Mystèrë vun Eleusis

D'Mystèrë vun Eleusis waren Initiatiouns- a Weiritualer vum Demeter- a Persephonekult, déi hiren Ursprong zu Eleusis am antike Griicheland haten. Dës Mystèren a Ritualer hu sech spéider och am Réimesche Räich verbreet.

Déi, déi bei de Mystèrëfeiere matgemaach hunn, hu misse geheimhalen, wat do geschitt ass, an hunn domat zu engem exklusive Krees gehéiert. Si hu gegleeft, doduerch un der gëttlecher Muecht deelzehuelen an am Liewen nom Doud dovun ze profitéieren. Trotz der Geheimhaltungsflicht konnt awer aus archeologeschen Ausgruewungen an iwwerliwwerten Texter den Oflaf bei de Feiere méi oder wéineger rekonstruéiert ginn.

D'Mystèren hunn aus enger sëllege kultesche Virbereedungen bestanen, no deenen dann en Ëmzuch mat bis zu 3.000 Leit op der helleger Strooss vun Athen op Eleusis goung. Wärend dem Ëmzuch sinn Zeene gespillt ginn, déi d'Geschichte vun der Demeter, der Persephone an dem Dionysos duergestallt hunn.

Hannergrond

D'Mystèrë baséieren op enger Legend, déi sech ëm d'Demeter, d'Gëttin vum Liewen an der Fruchtbarkeet, dréit. Hir Duechter Persephone ass hir vum Hades, dem Gott vum Doud a vun der Ënnerwelt, entfouert ginn. Wärend d'Demeter no hir gesicht huet, huet si hir Flichte vernoléissegt. Alles op der Äerd ass gefruer an d'Mënsche sinn erhéngert; et war deen éischte Wanter. Um Enn huet si d'Persephone fonnt an et ass hir gelonge se mat heem ze bréngen. D'Äerd huet erëm ugefaangen ze liewen; et war dat éischt Fréijoer.

Wärend der Zäit, an där d'Persephone an der Ënnerwelt war, hat den Hades hir awer e Granatapel ginn, vun deem si e bësse Som giess huet. Duerno konnt si ni méi fir ëmmer bei déi Lieweg zeréck an huet misse fir en Drëttel vum Joer an der Ënnerwelt verbréngen. De Rescht vum Joer huet se bei hirer Mamm verbruecht. Sou sinn d'Joreszäiten entstanen (d'Griichen hunn den Hierscht als Joreszäit net kannt).

Mat de Mystèrë vun Eleusis ass der Persephone hire Retour an d'Welt vun de Liewegen als de Fréijoersufank gefeiert ginn. Well si wärend hirem Openthalt an der Ënnerwelt Som giess huet, e Symbol vum Liewen, steet hir Reinkarnatioun symbolesch fir d'Reinkarnatioun vun allem Planzeliewen am Fréijoer, an am Allgemenge fir all d'Liewen op der Aërd.

Am Homer senger Hymn un d'Demeter war de Kinnek Keleos ee vun den ursprénglechen Demeter-Priisteren an ee vun den éischten, déi an déi geheim Ritualer a Mystèrë vun hirem Kult ageweit goufen. Déi aner Priistere waren den Diokles, den Eumplos, den Triptolemos an de Polyxeinos. Den Triptolemos, deen d'Wëssen iwwer d'Landwirtschaft direkt vun der Demeter erhalen hat, huet dëst un d'ganzt Vollek vun de Griiche weiderginn.

Oflaf

Et gëtt zwéi Mystèrë vun Eleusis: déi grouss an déi kleng Mystèren.

Déi kleng sinn am Mount Anthesterion (Mäerz) ofgehale ginn, woubäi de geneeën Datum, jee nodeem, geännert huet. Fir d'éischt ass e Schwäi geaffert ginn an duerno hunn d'Priistere sech rituell gerengegt. Da sinn d'Kandidate vun de Priistere fir d'Initiatioun gerengegt ginn.

Déi grouss Mystèrë sinn am Mount Boedromion (August/September) gefeiert ginn, dem éischte Mount am Attesche Kalenner. Se hunn néng Deeg gedauert. Zu hirem Optakt sinn déi gehellegt Géigestänn de 14. Boedromion vun Eleusis bei den Eleusinion, en Tempel um Fouss vun der Akropolis zu Athen, bruecht ginn.

De 15. Boedromion hunn d'Hierophanten den offiziellen Ufank vun de Ritualer bekannt ginn (Prorrhesis). D'Zeremonie huet de 16. Boderomion zu Athen mat der feierlecher Wäschung vun de Priister am Mier bei Phaleron, ugefaangen. Duerno, de 17. Boedromion, koum d'Affere vun engem jonke Schwäin am Eleusinion.

