978
Konsekratiounsjoer 1978
Koordinaten Gnome-globe.svg49° 39’ 53.6’’ N
     06° 18’ 0.2’’ O
Kierchen - Kapellen

Déi nei Kierch vu Rued-Sir ass eng kathoulesch Kierch déi zur Par Rued-Sir, zum Parverband Maacher, Mäertert, Widdebierg, Wormer, zu der Pastoralregioun Osten, zum Dekanat Gréiwemaacher an zu der Gemeng Betzder gehéiert. Responsabel ass e Pastoralteam ënner der Leedung vum Deche vu Gréiwemaacher, dem Claude Bache.

De Patréiner vun der Kierch ass den hellege Jakobus, deem säi Fest de 25. Juli gefeiert gëtt. Niewepatréiner ass d'Mater Dolorosa.

Rued-Sir huet zwou Kierchen, vun deenen déi al nëmme nach fir Ausstellungen an aner kulturell Zwecker benotzt gëtt. Déi nei Kierch steet am Ufank vun der Ouljener Strooss (rue d'Olingen), dem CR134, nëmmen zirka 40 m vun der Kräizung mat der N1. Déi al steet an därselwechter Strooss wéi déi nei, vun där zirka 120 m ewech.

Geschicht[änneren | Quelltext änneren]

Déi al Kierch[änneren | Quelltext änneren]

Déi al Kierch
Déi nei Kierch
Kierchefënster

Rued ass eng ganz al Par, eng éischt Kierch zu Rued gëtt schonn am Joer 1083 ernimmt, an dem Joer wou d'Almënsterabtei gegrënnt gouf an de Grof Konrad vu Lëtzebuerg hinnen deemools d'ecclesiam de Rode geschenkt huet. De richtegen Datum vum Bau ass net bekannt.

Den éischte bekannte Paschtouer vu Rued war den Ernst Heistorff. Em 1685 heescht de Paschtouer Joh. Heinrich Lenert. D'Kierch as aarm, an d'Mauere réi, keen hëlze Foussbuedem mä e knubbelege Steebelag. De Chouer ass hallef zesummegefall an et gesäit éischter no engem Stall aus wéi no engem Gotteshaus.

1738 waren erëm besser Zäiten an et gëtt vun enger Kierch baussent dem Duerf geschwat. Wahrscheinlech sinn déi am Krich zerstéiert Haiser nach net opgebaut ginn. Sou steet d'Kierch, déi a guddem a wierdegem Zoustand ass, eleng um Hiwwel. Aus där Zäit staamt och de lénkse Säitenaltor, den d'Opschrëft dréit: P.W.1728.

Déi haiteg Kierch ("déi Al" genannt) war am Joer 1757 ënner dem Paschtouer Joh. Filtz (1749-1776) gebaut ginn a gouf de 26. Juli 1757 dem hl. Jakobus geweit. E Gewëllefsteen dréit dës Joreszuel.

Déi modern Kierch[änneren | Quelltext änneren]

An der Nokrichszäit vum 20. Joerhonnert huet sech d'Fro gestallt, ob déi kleng Kierch nach zäitgeméiss wier, sou datt an de Joren 1963 bis 1968, ënner dem Paschtouer Adolphe Krier e Kierchebauveräi gegrënnt ginn ass. Zéng Joer drop sollt dann déi nei modern Kierch entstoen, där hire Grondsteen de 4. Juli 1976 geluecht gouf. Dës gouf den 8. Oktober 1978 geweit.

D'Kierch vu Rued-Sir steet zanter Joren zwee- bis dräimol am Mount der „Nederlandse Protestantse Gemeenschap“ zur Verfügung.

D'Kierch vu bannen[änneren | Quelltext änneren]

D'Bannenausstattung ass zum groussen Deel vum Egino Weinert, sou:

  • den Tabernakel: lescht Owesmoolzecht
  • d'Hängekräiz mat engem béidsäiteg bebillerte Medaillon; sou datt een d'Kräiz ka vun zwou Säite weisen: Féisswäschen a Kräizegung
  • den Dafsteen: Daf vu Jesus
  • de Kräizwee
  • de Kräizwee vum Roger Bertemes
  • d'Käerzestänneren
  • den Ouschterkäerzestänner
  • de Muttergottesmedaillon
Plafong mat Kräiz
Kräiz mat Féisswäschen
Kräizegung
Kräizweeër vum Egino Weinert a Roger Bertemes

Den Altor, den Ambo an d'Chouerstill si vum Pauly. D'Fënstere goufe vum Georges Calteux an Ad Deville entworf.

Nieft dem Kräizwee vum Egino Weinert hänkt zanter 1988 en net-figurative Kräizwee vum Roger Bertemes an der Kierch.

Literatur[änneren | Quelltext änneren]

Mariestatu
  • Georges, Nic; Paschtouer vu Betzder: Kurzgeschichten der Pfarreien" Verfasser Nic Georges 25.7.1987,
  • Backendorf, C. Lokalchronik Roodt-sur-Syre, Roodt-sur-Syre, 15.9.1999
  • Kierchebauveräin Rued-Sir, 10 Joer nei Parkierch Rued-Sir, 1988

Kuckt och[änneren | Quelltext änneren]

Um Spaweck[änneren | Quelltext änneren]

Commons: Kierch Rued-Sir – Biller, Videoen oder Audiodateien