Nationalstrooss 10

Vu Wikipedia
Op d'Navigatioun wiesselen Op d'Siche wiesselen
Laf vun der Strooss
an Direktiounsschëlter op der N10

D'Nationalstrooss 10 oder N10 ass eng lëtzebuergesch Nationalstrooss an de Kantone Réimech, Gréiwemaacher, Iechternach, Dikrech, Veianen a Klierf. Si féiert vun der däitscher Grenz zu Schengen laanscht d'Musel, d'Sauer an d'Our bis op Maarnech wou se Uschloss un d'N7 an d'N18 huet.

D'N10 fänkt op der däitscher Grenz zu Schengen op der Bréck iwwer d'Musel un, wou se un déi däitsch B407 ugeschloss ass. Vun do leeft se an nërdlecher Richtung laanscht d'Musel, ënner der Autobunn A13 erduerch, weider laanscht Wëntreng, Schwéidsbeng a Bech-Maacher bis op Réimech, wou se sech mat der N2 kräizt.

Weider geet se laanscht Stadbriedemes, d'Hëttermillen, Éinen, Wuermer, Ohn a Meechtem bis op Gréiwemaacher, wou se an d'N1 iwwergeet. Zesumme mat der N1 geet se laanscht Mäertert bis op Waasserbëlleg, wou se op der Kräizung vun der Grand-Rue mat der Rue des Bergers no lénks ofbéit a sech nees vun der N1 trennt.

Vu Waasserbëlleg aus geet se weider laanscht d'Sauer, ënner der Autobunn A1 erduerch, duerch Méischdref, Bur, Hénkel, Rouspert a Steenem bis op Iechternach, wou se an d'N11 iwwergeet.

Se geet awer am nërdlechen Ausgank vun Iechternach bei der Kräizung vun der Rue de la Gare mat der Rue Ermesinde nees virun ëmmer an nordëstlecher Richtung laanscht d'Sauer. Hiren Tracé féiert duerch d'Weilerbaach, Bollenduerfer Bréck, Grondhaff, Déiljen a Wallenduerfer Bréck bis op Reisduerf, wou se d'N19 kräizt.

D'N10 geet vun do u weider nërdlech ëmmer laanscht d'Our duerch Héischdref a Bëttel bis op Veianen, wou se d'N17 kräizt.

Si geet da virun nërdlech laanscht d'Our duerch Biwels, Stolzebuerg, Ënnereesbech, Uewereesbech a Rouderssen bis op Doosber Bréck.

Vun do u geet se a westlecher Richtung aus dem Ourdall erop bis op Maarnech, wou se d'N18 kräizt a kuerz drop bei der Kräizung mat der N7 zu Enn geet.

D'Gesamtlängt vun der N10 ass zirka 113 km; si ass domat déi längst Nationalstrooss am Land.

Erneierung vun der Strooss[1][änneren | Quelltext änneren]

Scho virun 2014 war festgestallt ginn, datt d'Strooss op der Streck tëscht der Doosber Bréck a Maarnech an engem ganz schlechten Zoustand war an den Deputéierten André Bauler hat beim Transportminister intervenéiert fir datt d'Strooss an d'Rei gesat sollt ginn[2]. Éischt Pläng fir d'Erneierung vun der Strooss konnten net realiséiert ginn, well se keen Accord vun der Ëmweltverwaltung kruten. Et goufen dunn 2016 zousätzlech Etüde gemaach, fir datt d'Strooss am Konsens tëscht dem Sécherheetsaspekt an der Ëmwelt erneiert kéint ginn[3].

D'Sanéierungsaarbechte konnte schlussendlech Mëtt Abrëll 2019 ufänken a goufen de 25. September 2020 ofgeschloss.

D'Streck gouf deelweis méi breet gemaach (6 Meter) an de Käschtepunkt fir de Reamenagement vun der 4,22 km laanger Streck beleeft sech op 4 Milliounen Euro.

Um Spaweck[änneren | Quelltext änneren]

Commons: Nationalstrooss 10 – Biller, Videoen oder Audiodateien
  1. (lb)Streck tëscht Doosber-Bréck a Maarnech nees fir den Trafic op. www.rtl.lu (28.09.2020). Gekuckt de(n) 28.09.2020.
  2. (fr)Question N°0630 de Monsieur André Bauler concernant Réaménagement de la N10 entre Dasbourg et Marnach. www.chd.lu/ (16.10.2014). Gekuckt de(n) 28.09.2020.
  3. (fr)Réponse du Ministre du Développement durable et des Infrastructures à question N°2787 de Monsieur André Bauler concernant Route nationale N10 entre Dasbourg et Marnach. www.chd.lu. Gekuckt de(n) 28.09.2020.