Pinselschimmel

Pinselschimmel (Penicillium; vum Laténgesche penicillus "Pinsel") ass eng Pilz-Gattung aus der Famill vun den Trichocomaceae. Hiren Numm kënnt dohier, well hir Konidiophore mat de den Konidien wéi Pinsel ausgesinn. Verschidden Aarte vun dëser Gattung spillen eng Roll bei der Produktioun souwuel vu Penicillin wéi och vu Liewensmëttele wéi Schimmelkéis.

Charakteristiken

Den Thallus, d'Myzel, besteet aus engem wäit veräschtelten Netz vun Hyphen, Dës Hyphe bestinn aus méi Kären, sinn duerch Septen ënnerdeelt an hunn dacks keng Faarf. Um Hyphemyzel forméiere sech déi typesch Konidiendréier, déi e puermol verzweigt sinn, mat de Konidiosporen drop. Dat ass déi gängest Verbreedungsform vun de Pilzen a se si meeschtens gréng gefierft.

Liewensweis

Penicillium spec. op enger ugeschniddener Zoossiss

Pinselschimmele liewe virun allem a killen a geméissegte Klimazonen um Buedem a si bal iwwerall ze fannen, wou organescht Material am Zoustand vun der Zesetzung ass. D'Saprophyten ënner de Pinselschimmel- an den Aspergillus-Aarten ("Strenze-Schimmelen") gehéieren zu de bekanntste Vertrieder vun den Eurotiales a liewe virun allem op organesche Substanzen, déi ofgebaut kënne ginn. Si stellen déi klassesch Schimmelpilzen duer an zielen zu de Wichtegste Liewensmëttelverdierwer. Vill Aarte stousse Mykotoxiner of, déi héichgëfteg sinn.

Ekonomesch Bedeitung

Eng Rëtsch vu Pinselschimmele spillen eng zentral Roll bei der Produktioun vu Kéis an och vu verschiddene Fleeschprodukter. Penicillium camemberti a Penicillium roqueforti z. B. komme bei der Produktioun vu Camembert, Brie, Roquefort a villen anere Kéiszorten zum Asaz. Bei der Produktioun vu réier Wurscht oder Ham spille Pilze wéi Penicillium nalgiovense eng Roll, andeems se net nëmmen de Goût besser maachen, mä och d'Fleesch méi laang iessbar halen, andeems se verhënneren, datt aner Pilzaarten, déi schiedlech fir de Mënsch wieren, sech drop néierloosse kéinten.

Pinsel- a Strenzeschimmelaarten (Aspergillus) sinn och eng Quell fir d'biotechnologesch Produktioun vun Enzymer wéi Pektinasen, Lipasen, Amylasen, Cellulasen a Proteasen. Si ginn agesat fir wichteg organesch Saieren, virun allem Zitrounen-, Glucon- a Wäisaier ze produzéieren. Do derbäi kënnt d'Gewanne vu wichtegen Antibiotika, virun allem de Penicillin an de Griseofulvin.

Aarten (Auswiel)

Relevant Aarte vun der Gattung Penicillium sinn:

Brie, mat Penicillium camemberti vereedelt

• Penicillium aurantiogriseum
• Penicillium brevicompactum
• Penicillium camemberti; gëtt bei der Kéisproduktioun agesat
• Penicillium digitatum
• Penicillium chrysogenum (Syn.: Penicillium notatum); gëtt bei der Produktioun vum Antioxidant Erythrobinsaier an dem Antibiotikum Penicillin benotzt.
• Penicillium citrinum;heiraus gouf Compactin isoléiert, dat éischt Statin
• Penicillium commune
• Penicillium corylophilum
• Penicillium crustosum
• Penicillium cyclopium
• Penicillium expansum; e staarke Pilz fir organesch Matière ofzebauen, mat der Hëllef vun Enzymen a Saieren och Lieder, Faarwen a Mineralien
• Penicillium funiculosum
• Penicillium glabrum
• Penicillium glaucum; fir Kéis ze produzéieren.
• Penicillium griseofulvum; fir d'Antibiotikum Griseofulvin ze produzéieren.
• Penicillium italicum
• Penicillium marneffei
• Penicillium nalgiovense; als Inokulatiounsmëttel bei der Produktioun vu réier Wurscht an Ham agesat.
• Penicillium nordicum
• Penicillium palitans
• Penicillium purpurrescens
• Penicillium purpurogenum
• Penicillium olsonii
• Penicillium roqueforti; fir Kéis ze produzéieren
• Penicillium variabile
• Penicillium viridicatum
• Penicillium verrucosum; ka gelagert Liewensmëttel vergëften, well en héich Quantitéite vu Mykotoxiner, virun allem Ochratoxin a Citrinin produzéiert.

Literatur

• Martin Schmiedeknecht: Eurotiales in: Urania Pflanzenreich. Viren, Bakterien, Algen, Pilze. Urania-Verlag, Berlin 2000; Seiten 417–418. ISBN 3-332-01167-7.
• Wolfgang Mücke, Christa Lemmen: Schimmelpilze. Vorkommen, Gesundheitsgefahren, Schutzmaßnahmen. ecomed MEDIZIN, Landsberg am Lech 2004

Um Spaweck

Commons: Penicillium – Biller, Videoen oder Audiodateien

• FungiQuest - Fungiscope Query Tool
• Penicillium Genus Record im Index Fungorum