Zwéin Deeg méi spéit ass, vum Athener Kierfecht Kerameikos aus, d'Prëssessioun erëm zeréck op Eleusis gaangen. Hanner de Priisteren, déi d'Tafele vum Dionysos héichgehal hunn, ass d'Bevëlkerung duerch d'helleg Strooss gezunn an huet dobäi dräi Ofschnëtter passéiert, déi Bakchoi genannt goufen. Op engem bestëmmte Punkt vum Wee hu se obszön Ausdréck geruff, déi un d'Iambes sollten erënneren, eng Mod, déi d'Demeter nom Verloscht vun hirer Duechter mat engem graffe Witz wollt opmonteren, wat hir och gelonge war.

Nodeem d'Prëssessioun zu Eleusis ukomm war, ass ee Faaschtendag ageluecht ginn, als Erënnerung un der Demeter hiert Faaschte wärend hirer Sich nom Persephone. Mam d'Drénke vun engem extrae Gedrénks aus Geescht a Fraemënz, dem Kykeon, ass d'Faaschten ënnerbrach ginn. Den 20. an 21. hunn déi zukënfteg Priisteren den Telesterion, eng grouss Hal, betratt. Do sinn hinnen déi helleg Reliquie gewise ginn an d'Priisterinnen hunn hir Visiounen aus der helleger Nuecht bekannt ginn. Am Zentrum vum Telestrion war den Anaktoron, de Palast, bei deem et sech ëm e schmuelt, stengend Gebai gehandelt huet, zu deem nëmmen d'Hierophanten Zoutrëtt haten. Am Anaktoron goufen déi helleg Objete vun der Demeter versuergt. Dat, wat am Telesterion geschitt ass, huet zu deem geheimsten Deel vun de Mystèrë gehéiert an op Verrot stoung d'Doudesstrof.

Owes ass d'Pannychis gefeiert ginn, e grousst Fest, dat déi ganz Nuecht gedauert huet a vun Danz a Freed begleet war. Déi zur Wei bestëmmte Jongen hunn op de Rharesche Felder a Meedercherskleeder wéi den Dionysos gedanzt. Nuets, oder am fréie Mueren ass e Stéier geaffert ginn.

Den Dag nom Fest, den 22. Boedromion, hunn d'Initiaten den Doud duerch ee speziellt Drénkaffer geéiert. Den 23. sinn d'Mystèren zu Enn gaangen.

Participanten

Véier Zorte vu Leit hunn un de Mystèrë vun Eleusis deelgeholl:

d'Priister, Priisterinnen an Hierophanten
déi zur Wei bestëmmte Jongen, déi un der Zeremonie fir d'éischt deelgeholl hunn
anerer, déi schonn emol deelgeholl haten
déijéineg, déi un der Epopteia deelgeholl hunn an déi grouss Geheimnisser vun der Demeter gewuer gi sinn.

Visiteuren, déi d'Feieren a besonnesch den Zuch duerch déi helleg Strooss begleet hunn, hunn net direkt un de Mystèren deelgeholl.

Zäit an Enn vun de Mystèrëfeieren

Et gëtt ugeholl, datt d'Mystèren zanter dem Mykeneschen Zäitalter, zanter 1500 v. Chr. gefeiert goufen. Si sinn all Joer iwwer eng Zäit vu ronn zweedausend Joer ofgehale sinn. Ënner dem Pisistratos vun Athen sinn d'Mystèrë vun Eleusis zu engem panhelleneschen Evenement ginn a Pilger aus ganz Griicheland an doriwwer eraus hunn un de Feieren deelgeholl.

Ongeféier zanter 300 v. Chr. louch d'Kontroll vun de Mystèrë beim Staat. Ganz besonnesch zwou Famillen hate vill Afloss: d'Eumolpiae an d'Kerykes. Dat huet dozou gefouert, datt ëmmer méi Weiadepte sech gemellt hunn. Déi eenzeg Viraussetzung war, datt se keng Bluttschold haten a keng Barbare waren, wat geheescht huet: si hu kee Muerd begaangen a si hu misse griichesch schwätzen. Männer, Fraen a souguer Sklave war et erlaabt als Adept d'Wei z'empfänken.

Den Augustus ass an déi eleusesch Mystèren ageweit ginn an de Claudius wollt de Kult op Roum verleeën. Den Nero, dee sech och a Griicheland opgehalen huet, huet de Besuch zu Eleusis nom Muerd u senger Mamm gemidden. Dee leschte réimesche Keeser, deen nach an d'Mystèren ageweit gouf, war de Julianus II.. D'Feiere sinn am Joer 392 n. Chr. duerch de réimesche Keeser Theodosius I. per Dekreet verbuede ginn. Mat der Zerstéierung vum Tempel zu Eleusis duerch de Gotekinnek Alarich 395 n. Chr., an deem sengem Gefolleg arianesch Chrëschte waren, sinn d'Mystèren an de Vergiess geroden.

Vum Enn vun de Mystèrë vun Eleusis huet am véierte Joerhonnert den Eunapios beriicht, en Historiker a Biograph vu griichesche Philosophen. Den Eunapios selwer ass vum leschte legitimmen Hierophant geweit ginn.

Um Spaweck

Commons: Mystèrë vun Eleusis – Biller, Videoen oder Audiodateien

Griichesch Mythologie – All d'Artikelen op der Wikipedia iwwer d'griichesch Mythologie.