Rue de Trèves (Stad Lëtzebuerg)

Rue de Trèves

Numm	lb: Tréierer Strooss, Tréierer Bierg, en Deel:Kéibierg fr: Rue de Trèves
Fréieren Numm	de: Trierertorstraße, Trierer Berg
Bemierkung	en Deel gehéiert zur Nationalstrooss 1A
Längt	ca. 2.350 m
Land	Lëtzebuerg
Gemeng	Lëtzebuerg
Uertschaft	Lëtzebuerg
Quartier	Gronn, Zens
Postcode	2631
Koordinaten	49° 36’ 38.1’’ N       06° 08’ 18.5’’ O
Genannt no	Tréier

D'Rue de Trèves ass eng Strooss an de Quartiere Gronn an Zens vun der Stad Lëtzebuerg. Op lëtzebuergesch heescht se Tréierer Strooss oder Tréierer Bierg, en Deel dovun och Kéibierg.

Se huet hiren Ufank am Gronn bei der Mënstergaass a leeft vun do aus a Richtung Nordoste respektiv Osten iwwer de Fetschenhaff bis op den Zens, op d'Kräizung mat der Rue des Alouettes vu wou aus d'Zenser Strooss viru féiert.

Geschicht

D'Tréierer Strooss ass eng vun den eelste Stroosse vun der Stad. Wärend dem ganze Mëttelalter bis an d'Neizäit war se zesumme mat der Mënstergaass den Haaptzougankswee fir an de Gronn. D'Ufäng vun der Tréierer Strooss gi bis a virgeschichtlech Zäiten zeréck, wéi eng Siidlung op der Rumm bestanen huet. Deemools huet se Dinselgaass geheescht, eng Bezeechnung fir eng schmuel Gaass.

Déi zweet Tréierer Paart (och nach bannenzeg Tréierer Paart) gouf 1590 uewenzeg vun der Mauer vun der Abtei Neimënster opgeriicht an 1868 beim Schleefe vun der Festung nees ofgerappt. Haut steet op där Plaz eng ugedeit Paart a Form vun enger Stolkonstruktioun déi iwwer d'Strooss féiert.

Ënnerzeg vun der Paart stoung bis 1958 - op der Säit vun der Abtei - d'Gebuertshaus vum Jean de Beck, dem Gouverneur vum Herzogtum Lëtzebuerg.

Ongeféier 100 Meter ëstlech vun der 2.Tréierer Paart steet déi véiereckeg Dënselpaart (och nach Al Tréierer Paart oder Jakobstuerm) déi ëm 1393 gebaut gouf. D'Strooss féiert gläich duerno iwwer d'Nordstreck vun der Eisebunn ewech.

E bësse weider de Bierg aus läit rietserhand, op der Héicht vum Fort Rubamprez, d'Strock-Kapell, eng fréier beléift Wallfaartsplaz.

• 
  Déi bannenzeg oder zweet Tréierer Paart, hanne lénks op der Zeechnung vum Michel Engels
• 
  Ongeféier déi selwecht Plaz haut (2020)

Kéibierg

Den Deel vun der Tréierer Strooss vun ongeféier der Eisebunnsbréck bis bei den Äppelwee housch a fréiere Joerhonnerten offiziell Kéibierg; haut besteet den Numm just nach am Volleksmond. Wou dësen Numm hier kënnt ass net kloer; et ass awer zimmlech sécher, datt et sech ëm eng Wuertverstümmelung handelt.

De François-Xavier Wurth-Paquet ass der Meenung et misst eigentlech Gehberg sinn (géie Bierg) an net Kehberg (Kuhberg, Kéibierg), iwwerdeems den Nicolas van Werveke mengt, den Numm géif vum Gräifvull Geier hierkommen.
Fest steet just, datt d'Bezeechnunge Geyersberg (1506), Gehersberg (1511), Geyersperg (1575) a Geschberg gebraucht goufen, ier iwwerhaapt vum Kuhberg (1714) oder Kühberg (1767) rieds goung.

Den Ausdrock Geiersberg kéint domat erkläert ginn, datt de Gaalge vun der Abtei um haitege Fetschenhaff stoung.

• 
  De Kéibierg (lénks) ëm 1870 op engem Tableau vum Nicolas Liez
• 
  De Kéibierg hautdesdaags (2012)

Biller

• 
  D'Tréierer Strooss vun der 2. Tréierer Paart aus gesinn, Richtung Gronn
• 
  D'Hoerspéngel-Kéier am Tréierer Bierg
• 
  D'Haus 20 an der Tréierer Strooss
• 
  D'Strock-Kapell

Kuckt och

• Rumm-Befestegungen

Literatur

• Josef Hanck (J.H.), Straßennamen erzählen die Geschichte der Stadt an: Luxemburger Wort vum 7. Januar 1943, S. 3
• Fanny Beck, Was bedeuten die Straßennamen der Stadt? an: Ons Stad 88/2008, S. 68

Um Spaweck

Commons: Rue de Trèves (Stad Lëtzebuerg) – Biller, Videoen oder Audiodateien