Mensder

Vu Wikipedia
(Virugeleet vu(n) Menster)
Op d'Navigatioun wiesselen Op d'Siche wiesselen
Mensder
MensKier1.JPG
An anere Sproochen fr: Mensdorf
de: Mensdorf
Land Lëtzebuerg
Kanton Gréiwemaacher
Gemeng Coat of arms betzdorf luxbrg.png Betzder
Buergermeeschter Jean-François Wirtz
Awunner 917[1] (2011)
Koordinaten 49° 39’ 18’’ N
06° 18’ 12’’ O


Mensder ass eng Uertschaft an der Gemeng Betzder.

Geographie[änneren | Quelltext änneren]

Mensder aus der Loft

Mensder ass déi südlechst vun de fënnef Uertschaften an der Gemeng Betzder (Kanton Gréiwemaacher). Mensder läit tëscht Rued-Sir am Norden an der Autobunn A1 am Süden. Dat noosten Duerf am Westen ass Nidderaanwen an dat am Osten ass Fluessweiler.

Am Weste vu Mensder fléisst op enger Südwest-Nord-Achs d'Sir. Parallel zur Baach verlafen Zuchschinn.

De Kulturzentrum am Zentrum vum Duerf läit op enger Héicht vun 247 Meter iwwer NN. Am Oste läit den héchst Punkt vu Mensder, de Widdebierg mat 387 Meter.

2011 hunn zu Mensder 917 Persoune gewunnt; dat waren 28% vun den 3.236 Awunner vun der Gemeng Betzder.[1]

Geschicht[änneren | Quelltext änneren]

Déi éischt Spueren, déi beweisen datt Mënschen am haitege Mensder gewunnt hunn, stamen aus der galloréimescher Zäit. Deemools ass tëscht de spéideren Uertschafte Mensder a Beyren d'Réimerstrooss Metz-Tréier op d'Strooss Reims-Arel-Tréier getraff. An där Period ass de Widdebierg als keltesch Gottheet "Deus veraudunus" veréiert ginn.[2]

Et ass méiglech, datt den Numm "Mensdorf" aus dem 6. Joerhonnert staamt. Dat éischt Dokument, an deem d'Uertschaft ernimmt gëtt ("Mennestorf") staamt awer aus dem Joer 1043. Iwwer déi nächst puer honnert Joer goufen et e puer Variatioune vum Numm: "Mensdorff" (1255), "Mennestorff" (1261), "Mennisdorf" (1305), "Meynszdorff" (1570)[3], "Mensdorff" (1585), "Munsdorf" (1579/1589), "Mondorff" (1680/1695), "Mensdorf" (1685) a "Monsdorf" (1705/1792).[2]

Ëm 1250 ass Mensder ënner d'Herrschaft vun de Grofe vu Rëttgen gefall, vun deenen am 13. Joerhonnert d'Grofe vu Mensder-Pouilly ofstaamen. Am 14. Joerhonnert waren d'Häre vu Mensder Schäffen an der Stad Lëtzebuerg. Si hate vill Proprietéiten an der Stad an am Syrdall. Trotzdeem war Mensder mat sengen 12 Stéit (1473) a senge schlechte Stroossen net vill besser dru wéi seng Nopeschdierfer. 1611 hunn do 260 Persoune gelieft, mä wéinst dem Drëssegjärege Krich (1618-1648) waren et der 1635 nëmmen nach 150. 1656 hat Mensder souguer nëmmen nach 42 Awunner.[2]

Genee wéi Diddenuewen a Montmédy ass Mensder 1659 Deel vu Frankräich ginn. E puer Joerzéngte méi spéit, wärend der franséischer Revolutioun, hunn d'Grofe vu Pouilly Frankräich musse verloossen. Si goufen an Éisträich opgeholl, wou si sech séier etabléiere konnten a wichteg Funktioune beluecht hunn. Fir ze verstoppen, datt si aus Frankräich kommen, hu si den Numm "Mensdorff" adoptéiert. Den Alexander vu Mensdorff war vun 1864-1866 souguer éisträicheschen Ausseminister.[4]

An den 1970er gouf d'Parhaus an déi al Schoul am Zentrum vu Mensder ofgerappt an duerch e Kulturzenter ersat. An de spéiden 1990er dunn ass déi al Schmëdd renovéiert ginn a gëtt haut als Concerts- an als Versammlungssall ("Schmoett") benotzt.[2]

Relioun[änneren | Quelltext änneren]

D'Existenz vun enger Kapell zu Mensder gëtt 1570 fir d'éischt ernimmt. 1853 ass d'Kierch um Site vun enger Kapell aus dem Joer 1696 gebaut ginn. Vun där Kappell gouf just de Klackentuerm stoe gelooss, deen 1900 duerch den aktuellen, méi héijen Tuerm ersat ginn ass.

D'Par Mensder ass 1858 geschaf ginn. Virdrunn huet Mensder zur Par Fluessweiler gehéiert. Zënter 2017 gehéiert Mensder zur Par Musel a Syr Saint-Jacques.[2]

Veräinsliewen[änneren | Quelltext änneren]

D'Chorale Sainte-Cécile, d'Fräiwëlleg Pompjeeën an den den FC Syra Mensder zielen zu den eelste Veräiner zu Mensder. Tëscht 1910 an 1956 ass et och en Turnveräin ginn, d'Concorde Ouvrière Mensdorf.

Am Duerf ginn och all Joer e puer Evenementer organiséiert, dorënner d'"Mensder Quetschekiermes" zënter 1974[5] an zënter 1988 d'"Musek am Syrdall"[6]

Tëscht 1981 an 1993 hat de Club des Jeunes vu Mensder de "Widderbierglaf" organiséiert. Zënter 2013 hunn d'Widdebiergfrënn déi Course nees nei belieft.[7]

Biller[änneren | Quelltext änneren]

Kuckt och[änneren | Quelltext änneren]

Um Spaweck[änneren | Quelltext änneren]

Commons: Mensder – Biller, Videoen oder Audiodateien

Referenzen[Quelltext änneren]

  1. 1,0 1,1 STATEC: RP2011 - Population de résidence habituelle par commune et localité au 1er février 2011
  2. 2,0 2,1 2,2 2,3 2,4 betzdorf.lu: La localité de Mensdorf (gekuckt den 19. September 2017)
  3. Parverband Widdebierg: Lokalchronik von Dorf und Pfarrei Mensdorf (gekuckt den 19. September 2017)
  4. Bibliotheksservice-Zentrum Baden-Württemberg: Mensdorff-Pouilly, Alexander von (19. September 2017)
  5. betzdorf.lu: Menster Quetschekiermes (gekuckt den 19. September 2017)
  6. msyrdall.betzdorf.lu: Musek am Syrdall (gekuckt den 19. September 2017)
  7. widdebierglaf.lu: La course du Widdebierg du Club des Jeunes de Mensdort (1981-1993) et des Widdebiergfrënn (2013-…) (gekuckt den 19. September 2017)