Louis Alphonse Munchen

Louis Alphonse Munchen
Louis Alphonse Munchen
Gebuertsnumm	Mathias Titte Louis Alphonse Munchen
Gebuer	31. Januar 1819; Lëtzebuerg
Gestuerwen	7. Mäerz 1881; Lëtzebuerg
Doudesursaach	Hiereschlag
Nationalitéit	Lëtzebuerg
Educatioun	Athénée de Luxembourg
Aktivitéit	Offizéier
Famill
Bestuet mat	Barbe Sophie Valerie Wolff
Papp	Philippe Charles Munchen
Mamm	Eleonore Well

De Mathias Tite Louis Alphonse Munchen, gebuer den 31. Januar 1819 an der Stad Lëtzebuerg^[1] an och do gestuerwen de 7. Mäerz 1881^[2] war e Lëtzebuerger Offizéier am Lëtzebuergesche Bundeskontingent. Hie war duerno Majouer-Kommandant vum Lëtzebuerger Jeeërbatailloun an e gouf fir säi grousst Engagement am Déngscht vu sengem Land a fir seng philanthropesch Missioune gewierdegt.

Famill

De Louis Alphonse Munchen gouf an enger Famill gebuer, déi enk Bezéiungen zum Haus Orange-Nassau hat an déi, besonnesch wärend der belscher Revolutioun vun 1830, ëmmer loyal hannert der Dynastie stoung. Säi Papp war de Philippe Charles Munchen (1779–1858), dee bis zu sengem Doud President vum Ieweschte Geriichtshaff an dem Kassatiounshaff war a seng Mamm war d'Maria Eleonora Well (1789–1862). De Louis Alphonse Munchen huet säi Lycée 1836 am Stater Kolléisch ofgeschloss.

Bestietnes

De Louis Alphonse Munchen huet sech de 6. Abrëll 1845 mat der Barbe Sophie Wolff , der Duechter vum Éiereconseiller vun der Cour supérieure de justice Johann Wolff, bestuet. D'Barbe Sophie – gradewéi der Koppel hir eelst Duechter an de jéngste Bouf – sinn 1866 un der Cholera gestuerwen.

Militäresch Karriär

Nom Kolléisch goung de Louis Alphonse an den hollännesche Militärdéngscht, wou en an der Feldartillerie ugefaangen huet.

De 17. Mee 1837 ass e bei d'Kavallerie gewiesselt (6. Husaren-Regiment). Wéinst sengem gudde Verhalen a senge speziell Fäegkeete gouf hien den 1. Juni 1838 Brigadier an e Joer drop, den 29. Juni 1839, Sergant (Maréchal des logis).

Déngscht am lëtzebuergesche Bundeskontingent

Wéi 1841 d'Lëtzebuerger Bundeskontingent gegrënnt gouf, gouf hien Ënnerleitnant am Jeeërbatailloun an 1845 Aide de camp vum Kommandant vum Bundeskontingent.

Wéinst der Opléisung vun der Kavallerie ass hien an d'Infanterie gewiesselt, wou en den 1. Mäerz 1847 1. Leitnant gouf. Hien huet no an no méi héich Graden erreecht:

1. Mäerz 1849: Adjutant-Majouer vum Batailloun
27. Dezember 1851: Zweete Kapitän
22. Februar 1858: Kompaniechef
30. Mee 1861: Éischte Kapitän

Nom Ofzuch vun der preisescher d'Garnisoun aus der Festung Lëtzebuerg an der Folleg vum Londoner Traité vun 1867, ass de Munchen 1868 zum Majouer-Kommandant vum nei gegrënnte Lëtzebuerger Jeeërbatailloun (Bataillon des chasseurs luxembourgeois) ernannt ginn.

Engagement an der Gesellschaft

Als Kommandant huet de Munchen seng Trupp nei strukturéiert an eng strikt Disziplin agefouert. Hien huet och eng Ausbildung fir zukünfteg Offizéier a Staatspersonal (z. B. Gendaarmen, Forstbeamten, Telegrafisten, …) opgebaut. Seng Beméiunge fir d'Verbesserung vum Wuel vun de Zaldote goufen allgemeng geschat.

Enn vum Batailloun

1881 gouf d'Ofschafe vum Lëtzebuerger Jeeërbatailloun decidéiert.

Doud

Wärenddeem de Louis Alphonse Munchen am Gaang war déi administrativ Prozedure fir d'Opléise vum Batailloun op en Enn ze bréngen, ass hien de 7. Mäerz 1881 un engem Hiereschlag^[3] an der Kasär um Hellege-Geescht gestuerwen.