Krokodil (Sécherheetssystem)

Vu Wikipedia
Wiesselen op: Navigatioun, sichen
En eenzelt Krokodil.
D'Biischt ënner enger Lokomotiv.

Als Krokodil bezeechent een op der Eisebunn e Sécherheetssystem wéi en haut zu Lëtzebuerg, an der Belsch an a Frankräich benotzt gëtt. Zu Lëtzebuerg an an der Belsch, ass en och nach ënner dem Numm Memor bekannt.

Well en als äusserst onsécher gëllt, ginn d'Krokodiller duerch verschidden aner Systemer kompletéiert.

Opbau[änneren | Quelltext änneren]

De System baséiert op metallene Konstruktiounen déi tëscht de Schinne leien, an deenen hir längelzeg Form dem System den Numm gëtt. Duerch déi Stécker leeft eng liicht elektresch Spannung. D'Géigestéck zu deene Konstruktioune si metalle Biischten déi ënner de Lokomotiven an Automotricë montéiert sinn.

Wann elo e Gefier laanscht e Signal, an domat iwwer e Krokodil fiert, hëlt d'Biischt déi elektresch Spannung op an et rabbelt eng Schell an der Kabinn. De Mecanicien muss dat elo sengem Gefier confirméieren datt en dat Signal wat e grad passéiert huet gesinn huet, mécht en dat net gëtt bannent 5 Sekonnen eng Zwangsbremsung ausgeléist.

Geschicht[änneren | Quelltext änneren]

D'Krokodiller goufen Enn vum 19. Joerhonnert a Frankräich entwéckelt an haten de Sënn Signaler géint en einfache Mëssel vum Mecanicien ze sécheren. Et goung een dovun aus datt de Mecanicien deen e Signal iwwersinn hat, dat och net géif acquittéieren an datt déi automatesch Vollbremsung Accidenter kéint verhënneren. De groussen Nodeel vum System ass datt e keng Konsequenz virgesäit fir Gefierer déi laanscht zoue Signaler fueren a bei deenen de Mecanicien d'Signal acquittéiert.

1997 gouf et zu Lëtzebuerg 3 schwéier Zuchaccidenter, déi all op mënschlech Feeler a Feeler bei der Signalisatioun zréckzeféiere waren. Beim schlëmmstem Accident, koum um Houwald e Mecanicien ëm d'Liewen. An der Folleg hunn d'CFL hire Reseau iwwerschafft an eng verbessert Sécherheetstechnologie installéiert.

Trotzdeem waren d'Krokodiller den eenzege Sécherheetssystem deen zu Lëtzebuerg existéiert huet. Dowéinst war et fir auslännesch Eisebunnsgesellschaften, virun allem aus Frankräich an der Belsch, einfach fir hiert Material zu Lëtzebuerg homologéieren ze loossen.

2006 koume beim Zuchongléck zu Zoufftgen 12 Mënschen ëm d'Liewen, wat d'Sécherheet op der Bunn nees an d'Gespréich bruecht huet. Och wann et net de Sécherheetssystem selwer war, deen do versot hat, war dat Ongléck dee leschten Impuls fir d'Krokodiller z'iwwerschaffen.

2007 gouf déi erweidert Form vum System, de Memor 2+, zu Lëtzebuerg obligatoresch.

Um Spaweck[änneren | Quelltext änneren]

Commons: Krokodil (Sécherheetssystem) – Biller, Videoen oder Audiodateien